Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzyň halk hojalygynyň dürli pudaklarynda düýpli özgertmeler amala aşyrylýar we geljekki uly ösüşleriň binýady tutulýar. Arkadagly Serdarymyzyň parasatly ýolbaşçylygynda ähli pudaklar üçin giň dünýägaraýyşly, çuňňur pikirlenip bilýän, kämil hünärmenleri taýýarlamak giň gerimde dowam edýär. Häzirki wagtda ylmyň we tehnologiýanyň ösmegi bilen, innowasion enjamlar gündelik durmuşymyzda wajyp orna eýe boldy. Şeýle innowasion tehnologiýalary öwrenmek, olardan baş alyp çykmak üçin köp okamaly, şeýle-de dünýä tejribesini düýpli öwrenmeli. Adamzadyň ýaşaýyş-durmuşyny ylym-bilimsiz göz öňüne getirmek asla mümkin däl. Ylym-bilim adamzat üçin bahasyna ýetip bolmajak gymmatlykdyr.

Ýurdumyzyň geljegini, geçmişini, ykdysady ösüşini kesgitleýän esasy görkezijileriň biri hem ylym-bilim pudagy bolup durýar. Şonuň üçin hormatly Prezidentimiz: “Güýçli döwletde ylym esasy orny eýeleýär, diýmek, biz ylmyň iň täze gazananlary bilen aýakdaş gitmelidiris” diýen dürdäne sözleri ýurdumyzyň ýokary okuw mekdeplerinde kämil hünärmenleri taýýarlamakda şygar bolup durýar.

Bilim ulgamyny döwrebaplaşdyrmakda, ýaşlary ylmy gözleglere çekmekde, zehinli ýaşlary ýüze çykarmakda ýurdumyzda geçirilýän zehin bäsleşikleriniň, ders bäsleşikleriniň hem ähmiýeti uludyr. Şeýle bäsleşikleriň netijesinde, Watanymyzyň ýaşlary halkara bäsleşiklerine hem gatnaşmaga mümkinçilik alýarlar. Türkmen ýaşlarynyň halkara derejesinde geçirilýän dürli ders bäsleşiklerinde, olimpiadalarda gazanýan üstünliklerini hem buýsanman bellemezlik mümkin däl. Bu zatlar bolsa Gahryman Arkadagymyzyň döredip berýän şertleriniň miwesidir.

Döwletiň, jemgyýetiň her bir babatdaky ösüşi bilimiň, ylmyň näderejede ösýändigine bagly bolup durýar. Binanyň berkliginiň binýadyň mäkämligine baglydygy bize durmuş hakykatyndan mälimdir. Binýat näçe berk, oýlanyşykly goýulsa, gurýan ymaratymyz hem şonça gaýym hem ajaýyp bolar. Ýaş nesliň bilim binýadynyň berkden tutulmagy hem ýurduň geljekki ösüşiniň aýdyň kepilidir.

Döwlet Baştutanymyz bilim ulgamyny ösdürmeklige, ýurdumyzyň ýaşlaryny ylym bilen meşgullanmaklyga çekmekde hem giň möçberli tagallalary durmuşa geçirýär. Şu nukdaýnazardan, Türkmenistanyň Ylymlar akademiýasynyň işini kämilleşdirmek, ýaş alymlaryň sanyny artdyrmak, olaryň ylmy işleriniň hilini ýokarlandyrmak babatda uly işler alnyp barylýar. Ylym-bilim jemgyýetiň, adamzat ösüşiniň esasy özeni bolup durýar. Şonuň üçin hem berkarar döwletimiziň bu ulgamyny ösdürmek, dünýä ülňülerine laýyk getirmek, alymlaryň ylmy täzeliklerini hem-de oýlap tapyşlaryny önümçilige batyrgaý ornaşdyrmak bilen eziz Diýarymyzy ösüşleriň täze belentliklerine ýetirmek bu günki gün hormatly Prezidentimiziň baş aladalarynyň biri bolup durýar.

«Arkadag Serdarly bagtyýar ýaşlar» ýylynda amala aşyrylýan işleriň ählisi bolsa, Gahryman Arkadagymyzyň we Arkadagly Serdarymyzyň halkymyzyň ýaşaýyş-durmuş şertlerini has-da gowulandyrmak baradaky taýsyz tagallalarynyň netijesidir. Şeýle ajaýyp zamanada talyp ýaşlarymyza okamaga, döretmäge giň mümkinçilikleri açyp berýän türkmen halkynyň Milli Lideriniň hem-de Arkadag Prezidentimiziň janlarynyň sag, ömürleriniň uzak bolmagyny, il-ýurt bähbitli, dünýä ähimýetli alyp barýan işleriniň elmydama rowaç almagyny tüýs ýürekden arzuw edýäris!

Jeýhun GAÝGYSYZOW,
Türkmen oba hojalyk institutynyň Tehniki hyzmatyň guralyşy we tehnologiýasy hünäriniň 102-nji toparçasynyň talyby.