Baku şäherinde geçirilen Aziýada hyzmatdaşlygy we ynanyşmagy berkitmegiň çäreleri Geňeşiniň VII sammitinde döwletimiziň bu babatdaky ileri tutýan garaýyşlary sebitde ynanyşmagy berkitmek arkaly Durnukly ösüş maksatlaryna ýetmekde giňden goldaw tapdy. Şonuň yzysüre Ermenistanyň paýtagty Ýerewan şäherinde BMG-niň Biodürlülik baradaky maslahatynyň Liderler sammitinde döwlet Baştutanymyz tebigatyň abadançylygynyň hatyrasyna anyk başlangyçlar bilen çykyş etdi. Parahatçylygy we ynanyşmagy gorap saklamakda tagallalary birleşdirmek bolsa tebigatyň şol mümkinçiliklerinden peýdalanyp, gözelligi duýup ýaşamagyň baş şertidir.

Azerbaýjan Respublikasynda iş saparynda bolan hormatly Prezidentimiz Aziýada hyzmatdaşlygy we ynanyşmagy berkitmegiň çäreleri Geňeşiniň nobatdaky sammitinde Türkmenistanyň oňyn başlangyçlary, yklymyň geosyýasy giňişligindäki orny we özara bähbitli hyzmatdaşlygyň ähmiýeti barada çykyş etdi.

Döwlet Baştutanymyz öz çykyşynda: “Syýasy şertler bilen birlikde, ykdysady baglanyşygy pugtalandyrmak, özara bähbitli söwdany giňeltmek we ygtybarly ulag-logistika zynjyrlaryny döretmek dünýäde howpsuzlygy hem-de durnukly ösüşi üpjün etmegiň möhüm şerti bolup durýar. Dünýä ykdysadyýetiniň üýtgäp durýan döwründe ulag ugurlaryny diwersifikasiýalaşdyrmak, multimodal ýük daşamalaryny ösdürmek hem-de sebit hyzmatdaşlygyna bökdençlik döredýän infrastruktura we amaly päsgelçilikleri aradan aýyrmak aýratyn ähmiýete eýe bolýar” – diýip, örän jogapkärli nygtaýar.

Türkmenistanyň başlangyjy boýunça kabul edilen BMG-niň Baş Assambleýasynyň 2026 — 2035-nji ýyllar üçin Durnukly ulagyň onýyllygy hakyndaky Kararnamasyny dowam etmek bilen, ýurdumyz ulag we logistika ulgamlarynda halkara hyzmatdaşlygy ösdürmäge gönükdirilen başlangyçlary yzygiderli öňe sürýär. Şolaryň hatarynda Merkezi we Günorta Aziýanyň Hazar deňziniň üsti bilen Ýewropa bazarlaryna çykmagyny üpjün edýän yklymara ulag ugurlaryny döretmek hem-de Durnukly ulag arabaglanyşygynyň ählumumy atlasyny işläp taýýarlamak ýaly başlangyçlar bar.

Türkmenistan öz gezeginde Gündogar — Günbatar we Demirgazyk — Günorta ugurlary boýunça ulag geçelgeleriniň mümkinçilikleriniň has netijeli ulanylmagy, şeýle hem logistika ulgamynda halkara hyzmatdaşlygyň giňeldilmegi we söwda amallarynyň ýeňilleşdirilmegi ugrunda ynamly çykyş edýär.

Sammite başlyklyk edýän Azerbaýjanyň Prezidenti Ilham Aliýew döwlet Baştutanymyza çuň manyly çykyşy üçin hoşallyk bildirip, beýan eden teklipleriniň hem-de başlangyçlarynyň möhüm ähmiýetini belledi. Şeýle hem sammitiň dowamyndaky çykyşlarda ynanyşmak çärelerini pugtalandyrmak, howanyň üýtgemegine garşy uýgunlaşmak, Aziýada ulag-logistika strategiýalaryny utgaşdyrmak, halkara ulag geçelgelerini ösdürmek, azyk howpsuzlygyny hem-de ekologiýa durnuklylygyny üpjün etmek, sanly özgertmeleri çaltlandyrmak bilen baglanyşykly meselelere seredilip geçildi.

Şeýlelikde, Türkmenistan Aziýada hyzmatdaşlygy we ynanyşmagy berkitmegiň çäreleri Geňeşiniň sammitiniň çäklerinde ulag-logistika hyzmatdaşlygyny diwersifikasiýalaşdyrmaga, ekologiýa meselelerini çözmäge, şol sanda daşky gurşawy goramaga we suw serişdelerinden netijeli peýdalanmaga, ynsanperwer hyzmatdaşlygy ösdürmäge gönükdirilen başlangyçlary öňe sürdi. Hormatly Prezidentimiziň beýan eden teklipleri Türkmenistanyň Durnukly ösüş maksatlaryna ýetmek we ählumumy abadançylygy üpjün etmek üçin dünýä jemgyýetçiliginiň tagallalaryny birleşdirmäge çalyşýandygynyň nobatdaky subutnamasy boldy.

Hemişelik Bitaraplygyň gymmatlyklaryny dünýä ýaýýan döwletimiz halkara hukuk binýadynyň pugtalandyrylmagyna hem aýratyn ähmiýet berýär. Ýurdumyzyň 2028-nji ýyly «Halkara hukuk ýyly» we 2027 — 2037-nji ýyllary BMG-niň «Dialogyň we öňüni alyş diplomatiýasynyň onýyllygy» diýip yglan etmek bilen bagly başlangyçlaryny bu ugurdaky wajyp başlangyçlar hökmünde görkezmek bolar.

Yklymda parahatçylygy hem-de ynanyşmagy berkitmegiň hatyrasyna beýan edilen garaýyşlar, tebigaty — adamzadyň umumy öýüni goramak bilen bagly öňe sürlen başlangyçlar döwlet Baştutanymyzyň alyp barýan durmuş ugurly syýasatynda aýratyn orun eýeleýär. Çünki hemişelik Bitaraplygymyzyň oňyn ýörelgelerine berk eýerýän ýurdumyz bu gün ynsanperwerligi baýdak edinip, oňyn başlangyçlary nusgalyk derejede durmuşa geçirmegiň göreldesini görkezýär.

Goý, Garaşsyz, hemişelik Bitarap Watanymyzyň parahatçylyk söýüjilik syýasatyny dünýä äşgär edýän hem-de halkara abraýyny barha belende galdyrýan türkmen halkynyň Milli Lideriniň hem-de Arkadagly Gahryman Serdarymyzyň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Yslamgeldi ANNABERDIÝEW,
Türkmenistanyň Telekommunikasiyalar we informatika institutynyň Elektrotehnika we elektronika kafedrasynyň mugallymy.