Eziz Watanymyz Türkmenistan baky Bitaraplygyň, bagtyýarlygyň we beýik ösüşleriň mekany hökmünde şanly seneleriň, taryhy wakalaryň röwşen nuruna beslenip, täze belentliklere tarap ynamly öňe barýar. Halkymyzyň milli buýsanjy, asudalygynyň hem-de berkararlygynyň synmaz binasy bolan mukaddes Garaşsyzlygymyzyň 35 ýyllyk şanly toýuny garşylamaga ýurdumyzyň ähli künjeginde uludan taýýarlyk görülýär. Ata Watanymyzdaky bu baýramçylyk ruhy diňe bir taryhy senäni garşylamak däl, eýsem mukaddes Garaşsyzlygymyzyň beren belent miwelerini, halkymyzyň agzybir zähmetini, bitewiligini we ýeten beýik sepgitlerini dabaralandyrmak dabarasydyr. Ýurdumyzyň şäherlerinde, etrap-obalarynda, bilim, medeniýet hem-de önümçilik ojaklarynda ýaýbaňlandyrylan giň gerimli çäreler her bir adamyň kalbynda çuňňur buýsanç duýgularyny oýarýar.

Şu ýylyň «Garaşsyz, baky Bitarap Türkmenistan - bedew batly at-myradyň mekany» diýen ruhy ýörelgesi halkymyzyň kalbynda orun alan duýgulary has-da ýokary göterýär. Ýylyň şygarynda jemlenen beýik maksatnamalar, bedew batly ösüşler, ruhy galkynyşlar Türkmenistanyň şanly Garaşsyzlygynyň 35 ýyllyk toýuna tarap barýan ýolumyzy bezeýär. Behişdi atlarymyzyň owazly sarsgyny ýetjek sepgitlerimiziň tizligini, beýik geljegimiziň aýdyňlygyny aňladýar. Her bir raýatymyz bu şygardan ruhlanyp, zähmet çekip, ýurdumyzyň syýasy, ykdysady we medeni durmuşyna öz goşandyny goşmagy iň belent mertebe hem-de mukaddes borç diýip bilýär. Watana bolan söýgi, mukaddeslige bolan tagzym bu gün her bir türkmeniň kalbynda aýdyň çyrag bolup alawlaýar.

Mukaddes Garaşsyzlygymyzyň 35 ýyllygyna bagyşlanyp geçirilýän taýýarlyk işleri giň gerime eýedir. Ýurdumyzyň paýtagty Aşgabat şäherinde, welaýatlarda, etraplarda hem-de obalarda baýramçylyk dabaralaryna jemgyýetçilik we medeni çäreleriň uly tapgyry utgaşdyrylýar. Täze gurlup ulanmaga berilýän senagat we durmuş maksatly desgalar, döwrebap bilim, saglygy saklaýyş, medeniýet ojaklary bu şanly senäniň hakyky sowgatlaryna öwrülýär. Her bir açylyş dabarasy, her bir zähmet ýeňşi halkymyzyň erkin we abadançylykly durmuşynyň aýdyň subutnamasydyr. Şäherlerimiziň hem-de obalarymyzyň binagärlik keşbi gözelleşip, toý bezegleri, baýramçylyk şowhunlary döwrümiziň beýik galkynyşlaryny bütin dünýä ýaýýar.

Bu günki gün Watanymyz Türkmenistanyň gazanýan ähli üstünlikleriniň, ýeten belent sepgitleriniň düýp binýadynda Gahryman Arkadagymyzyň salan beýik ýoly hem-de hormatly Prezidentimiz Serdar Berdimuhamedowyň parasatly, öňdengörüjilikli syýasaty durandyr. Berkarar döwletimiziň täze eýýamynyň Galkynyşy döwründe içeri hem daşary syýasatda gazanylýan belent sepgitler halkymyzyň ýaşaýyş-durmuş derejesini barha ýokarlandyrýar. Ýurdumyzyň ykdysady kuwwaty berkitilip, milliligi we häzirki zaman ösüşlerini utgaşdyrýan beýik taslamalar durmuşa geçirilýär. Ylma-bilime, sanly ulgama, ýaşlaryň geljegine berilýän uly üns Watanymyzyň ertirki gününe bolan ynamyny barha pugtalandyrýar.

Türkmen halky şanly Garaşsyzlygyň her bir ýylyny zähmet ýeňişleri, medeni özgerişler bilen belleýär. Taýýarlyk çäreleriniň çäginde geçirilýän ylmy-amaly maslahatlar, medeniýet we sungat işgärleriniň döredijilik bäsleşikleri, dabaraly konsertler, sergiler halkymyzyň milli mirasyna, baý taryhyna we häzirki zaman gazananlaryna bolan buýsanjyny açyp görkezýär. Şygyr aýdyşlyklarda, sungat eserlerinde galkynýan milli ruh mukaddes asudalygyň, özbaşdaklygyň nähili beýik bagtdygyny ýene bir gezek aýdyňlygy bilen subut edýär.

Hormatly Prezidentimiziň hem-de Gahryman Arkadagymyzyň halkyň abadançylygy, ýurduň gülläp ösüşi barada edýän yzygiderli aladalary her bir raýatymyzda çüňňür minnetdarlyk duýgusyny döredýär. Biz bagtyýar zamanyň bagtyýar raýatlary hökmünde mukaddes Garaşsyzlygymyzyň 35 ýyllyk şanly baýramyny agzybirlikde, galkynyşly we buýsançly ruhda garşylaýarys. Watana bolan söýgi, döwlete bolan wepalylyk hem-de milli Liderlerimize bolan çänsiz minnetdarlyk biziň kalbymyzyň iň belent aýdymydyr. Berkarar döwletimiziň şan-şöhratyny dünýä ýaýjak şanly Garaşsyzlygymyzyň 35 ýyllyk toýy gutly mübärek bolsun, eziz Watanymyz Türkmenistan mundan beýläk-de beýik ösüşleriň we parahatçylygyň mekany bolsun!

Garýagdy ÖRÄÝEW,
Türkmenistanyň Inžener-tehniki we ulag kommunikasiýalary institutynyň mugallymy.