Arkadagly Gahryman Serdarymyzyň parasatly baştutanlygynda berkarar döwletimiz ösüşleriň bedew batly depgini bilen öňe barýar. Hormatly Prezidentimiz: “Biziň esasy maksadymyz mähriban Watanymyzyň asudalygyny we howpsuzlygyny, durmuş-ykdysady taýdan ösüşini, halkymyzyň ýaşaýyş-durmuş derejesini mundan beýläk-de ýokarlandyrmagy, bütin dünýäde parahatçylygy hem-de özara ynanyşmagy berkitmegi üpjün etmekdir” diýip, halkymyzyň parahat, asuda, bolelin durmuşyny goramagy ýurdumyzyň syýasatynyň esasy maksady hökmünde kesgitledi. Munuň özi demokratik, hukuk we dünýewi döwletimiziň,  sözüň doly manysynda, raýat jemgyýetini kemala getirmegiň ýolunda ynamly öňe barýandygynyň, adam hukuklarynyň goragynyň barha ýokarlandyrylýandygynyň aýdyň subutnamasydyr.

Demokratik, dünýewi we hukuk döwletimiziň Esasy Kanunynda adamyň we raýatyň hukuklary hem-de azatlyklary halkara hukugynyň umumy ykrar edilen kadalaryna laýyklykda kepillendirilýär. Munuň özi adam hukuklarynyň we azatlyklarynyň eldegrilmesizligini tassyklaýar. Ýurdumyzyň Esasy Kanunynda: “Adamy goramak, goldamak we oňa hyzmat etmek döwlet häkimiýet edaralarynyň baş wezipeleridir” diýlip kesgitlenilýär. Bu kadalar adam, jemgyýet, döwlet sazlaşygyny emele getirýär. Bu kadalardan gözbaş alýan kanunçylyk namalary adamyň jemgyýetdäki ornuny we abraýyny pugtalandyrýar, şahsyýetiň hormatlanmagyny üpjün edýär. Şeýle ynsanperwer kadalar ýaş nesillerde hukuk medeniýetini kemala getirýär.

Türkmenistanyň halkara konwensiýalaryň birnäçesine ilkinjileriň hatarynda goşulmagy we olary ykrar etmegi, şol bir wagtda hem bu resminamalarda jemlenen umumadamzat bähbitli kadalaryň milli kanunçylygymyza ornaşdyrylmagy ýurdumyzyň halkara giňişligindäki abraýyny has-da artdyrýar. Adam hukuklary babatda halkara hukuk resminamalarynyň hatarynda 1948-nji ýylyň 10-njy dekabrynda kabul edilen Adam hukuklarynyň ählumumy Jarnamasy esas goýujy resminama hasaplanýar. Bu Jarnama adamyň mizemez hukuklarynyň bitewüligini emele getirip, halkara hem-de milli kanunlaryň gözbaşy bolup çykyş edýär. Adam hukuklarynyň Ählumumy Jarnamasynyň 1-nji maddasynda ähli adamlar mertebe we hukuklar babatda azat we deň bolup dogulýandygy bellenilýär. Konstitusiýamyzyň 26-njy maddasynda hem berkarar döwletimizde adamyň hukuklarynyň we azatlyklarynyň eldegrilmesizdigi hem-de aýrybaşgalanmasyzdygy, Konstitusiýa we kanunlara laýyk gelmeýän bolsa, adam hukuklaryny we azatlyklaryny çäklendirmäge hiç kimiň hakynyň ýokdugy kepillendirilýär.

Berkarar döwletiň täze eýýamynyň Galkynyşy döwründe Gahryman Arkadagymyzyň we Arkadagly Gahryman Serdarymyzyň tagallalary netijesinde ýurdumyzyň raýatlarynyň konstitusion hukuklaryny üpjün etmäge yzygiderli üns berilmegi mähriban halkymyzda jemgyýetçilik işjeňligine höwes döredýär. Türkmenistanyň Konstitusiýasy 34 ýyldan gowrak wagtyň dowamynda döwletimiziň ösüşini täze belentliklere göterdi, okgunly öňe barýan Garaşsyz döwletimizde syýasy asudalygy, halk bitewüligini has-da berkitdi. Häzirki wagtda hem ýurdumyzyň Esasy Kanuny halkymyzyň bagtyýar durmuşynyň hukuk kepili bolup çykyş edýär.

Biziň Konstitusiýamyzyň esasy aýratynlygy ynsanyň mizemez hukuklarynyň kanuny taýdan kepillendirilmegidir. Şahsyýet, onuň hukuklary we erkinligi biziň jemgyýetimiziň baş gymmatlygy bolup durýar. “Garaşsyz, baky Bitarap Türkmenistan - bedew batly at-myradyň mekany” ýylynyň asuda, abadan günlerinde her bir raýat döwlet tarapyndan özüniň aladasynyň edilýändigini gündelik durmuşynda bolup geçýän wakalarda görýär. Bilim almak, zähmet çekmek, erkin döredijilik, saglygy goramak, ruhy-medeni taýdan kämilleşmek üçin döredilýän mümkinçilikler, iş haklarynyň, döwlet kömek pullarynyň, talyp haklarynyň yzygiderli köpeldilmegi, ýaşaýyş jaý bilen üpjünçiligi has kämilleşdirmek bilen ýörite döwlet maksatnamalarynyň netijeli durmuşa geçirilmegi Türkmenistanda adamyň iň ýokary gymmatlyk hökmünde ykrar edilýändiginiň aýdyň we mizemez kepilidir.

Garaşsyz, hemişelik Bitarap Watanymyzda kanunçylygyň yzygiderli döwrebaplaşdyrylmagy, demokratiýanyň dabaralanmagy, beýik zamanamyza mynasyp ýaşlaryň kemala gelmegi üçin ähli şertleri döredip berýän türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak,  parasatly tagallalary hemişe rowaç bolsun!

Aýna GURBANOWA, 
Türkmenistanyň Adalat ministrliginiň ýanyndaky Gozgalmaýan emläge bolan hukuklaryň we onuň bilen bagly geleşikleriň döwlet tarapyndan bellige alynmagy baradaky gullugyň Daşoguz welaýat müdirliginiň maglumatlary seljeriş boýunça döwlet bellige alyjysy, 1-nji derejeli ýurist.