Innowasiýa tehnologiýalarynyň döwrebap ulanylmagy netijesinde Internet hyzmatlary durmuşymyzyň ähli pudagyna berk ornaşdy we bu ugur günsaýyn ylmyň we tehnikanyň özgermegi, täze pikirleriň girizilmegi bilen gerimini artdyrýar. Berkarar döwletimiziň bagtyýarlyk döwründe hormatly Prezidentimiziň Türkmenistanda sanly ykdysadyýeti ösdürmegiň uzakmöhletleýin maksatnamasynyň yzygiderli durmuşa geçirilmegi netijesinde, aragatnaşyk-telekommunikasiýa ulgamynda ösüşler amala aşyrylýar.  

Elektron söwdasynyň, - Internet hyzmatlarynyň, uzak aralykdan işlemegiň we okatmagyň giňden ýaýramagy bilen baglylykda, aragatnaşyk hyzmatlarynyň hilini we geçirijilik ukybyny gowulandyrmak boýunça Gahryman Arkadagymyzyň görkezmelerinden we tabşyryklaryndan ugur alyp «Türkmenaragatnaşyk» agentliginiň «Türkmenpoçta» poçta aragatnaşyk kompaniýasynyň hünärmenleri dünýä tejribesine daýanýan hyzmatlary hödürleýär.

«Türkmenpoçta» poçta aragatnaşyk kompaniýasynyň www.turkmenpost.gov.tm resmi saýtynda onlaýn söwda hyzmatlary halk köpçüligi arasynda uly isleg bildirilip ulanylýan ugurlaryň biridir. Internet ulgamynyň çäksiz mümkinçilikleri ilatyň durmuş hal-ýagdaýynyň amatlaşdyrylmagyny üpjün edýär. Elektron hyzmatlarynyň ýurdumyzyň ähli ugurlaryna giň gerim we elýeterli derejede ýaýbaňlandyrylmagy Hormatly Prezidentimiziň «Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasy» esasynda durmuşa geçirilýän işleriniň aýdyň subutnamasydyr.

Sanly ulgamyň wezipeleriniň durmuşymyzyň ähli ulgamyna ornaşdyrylmagy netijesinde  howaýollary, awtoulaglary we demir ýol peteklerini internet arkaly satyn almak, ýurdumyzyň banklarynda bar bolan hasabyňy internet arkaly dolandyrmak, ýol gözegçilik gullugynyň tölegini amala aşyrmak, jemagat töleglerini tölemek hyzmatlary durmuşymyzda giňden orun aldy. Şu günki günde has uly meşhur bolan ugurlar - elektron söwdasyny alyp barmak, onlaýn-banking we onlaýn-bildirişler ýaly hyzmatlar giňişleýin durmuşa ornaşdyryldy hem-de halk arasynda isleg bildirilip ulanylýar.

market.turkmenpost.gov.tm elektron dükany onlaýn görnüşde hereket edýär we ýokary hilli önümleri gysga wagtyň içinde elektron söwda dolanşygy arkaly eltip bermek hyzmatlaryny amala aşyrýar. Raýatlarymyzyň gündelik durmuşyna amatlaşdyrylan hyzmatlaryň dürli görnüşleri girizilip, bu saýt hem sanly ulgama geçmegiň wajyp wezipeleriniň birini ýerine ýetirýär. Saýtda öýde, işde we durmuşyň dürli ugurlary boýunça zerur bolup biljek önümleriň görnüşleri aýry-aýry bölümleriň üsti bilen onlaýn görnüşde görkezilýär. Öý hojalygyna degişli önümleri, ofis we mekdep harytlary, zenanlar we erkek adamlar, şeýle-de çagalaryň ýaşlaryna görä bölümleri gije-gündiziň dowamynda hyzmatlaryny halk köpçüligine hödürleýär.

Zenanlara degişli bölüm gelin-gyzlarymyz üçin döwrebap egin-eşikleriň dürli görnüşlerini, ýaglykdyr, öýmeleriň täze tapgyrlaryny, şaý-sepleri, haly gapjyklary, torbalary, donlaryň häzirki zaman nagyşlar bilen utgaşdyrylan görnüşlerini, edil şonuň ýaly erkek adamlaryň egin-eşikleriniň dürli görnüşlerini, milli we sport egin-eşiklerini, çagalar üçin geýimlerdir, oýunjaklary, öý hojalygy üçin dokma önümlerini we tämizlik esbaplaryny, saglyk ulgamy boýunça arassaçylyk serişdelerini, agyz-burun örtüklerini, konselýariýa harytlaryny we dürli ugurlar boýunça halk hojalygynda gerek bolup biljek önümleriň giň ulgamyny özünde jemleýär.  

market.turkmenpost.gov.tm internet söwda we mahabat saýty bolup, ýaşaýşymyzy aňsatlaşdyrýan sanly ulgamyň ugurlarynyň biri bolup durýar we Internet hyzmatlarynyň bar bolan islendik nokadynda, ýerleşýän ýeriňizden hiç ýere aýrylmazdan söwda etmäge we islendik önümi  aňsat usul bilen tapmaga mümkinçilik döredýär. Satyn almak işlerini has amatly ýagdaýa getirýän onlaýn dükanlary halk köpçüligi üçin oňaýly we elýeterli önümleriň dürli görnüşlerini yzygiderli täzeläp durmak bilen, onlaýn hyzmatlaryny üznüksiz, gije-gündiziň dowamynda hödür edýär.

Häzirki wagtda, «Türkmenaragatnaşyk» agentligi tarapyndan Türkmenistanda döwlet derejesinde sanly ykdysadyýete geçmegiň tapgyrlarynyň çäklerinde söwda nokatlarynyň we internet dükanlarynyň sany günsaýyn köpelýär. Ýurdumyzda onlaýn dükanlaryna bolan islegleriň artmagy nazara alnyp, «Türkmenaragatnaşyk» agenliginiň   «Milli utgaşdyryjy domen merkezi» hojalyk jemgyýetinde ýüzlerçe söwda nokatlaryny we internet dükanlaryny ýokarky derejeli domen atlary we internet saýtlary bilen bellige almak işleri amala aşyrylýar. Şunuň bilen baglylykda, sanlaşdyrmagyň täze wezipeleri maksatnamalaýyn durmuşa geçirilýär we elektron görnüşde ýokary hilli dürli döwlet hyzmatlarynyň sany barha artýar.

.Aýgözel ANNAMÄMMEDOWA,
«Türkmenaragatnaşyk» agentliginiň «Türkmentelekom» elektrik aragatnaşyk 
kompaniýasynyň hünärmeni.