Ýurdumyzda hormatly Prezidentimiz Serdar Berdimuhamedowyň tagallalary bilen sanly bilim ulgamyndaky ösüşleriň tizlik bilen giň gerime eýe bolmagy ýaşlara berilýän bilimiň hilini dünýä derejesine çykarmaga güýçli itergi berýär. Şoňa laýyklykda ähli bilim edaralarynda okatmagyň innowasion usulyndan giňden peýdalanylýar. Bu bolsa talyp ýaşlaryň ýokary hilli bilim almagyna, ylmy-barlag işlerini geçirmegine, täze tehnologiýalardan gowy baş çykarýan ökde hünärmenler bolup ýetişmegine ýardam edýär.

Ýurduň ösüşi, özgerişi, ilkinji nobatda, ýaşlara berilýän bilimiň mazmunynyň ýokarylygyna bagly bolup durýar. Şunda bilimiň binýadyny berkitmekde sanly bilim ulgamynyň ähmiýeti uludyr.Tehnologiýanyň ösýän döwründe onuň bilen aýakdaş gitmek ähli ulgamlarda esasy talap bolup durýar. Şonuň üçin milli bilim ulgamyna ornaşdyrylýan innowasion tehnologiýalar, kompýuterler ýurdumyzyň geljekki eýeleri bolan ýaş nesli döwrebap okatmakda zerur serişdelerdir. Şol serişdelerden ýerlikli peýdalanmak bolsa, bilim edaralarynda zähmet çekýän her bir mugallymyň borjudyr.

“Türkmenistanda sanly bilim ulgamyny ösdürmegiň Konsepsiýasynyň” çäklerinde ähli bilim edaralary sanly bilim ulgamy bilen üpjün edildi. Bilimiň hilini düýpli özgertmekde amala aşyrylan işleriň netijesinde ýokary okuw mekdebimizde talyplara berilýän bilimiň hili ýokarlandy. Talyp ýaşlar hünär ugurlary boýunça gerekli maglumatlary, gollanmalary elektron kitaplar arkaly alýar. Bu bolsa wagty tygşytlamaga hemde maglumat gorunyň baýlaşmagyna itergi berýär. Bilim ulgamynyň sanlylaşdyrylmagy mugallymlaryň geçýän her bir sapagyny täzeçe usulda guramaga itergi berýär.

Hormatly Prezidentimiziň tagallasy bilen, ýaş nesliň ylmy gözleglerini höweslendirmek hem-de goldamak, ylmy başlangyçlaryny ösdürmek, tejribesini ýokarlandyrmak, saýlap alan hünärleri boýunça bilim almagyny we halkara derejeli bäsleşiklere gatnaşmagyny üpjün etmek, ylymda halypa-şägirtlik ýoluny alyp barmak ugrunda döredilýän şertleri muňa mysal hökmünde görkezip bolar. 

Biziň Beki Seýtäkow adyndaky Mugallymçylyk mekdebimizde hem hormatly Prezidentimiziň tabşyryklaryndan ugur alnyp, Berkarar döwletiň täze eýýamynyň Galkynyşy döwründe ösüşlerine goşant goşjak hünärmenleri taýýarlamak işleri üstünlikli alnyp barylýar. Bilim ojagymyzda ulag ulgamyndaky işleri döwrüň talabyna laýyklykda guramak boýunça talyplaryň ylym we bilim derejesi artdyrylýar. Olara okuw sapaklarynda ylmy tejribe we nazaryýet arkaly giňişleýin düşünje berilýär.Şunda sanly ulgamyň mümkinçiliklerinden peýdalanylýar. Bu bolsa talyplaryň ylmyň we tehnologiýanyň iň soňky gazananlary bilen tanyşmagyna, şolar esasynda önümçiligi alyp barmagyna şert döredýär.

Sanly bilim ýaşlaryň kompýuter sowatlylygyna, ylmy işleri alyp barmakda maglumat üpjünçiliginiň baýlaşmagyna giň mümkinçilikleri döretdi. Şol mümkinçilikleriň esasynda talyp ýaşlar diňe bir okuw gollanmalary bilen däl, eýsem, internetiň, bilim portalynyň, electron kitaphanalaryň üsti bilen alýan bilimlerini hasda kämilleşdirýärler. Bu bolsa olaryň hünärlerine ökde bolmagyna, hemmetaraplaýyn düşünje almagyna itergi berýär. Sanly bilim ulgamynda gazanylan netijeler ýaşlaryň onlaýn arkaly bäsleşiklere gatnaşyp, baýrakly orunlara mynasyp bolmagyna ýardam berýär. Bilim ulgamynyň düýpli özgermeginde sanly bilimiň ýaýbaňlandyrylmagy sapaklarymyzyň netijeliligini ýokarlandyrýar.

Berkarar döwletimiziň bedew batly ösüşlerinde ýaşlara uly orun berýän Gahryman Arkadagymyzyň, Arkadagly Gahryman Serdarymyzyň janlary sag, alyp barýan işleri elmydama rowaç bolsun!

Tirkeşbaý BAÝRAMKULYÝEW,
Beki Seýtäkow adyndaky Mugallymçylyk mekdebiniň mugallymy.