Hormatly Prezidentimiz Arkadagly Gahryman Serdarymyzyň baştutanlygynda “Garaşsyz, baky Bitarap Türkmenistan - bedew batly at-myradyň mekany” şygary astynda ösüşleriň täze belentliklerine tarap ynamly ädimler bilen barýan eziz Watanymyzda adam manysynyň baş baýlyk hökmünde ykrar edilmegi döwlet syýasatynyň özenini düzýär. Ýurdumyzda amala aşyrylýan giň möçberli demokratik özgertmeler jemgyýetimiziň ähli ugurlarynda, şol sanda kanunçylyk ulgamynda düýpli üstünlikleriň gazanylmagyna itergi berýär. Bu günki günde her bir raýatyň hukuk habarlylygyny ýokarlandyrmak, kanunlaryň mazmunyny ilata dogry we öz wagtynda ýetirmek jemgyýetçilik durmuşynyň esasy talaplarynyň biri bolup durýar. 

Gahryman Arkadagymyzyň hem-de Arkadagly Gahryman Serdarymyzyň parasatly baştutanlygynda ýurdumyzda adam hukuklaryny we azatlyklaryny goramak, raýatlaryň kanuny bähbitlerini üpjün etmek boýunça giň gerimli işler alnyp barylýar. Ýurdumyzyň Baş Kanuny bolan Konstitusiýamyz we Türkmenistanyň täze kabul edilen “Raýat kodeksi” başda bolmak bilen, ähli kadalaşdyryjy-hukuk namalary raýatlaryň abadançylygyna, bagtyýar durmuşyna we döwletimiziň berkararlygyna gönükdirilendir.

Hukuk habarlylygy diňe bir kanunlary bilmek däl, eýsem olaryň talaplaryny dogry düşündirmek we gündelik durmuşda ýalňyşsyz berjaý etmek diýmekdir. Her bir raýat özüniň borçlary bilen birlikde hukuklaryny hem çuň bilmelidir. Bu bolsa jemgyýetde kanunçylyk we tertip-düzgün binýadynyň has-da berkemegine, adam faktorynyň ýokary derejede sarpalanmagyna alyp barýar. Notariat ulgamy raýatlar bilen döwlet edaralarynyň arasyndaky gatnaşyklarda ygtybarly köpri bolup hyzmat edýär. Şertnamalary, wesýetnamalary, ynanç hatlary we beýleki resminamalary resmileşdirmek arkaly biz raýatlaryň emläk we şahsy emläk däl hukuklaryny kepillendirýäris.

Berkarar döwletimiziň täze eýýamynyň Galkynyşy döwründe her bir pudak ýaly hukuk ulgamy hem döwrüň talabyna laýyklykda ösdürilýär. Ulgamda alnyp barylýan maksatnamalaýyn işler netijesinde, ýurdumyzyň welaýatlarynda we paýtagtymyzda döwrebap notariat edaralary hereket edýär. Sanly ulgamyň giňden ornaşdyrylmagy netijesinde raýatlara edilýän hyzmatlaryň ýokary hilli, amatly we tiz bolmagy üpjün edilýär. Şu ýylyň şygarynda bellenilişi ýaly, bedew batly ösüşler bilen öňe barýan ýurdumyzda döwlet notariuslary hem öz işine jogapkärçilikli çemeleşýärler.

Hukuk taýdan kämil jemgyýetde ýaşamagyň buýsanjy bize Gahryman Arkadagymyzyň we Arkadagly Gahryman Serdarymyzyň taýsyz tagallalary arkaly miýesser etdi. Raýatlaryň döwlet tarapyndan goralmagy, emläk we maşgala gatnaşyklarynyň kanun esasynda düzgünleşdirilmegi her bir adamyň ertirki güne bolan ynamyny pugtalandyrýar. Raýat kodeksinde we beýleki kadalaşdyryjy namalarda göz öňünde tutulan kadalaryň dogry düşündirilmegi nika-maşgala gatnaşyklarynyň berkimegine, emläk dawalarynyň öňüniň alynmagyna we raýat hukugynyň goraglylygyna gulluk edýär. Biz – hukukçylar öz hünär borçlarymyzy berjaý etmek bilen bir hatarda, ýurdumyzda alnyp barylýan adalatly, parahatçylyk söýüji we kanunçylygy üpjün edýän syýasata öz goşandymyzy goşýarys. Her bir ýüz tutýan raýata açyk, ýokary hilli we kanuny hyzmat etmek arkaly halkymyzyň döwletimize bolan buýsanjyny artdyrmaga çalyşýarys.

“Garaşsyz, baky Bitarap Türkmenistan - bedew batly at-myradyň mekany” ýylynda ýurdumyzyň gazanýan her bir üstünligi bizi ruhlandyrýar we täze zähmet ýeňişlerine ruhlandyrýar. Raýatlaryň hukuk habarlylygyny ýokarlandyrmak diňe bir hünär borçnamamyz däl, eýsem mukaddes Watanymyzyň ösüşine, kanunçylygyň we adalatyň berkarar bolmagyna goşýan uly goşandymyzdyr. Goý, halkymyza abadan, bagtyýar durmuşy peşgeş berýän, her bir raýatyň hukugyny we bähbitlerini goramagy baş maksat edinip ýaşaýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak, alyp barýan il-ýurt bähbitli işleri elmydama rowaç bolsun!

Babajan MYRATGELDIÝEW,
Arkadag şäheriniň Gorjaw etrabynyň prokurorynyň kömekçisi, 1-nji derejeli ýurist.