Hormatly Prezidentimiz Serdar Berdimuhamedowyň baştutanlygynda Berkarar döwletiň täze eýýamynyň Galkynyşy döwründe ruhubelent, ýokary ahlakly we bilimli ýaş nesli kemala getirmek döwlet syýasatynyň esasy ugurlarynyň biri bolup durýar. Ýurdumyzy durmuş-ykdysady taýdan ösen döwletleriň derejesine ýetirmekde, döwletimiziň dünýä ýüzünde gazanan abraý-mertebesini has-da pugtalandyrmakda Watanymyzyň ýaşlaryna hem uly orun degişlidir. Bu babatda Arkadagly Serdarymyzyň ýaşlar baradaky döwlet syýasaty olaryň sagdyn nesiller bolup ýetişmekleri üçin has oňaýly şertleri döretmäge we olaryň döredijilik mümkinçiliklerini durmuşa geçirmäge esasy binýat bolup hyzmat edýär.

Mälim bolşy ýaly, «Arkadag Serdarly bagtyýar ýaşlar» ýylynyň ilkinji aýynda Türkmenistanyň Magtymguly adyndaky Ýaşlar guramasynyň nobatdaky VIII gurultaýy geçirildi. Ýaşlar syýasaty. Ýaşlaryň jemgyýetdäki orny. Olaryň başarnyklary we mümkinçilikleri. Berkarar döwletiň täze eýýamynyň Galkynyşy döwründe bu düşünjeler many ýaýrawyny has-da giňeldýär. Munuň sebäbi düşnüklidir: ýurdumyzda ýaşlara uly ynam bildirilip, olar hakyndaky alada döwlet syýasatynyň möhüm ugurlarynyň biri hökmünde garalýar.

Ýurdumyzda ýaş nesillerimiz baradaky alada hem öz mynasyp ornuny tapýar. Hormatly Prezidentimiz Watanymyzyň röwşen geljeginiň eýeleri bolan ýaş nesillerimiz baradaky aladany elmydama üns merkezinde saklaýar. Olara döwrebap bilim, terbiýe bermek, beden we ruhy taýdan sagdyn ýaşlary terbiýeläp ýetişdirmek baradaky aladalar baş wezipeleriň biri bolup durýar. Sebäbi şu günki ýaşlarymyz baradaky alada Garaşsyz, baky Bitarap döwletimiziň röwşen geljeginiň kepili bolup durýar.

Elbetde, belent ynam, döwlet derejesindäki uly alada her bir ýaş oglan-gyzy döwrüň mynasyp nesli bolup ýetişmäge borçly edýär. Ýurdumyzda ýaşlaryň dünýä derejesinde ylym-bilim alyp, kämil hünärmenler bolup ýetişmekleri, halk hojalygynyň dürli pudaklarynda yhlasly zähmet çekip, milli hem-de döwlet maksatnamalaryny durmuşa geçirmäge işjeň gatnaşmaklary üçin döredilýän mümkinçilikler Berkarar döwletiň täze eýýamynyň Galkynyşy döwründe has-da giňeldilýär. Hususan-da, ylym-bilime höwesi artdyrmak ýaşlar baradaky syýasatyň esasy ugurlarynyň biri bolup durýar. Şonuň üçinem okuwa kabul edilýän talyplaryň sany ýylba-ýyldan artýar, ýokary okuw mekdeplerinde täze-täze hünär ugurlary açylýar. Talyp ýaşlarymyz ylmy-döredijilik işine giňden çekilýär. Häzirki wagtda ýurdumyzyň ýokary okuw mekdepleriniň Ylymlar akademiýasy, ylmy-barlag institutlary bilen sazlaşykly işi ýola goýlup, ýaş alymlaryň kemala gelmegini, olaryň ylmy-barlag işlerine döredijilikli çemeleşmegini gazanmak boýunça uly işler alnyp barylýar.

Hormatly Prezidentimiziň özleri hakyndaky ýadawsyz aladasyny ýaşlar her ädimde duýýarlar. Ýaş raýatlaryň ýaşaýyş-durmuş üpjünçiligini gowulandyrmaga, olaryň ruhy-ahlak, medeni, aň-bilim we beden taýdan ösüşini gazanmaga, ata-babalarymyzyň watansöýüjilik, adamkärçilik, agzybirlik, zähmetsöýerlik ýaly nusgalyk ýörelgelerini mynasyp dowam etdirmekleri üçin şert döretmäge gönükdirilen işler ýaşlarymyzyň kalbyny buýsanja besleýär. Şonuň üçinem olar Watana wepalylygyň ajaýyp nusgasyny görkezip, döwletimiziň abraý-mertebesini mundan beýläk-de belende götermekde, hemmetaraplaýyn kämil şahsyýetler bolup ýetişmekde perzentlik yhlasyny gaýgyrmaýarlar.

Hawa, bu gün ýaşlaryň öňünde täze wezipeler durýar. Yhlasly okap, ylym-bilimleri başarnykly ele almak, döredijilik we sport bilen meşgullanyp, ruhy taýdan baý, beden taýdan sagdyn bolup ýetişmek, zähmeti söýmek, özüňde raýat jogapkärçiligini terbiýeläp, şahsy-jemgyýetçilik başlangyçlar bilen çykyş edip durmak, jemgyýetçilik birleşiklerine işjeň gatnaşmak, halallygy we maşgala gymmatlyklaryna ygrarlylygy baş ýörelgäňe öwürmek şol wezipeleriň esasyny düzýär. 

Biz — ýaşlar hormatly Prezidentimiziň ýaşlar baradaky bimöçber aladalaryna jogap edip, öňde duran wezipeleri durmuşa geçirmäge bolan yhlasymyzy gaýgyrmarys. Öz saýlap alan hünärimizi geljekde ak ýürekden ýerine ýetirip, Arkadagly Serdarymyza wepaly bolarys. Ýaş nesilleriň häzirki we geljekki bagtyýar durmuşyny üpjün etmek barada edýän taýsyz tagallalary üçin Gahryman Arkadagymyza, Arkadagly Serdarymyza çäksiz alkyş aýdýarys!

Gaýrat ŞIRALYÝEW,
Türkmenistanyň döwlet energetika institutynyň 4-nji ýyl talyby.