Garaşsyzlyk Watanymyzyň mizemezliginiň, halkymyzyň agzybirliginiň we jebisliginiň müdimi binýadydyr. Watan Garaşsyzlygy mukaddeslik saýylýan närseleriň hatarynda durýar. Munuň şeýledigini Türkmenistanyň Halk Maslahatynyň Başlygy, türkmen halkynyň Milli Liderimiziň: «Adam üçin uly bagt — Watanyň Garaşsyzlygy, topragyň asudalygy, çagalaryň şadyýan gülküsidir» diýen çuňňur parasatly sözleri hem tassyklaýar.

Garaşsyz döwlet özygtyýarlylygyň we öz ykbalyňy özüň kesgitlemegiň aňlatmalary bolmak bilen bir hatarda dünýä bilen döwrebaplygy, milli mirasyň köklerine daýanmagy hem alamatlandyrýan düşünjedir.

Arzyly gymmatlyklaryň hatarynda durýan Garaşsyzlyk halkyň, Watanyň barlygydyr. 34 ýyl mundan ozal halkymyz syýasy nukdaýnazardan öňdengörüjilikli we ykdysady taýdan döwlet Garaşsyzlygyna eýe boldy. Garaşsyzlyk ýyllary içinde ýurdumyzyň halk hojalygynyň ähli pudaklarynda, şol sanda ykdysadyýetde, syýasatda, oba hojalygynda, bilimde, saglygy goraýyşda, medeniýetde, sportda ýokary ösüşler gazanyldy.

Mukaddes Garaşsyzlygymyzyň 34 ýyllyk şanly toýunyň giňden bellenilýän günlerinde döwletliligiň esasy alamatlary bolan Konstitusiýa, Döwlet baýdagy, Döwlet tugrasy we Döwlet senasy milli miras paýhaslarynyň jemlenen beýany bolmak bilen, ýurdumyzda we bütin dünýäde dabaralanýar. Halkymyzyň ruhy medeniýetinden gelip çykýan milli ýörelgeleri döwletimiziň garaşsyzlyk derejesiniň medeni esaslarydyr. Garaşsyzlyk parasatly pederlerimiziň arzuw-isleglerinden wysal bolup, halkymyza eşretli durmuşy bagyş etdi. Garaşsyzlygyny gazanyp galkynan, hemişelik Bitaraplyk hukuk ýagdaýy ykrar edilip, mertebesi has-da belende galan halkymyzyň bu gymmatlyklary bahasyna ýetip bolmajak baýlykdyr.

Garaşsyzlyk döwrümiziň her bir güni biziň üçin buýsançdan doly bagtly günlerdir. Bagtyýarlyk döwrümiziň uly ösüşlerine beslenen durmuşymyz şatlykdan doly. Türkmenistan Watanymyzyň täze taryhynda bolup geçýän wakalar bolsa biziň buýsanjymyzy has-da artdyrýar. Türkmenistan Watanymyzyň parasatly Lideriniň başlangyjy bilen kabul edilýän halkara möçberindäki umumadamzat bähbitli maksatnamalar ýurdumyzyň syýasat ulgamyndaky üstünligine şaýatlyk edýär.

Mukaddes Garaşsyzlygymyz baky bagtyýarlygymyzyň girewine öwrülip, asudalygyň, parahatçylygyň girewi bolup, bu gün göwünlere ganat, ruhlara joşgun, döredijilige ylham berýär. Eziz Diýarymyzyň alyp barýan daşary syýasaty diňe bir türkmen halky üçin däl, eýsem, goňşy halklaryň hem parahat ýaşamagy üçin edilýän oňyn başlangyçdyr.

Garaşsyzlykdan başlanýan döwletlilik milli Liderimiziň taýsyz tagallalary netijesinde barha kämilleşýär. Döwlet Baştutanymyz Garaşsyz Diýarymyzy durnukly ösüşiň aýdyň ýoly bilen öňe alyp barýar. Halkara parahatçylyk we ynanyşmak ýylynda 34 ýyllyk şanly toýuny toýlaýan Garaşsyz Watanymyzy beýik özgerişliklere alyp barýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Gözel KEKILOWA,
Myrat Garryýew adyndaky Türkmenistanyň Döwlet lukmançylyk uniwersitetiniň Deri we weneriki keseller kafedrasynyň assistenti, lukmançylyk ylymlarynyń kandidaty.