Häzirki ajaýyp döwrümizde bilim özgertmeleri üstünlikli durmuşa geçirilýär. Gahryman Arkadagymyzyň beýik başlangyçlary Arkadagly Gahryman Serdarymyzyň baştutanlygynda dowam edýär, beýik işler halkymyzy buýsandyrýar. Ylym-bilimde döredilýän giň mümkinçilikler, täze bilim ojaklary bilim işgärlerini has-da döredijilikli işlemäge ruhlandyrýar. Garaşsyz, hemişelik Bitarap Türkmenistan ykdysady taýdan ösýän döwletleriň hatarynda dünýäde giňden ykrar edilýär. Munuň özi, ilkinji nobatda, häzirki zaman ylmynyň ösen tehnologiýalarynyň önümçilige ornaşdyrylýandygy bilen berk baglanyşyklydyr.

Ýurdumyzda sanly ulgamyň işini üstünlikli alyp barýan, Watanymyzyň ösüşlerine goşant goşýan bilimli hünärmenler ýaşlardyr. Halk hojalygynyň pudaklaryndaky ösen tilsimatlardan oňat baş çykarýan ýaş nesliň kemala gelmegi buýsançly ýagdaýdyr. Ýurdumyzyň durnukly ösüşiniň, ýaş nesliň beden we ruhy taýdan sagdyn ösmeginiň şerti hökmünde bilim ulgamyny döwrüň talaplaryna laýyklykda kämilleşdirmek üçin maksada okgunly işler yzygiderli amala aşyrylýar. Hormatly Prezidentimiz “Ýaşlar - Watanyň daýanjy” atly kitabynda şeýle belleýär: “Berkarar döwletiň täze eýýamynyň Galkynyşy döwründe Garaşsyz Watanymyz öz ösüşiniň täze basgançaklaryna bedew bady bilen gadam basýar. Ösüşleriň hem-de özgerişleriň aýdyň ýolundan beýik hem-de röwşen geljegine barýar. Biziň alyp barýan syýasatymyz Garaşsyz, Bitarap döwletimizi syýasy, ykdysady, hukuk we medeni taýdan berk binýatly, kuwwatly ýurda öwürmekden, halkymyzy bagtyýar, parahat, eşretli durmuşda ýaşatmakdan ybaratdyr”. Şu parasatly sözlerden görnüşi ýaly, ýurdumyz syýasy, ykdysady, hukuk we medeni taýdan berk binýatly döwlete öwrüldi.

“Garaşsyz, baky Bitarap Türkmenistan – bedew batly at-myradyň mekany” ýylynda Watanymyzyň halkara abraýy barha artýar. Garaşsyzlyk - biziň üçin ata-babalarymyzyň hasyl bolan arzuwydyr, halkymyzyň şu güne çenli ýazylan gymmatly taryh kitabynyň özeni, milletimiziň geçmişi, asuda geljegidir. Garaşsyzlyk halkymyzyň kalbyndaky arzuwlarynyň wysalyny, göwünleriniň ylhamyny bagyş etdi. Şonuň üçin hem mukaddes Garaşsyzlyk soňlanmajak aýdymdyr, köňülleriň buýsanjydyr. Häzirki wagtda ýurdumyzyň orta we ýokary okuw mekdepleri häzirki zaman kompýuterleri, okuw-tehniki enjamlary, interaktiw-multimedia tehnologiýalary bilen üpjün edilýär. Munuň özi ýaşlaryň sagdyn, giň dünýägaraýyşly bolup ýetişmekleri üçin döredilen iň oňat mümkinçiliklerdir.

Mälim bolşy ýaly, jemgyýetiň ösüşinde ylym-bilim esasy orny eýeleýär. Adamzat durmuşynda gazanylan ähli üstünlikler we ýeňişler, ýetilen belent sepgitler ylym-bilimiň, ösen aňyýetiň miweleridir. Häzirki taryhy döwürde ýurdumyzy ösdürmegiň türkmen nusgasy täze mazmun bilen baýlaşdyrylyp, Türkmenistanyň dünýä bileleşigine has ynamly goşulyşmagyny üpjün etmek, onuň bäsdeşlige ukyplylygyny ýokarlandyrmak wezipesi döwlet syýasatynyň ileri tutulýan ugurlarynyň biri bolup durýar. Bu günki günde Türkmenistan ösen kuwwatly döwlet bolup, berkararlygyny, Garaşsyzlygyň binýadyny has-da pugtalandyrýar.

Häzirki ajaýyp döwrümizde Gahryman Arkadagymyzyň, Arkadagly Gahryman Serdarymyzyň tagallalary bilen ýurdumyz ykdysady taýdan kuwwatly, berkarar döwlete öwrüldi. Şonuň üçin hem halkymyzyň bagtyýar durmuşy üpjün edilýär, medeni we önümçilik desgalary, ýaşaýyş jaýlary gurlup ulanmaga berilýär. Bularyň ählisi halkymyzyň bagtyýarlygy, Garaşsyzlygymyzyň berk binýady bolup durýar. Bu beýik işler, ýurdumyzyň ösüşleri biziň her birimizi buýsandyrýar we täze üstünliklere ruhlandyrýar. Ruhubelent, ylymly, bilimli kämil nesli ösdürip ýetişdirmek bolsa bilim ulgamynyň işgärleriniň öňünde durýan esasy wezipeleriň biridir. Garaşsyz Watanymyzy ösüşleriň täze basgançaklaryna çykarmakda beýleki ugurlar bilen bir hatarda bilim ulgamynyň wekilleri hem özlerine ynanylan wezipeleri üstünlikli berjaý etmekde yhlas-başarnyklaryny gaýgyrman zähmet çekýärler.

Zülfiýa REJEPOWA,
Türkmenistanyň Telekommunikasiýalar we informatika institutynyň Maglumat tehnologiýalary we programmirleme fakultetiniň 4-nji ýyl talyby.