Ata Watanymyzy bagy-bossanlyga öwürmek ugrunda amala aşyrylýan giň gerimli işler Garaşsyz, baky Bitarap ýurdumyzda tebigaty goramaga, baýlaşdyrmaga, daşky gurşawyň, ekologiýanyň abadançylygynyň üpjün edilmegine gönükdirilen döwlet syýasatynyň esasy ugurlarynyň hatarynda durýar. Şoňa görä-de, mähriban Diýarymyzyň ähli künjeklerinde bu babatdaky köp sanly derwaýys çäreler yzygiderli durmuşa geçirilýär. Her ýyl Milli bahar baýramynyň öň ýanynda bag ekmek dabaralarynyň guralmagynyň  ajaýyp däbe öwrülmegi munuň aýdyň mysalydyr. Hormatly Prezidentimiziň häzirki dowam edýän Halkara parahatçylyk we ynanyşmak ýylymyzda bu ählihalk çäresini 21-nji martda geçirmek baradaky Karary kabul etmegi hem uly ähmiýete eýedir.

Tebigata söýgi bilen seredip, ony has-da gülzarlyga öwürmek işine halkymyz örän jogapkärçilikli çemeleşýär. Berkarar döwletiň täze eýýamynyň Galkynyşy döwrüniň şu baharynda-da milletiň asyrlaryň jümmüşinden kök alyp gaýdýan bag ekmek ýörelgesiniň rowaç gadamlary zamanamyzyň belent ruhy bilen utgaşyp, göwünlere galkynyş paýlady. Bu çäre ekologiýa abadançylygynyň barha pugtalandyrylýandygynyň mizemez subutnamasydyr.

Ýurdumyz günsaýyn gür baglyga, sergin howaly jenneti mekana öwrülýär. Eziz Diýarymyzy bagy-bossanlyga öwürmek babatda edilýän işlere mysal hökmünde ýurdumyzda her ýylda güýzki we ýazky bag ekmek möwsümleriniň geçirilip, millionlarça agaç we bag nahallarynyň oturdylmagyny görkezmek bolar. 21-nji martda ýazky bag ekmek dabarasyna badalga berildi.

Asylly däbe öwrülen ýazky ählihalk bag ekmek dabaralary her ýyl aýratyn öwüşginlere beslenýär. Sebäbi bu çäräniň halkymyzda täzelenişiň baýramy hasaplanylýan Milli bahar baýramy bilen utgaşdyrylyp geçirilmegi, oňa göwünleri ýaz ýakymyna beslenen ýaşuly we ýaş nesilleriň ählisiniň agzybirlikde, uly hyjuw bilen gatnaşmagy ählihalk bag ekmek dabarasyny ählihalk baýramyna öwrüp goýberýär diýsegem, lap etdigimiz bolmasa gerek.

Bagyň howany arassalaýandygy, onuň düzümindäki zyýanly maddalary özüne siňdirýändigi, netijede ekologiýa abadançylygyny üpjün edýändigi ylym tarapyndan bireýýäm subut edildi. Hut şol sebäpden-de, häzirki wagtda bütin dünýä şu ýol arkaly ekologiýa howpsuzlygyny döretmäge çalyşýar. Bu babatda birnäçe halkara guramalary hem hereket edýär. Biziň ýurdumyz olaryň birnäçesiniň agzasy we «ýaşyl» diplomatiýany ösdürmek, tebigy gorlary netijeli ulanmagyň hasabyna işjeň ykdysady ösüşi üpjün etmek, dünýä halklarynyň ýaşaýyş-durmuş derejesini has-da ýokarlandyrmak, durnukly ekologiýa ösüşini gazanmak bilen bagly teklipleri yzygiderli hödürleýär, kämil ekologiýa syýasatyny durmuşa geçirýär.

Şeýle bolansoň, bag ekmek ýaly parz işe her bir ynsan döwtalap. Her bir ynsan, bolmanda bir agaç ekip, ýaşyl gurşawa, ekologiýa sagdynlygyna öz şahsy goşandyny goşmak isleýär. Kesewini dürtseň hem pür-pudak ýaýradýan bu toprak bolsa, şeýle dünýä ähmiýetli maksady kalbyna gaplan ynsanyň mähir-muhabbeti, howandarlygy bilen ýene-de rysgal-bereket eçilýär.

Gözel durmuşymyzyň bezegi bolan baglar barada halk arasynda kalba ýakyn jümleler  hem ýörgünlidir. «Bir agaç ekseň ýaşyň bakydyr», «Bagym bar, barym bar», «Bag — ekeniňki, ýap — çekeniňki» ýaly nakyllar we atalar sözleri halkymyzyň bag ekmeklige aýratyn hormat bilen garandygynyň alamatydyr. Bu gadymy döwletli ýörelgelerimiziň esasynda bolsa halkymyzyň zähmetsöýerlik, watansöýüjilik, tebigata aýawly çemeleşmek ýaly asylly häsiýetleriniň jemlenendigini görmek bolýar. Ekilen baga ideg edilip, onuň gowy boý almagyna we kadaly ösmegine aýratyn gözegçilik edilipdir. Bag ekmek bilen halkymyz tebigatyň gözel görke eýe bolmagyna we ekologiýanyň arassa saklanylmagyna jogapkärli çemeleşipdir. Türkmen edebiýatynyň nusgawy we ajaýyp eserlerinde hem bag ekmegiň ähmiýeti çeper suratlandyrylýar. Ýazyjy-şahyrlarymyz özleriniň döredijiliginde bag eken adamyň adynyň baky ýadygär galjakdygyny goşgy setirlerinde joşgunly beýan edýärler.

Bu haýyrly we sogaply işe biziň ýokary okuw mekdebimizde hem ykjam taýýarlyk görüldi. Arkadagly Gahryman Serdarymyzyň kabul eden Kararyny iş ýüzüne geçirmek maksady bilen, şu günler institutymyzyň professor-mugallymlary, talyp ýaşlary okuwdan boş wagtlary agaç nahallary ekiljek meýdanlarda taýýarlyk işlerini geçirdiler. Şonda ýokary okuw mekdebimiziň okuw-tejribe meýdançalaryna, talyplaryň umumy ýaşaýyş jaýlarynyň daş-töweregine, ýanaşyk ýollaryň, ýaplaryň gyralaryna agaç nahallaryny oturdyldy, suw akabalary arassalanyldy.

Berkarar döwletiň täze eýýamynyň Galkynyşy döwründe ýurdumyzy bagy-bossanlyga öwürmek ugrunda uly tagallalary edýän türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Ogulgeldi ANNAÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Patologik fiziologiýa kafedrasynyñ uly mugallymy.