Arkadagly Serdarymyz ýaşlary ylma we döredijilige höweslendirmek bilen bagly işleri hemişe üns merkezinde saklap, Türkmenistanyň Ylymlar akademiýasynyň ylmy-barlag institutlarynyň ýokary okuw mekdepleri bilen hyzmatdaşlyk etmeginiň möhümdigini belleýär. Munuň özi ýaşlary ylma çekmekde möhüm ähmiýete eýedir. Berkarar döwletiň täze eýýamynyň Galkynyşy döwründe hormatly Prezidentimiz Serdar Berdimuhamedowyň parasatly baştutanlygynda ýaş nesillerimiziň ruhy taýdan kämil, beden taýdan sagdyn bolmagy, döwrebap bilim almagy we hünär öwrenmegi döwlet syýasatynyň ileri tutulýan ugurlarynyň biri bolup durýar.

Hormatly Prezidentimiz ýurdumyzyň ýokary, orta hünärment okuw mekdepleriniň, ylmy-barlag institutlarynyň hem-de okuw merkeziniň ylmy binýadyny pugtalandyrmak we döwrebaplaşdyrmak, innowasion tehnologiýalary, nou-haulary, sanly ulgamy, öňdebaryjy dünýä tejribesini ornaşdyrmak boýunça işleri işjeňleşdirmegiň möhümdigine mydama uly üns berýär. Arkadagly Serdarymyz bilim ulgamyny kämilleşdirmegiň çäklerinde onuň ylym we önümçilik bilen baglanyşygyny pugtalandyrmak işini ýola goýmagyň esasy ugurlaryň biri bolup durýandygyny nygtaýar. Şol sebäpli, täze hünärleri girizmek hem-de ýokary derejeli işgärleriň taýýarlanylmagyny üpjün etmek üçin iň gowy dünýä tejribesini içgin öwrenmek hem-de daşary ýurt bilim we ylym merkezleri bilen gatnaşyklary giňeltmek, innowasiýa önümçiliklerini öwrenmek üçin ýurdumyzyň hünärmenlerini daşary ýurtlara ibermek we beýleki döwletlerden hünärmenleri çagyrmak zerurdyr. Şunda ýaşlary ylma çekmäge, ýokary okuw mekdeplerinde ylmy-barlag işlerini ýaýbaňlandyrmaga hem uly ähmiýet berilýär.

Ýaşlary ylma çekmekde talyplaryň ylmy gurnaklarynyň işini ýola goýmak maksadalaýykdyr. Ylmy gurnaklar degişli kafedralaryň garamagynda döredilip, olaryň esasy wezipeleri hökmünde talyplaryň ylmy taýýarlygynyň ýokarlandyrylmagyny, ýaş alymlaryň hünär taýýarlygynyň hiliniň gowulandyrylmagyny, ylmy-döredijilik işjeňligi üçin şertleriň döredilmegini we beýlekileri kesgitlemek mümkin.

Talyplar bu gurnaklaryň işine uly höwes bilen gatnaşýarlar. Ylmy gurnaklara tejribeli mugallymlar ýolbaşçylyk edýärler. Her täze okuw ýylynyň başlanmagy bilen ylmy gurnaklara höwesjeň talyplar çekilýär. Şondan soň gurnagyň ýyllyk iş meýilnamasy tassyklanýar. Meýilnamada gurnagyň mejlisiniň geçirilýän wagty we ýeri, ara alnyp maslahatlaşyljak temalar, çykyş etjek talyplaryň, olaryň ylmy ýol-başçylarynyň atlary görkezilýär.Gurnaklarda talyplar ylmy-amaly maslahatlarda çykyş etmäge, şeýle-de dürli ylmy-döredijilik bäsleşiklerine gatnaşmaga taýýarlyk görýärler. Şunda Türkmenistanyň Ylymlar akademiýasynyň Magtymguly adyndaky Ýaşlar guramasy bilen her ýyl Ylymlar güni mynasybetli geçirýän Türkmenistanyň ýaşlarynyň arasyndaky ylmy işler boýunça bäsleşigi uly ähmiýete eýedir.

Häzirki zaman ýokary bilim ulgamyny kämilleşdirmegiň binýatlyk ýörelgelerine daýanmak bilen, ýurdumyzyň bilim edaralarynda okuw we ylmy-amaly işleriň wajyp wezipelerini iş ýüzünde durmuşa geçirýär. Sazlaşykly ösýän ulag toplumy üçin hünärmenleri taýýarlamakda uly tejribe toplan ýokary okuw mekdeplerinde kämil hünärmenleri taýýarlamak, talyplara döwrebap usullary we tehnologiýalary ulanyp, bilim bermek, ylma ugrukdyrmak işleri Türkmenistanyň Ylymlar akademiýasynyň ylmy-barlag, taslama institutlary hem-de önümçiligi bilen sazlaşykly utgaşdyrmak arkaly amala aşyrylýar. Ýokary okuw mekdeplerinde hormatly Prezidentimiz Serdar Berdimuhamedowyň ylym we bilim ulgamyny ösdürmäge uly üns bermegi netijesinde hünärmenleri taýýarlamagyň täze basgançagyna çykyldy. Bu ýerde döredilen tehniki hem maglumat enjamlar binýady okuw we terbiýeçilik işlerini, netijeli ylmy barlaglary ýokary derejede geçirmäge mümkinçilik berýär.

Guralýan sapaklaryň mazmuny çuňlaşdyryldy, medeniýeti ýokarlandyryldy. Okuw kitaplarynyň gory elektron göterijilerde yzygiderli artdyrylýar. Ykdysadyýetiň talaplaryna, ulag  pudagynda çözülýän wezipelere hem-de dünýäniň ylmy-inženerçilik tejribesine laýyklykda, dürli ugurlar boýunça ýokary derejeli hünärmenler taýýarlanylýar. Häzirki döwürde ýurdumyzda sanly ykdysadyýetiň ornaşdyrylýandygy bilen baglylykda ony kemala getirjek döwrebap tehnologiýalardan baş çykarýan inžener-tehniki işgärleriň döredijilikli işleriniň zerurlygy ýüze çykýar we bu iş olaryň ylmy-döredijilik ukybynyň düýpgöter ýokarlandyrylmagyny talap edýär. Şeýle hem talyplar sanly tehnologiýalary ornaşdyrmak we tehniki-ykdysady görkezijilerini hasaplamak ýaly temalar boýunça diplom taslamalaryny ýerine ýetirýärler. Bu bolsa talyplaryň — geljekki hünärmenleriň hünär derejesini ýokarlandyrmaga, olaryň zerur bolan iş endiklerine eýe bolmagyna ýardam edýär.

Hormatly Prezidentimiz Serdar Berdimuhamedowyň bilim ulgamyny yzygiderli kämilleşdirmek boýunça alyp barýan işjeň syýasaty uly üstünliklere beslenýär. Arkadagly Serdarymyzyň taýsyz tagallalary netijesinde ýurdumyzyň bilim ulgamy häzirki zaman dünýä tejribesiniň we milli däpleriň esaslarynda ösdürilýär. Munuň şeýledigine institutymyzda döredilen şertler, ornaşdyrylan tehniki we sanly serişdeler, Maglumat tehnologiýa merkezi, döwrebap tehnologiýalar bilen enjamlaşdyrylan okuw tejribehanalary, içki lokal tory we «Sanly bilim» portaly, elektron resminama dolanyşygy hem-de internet web-saýty aýdyň şaýatlyk edýär. Bu bolsa okuw-terbiýeçilik işlerini ýokary derejede alyp barmaga, ylmy-barlag işlerinde netijeliligi gazanmaga, sanly bilim ulgamyny üstünlikli durmuşa geçirmäge, dünýä derejesinde ýokary derejeli hünärmenleri taýýarlamaga mümkinçilik döredýär.

Bilim ulgamynda alnyp barylýan oňyn özgertmeleriň netijesinde häzirki wagtda talyp deň-duşlarymyz ýurdumyzyň çäklerinde we dünýäde geçirilýän halkara ýaryşlaryna gatnaşyp, baýrakly orunlary eýeleýärler. Halkymyzyň ýagty geljegi ugrunda edilýän aladalar bizde ýokary jogapkärçilik duýgusyny oýarýar. Biziň ýüregimizde Watana bolan söýgi, geljege bolan ynam, döretmäge höwes bar. Biz jemgyýetde mynasyp ornuňy tapmak, dünýä ýüzündäki deň-duşlarymyz bilen bäsleşmäge ukyply nesiller bolmak üçin döredilip berilýän mümkinçiliklerden peýdalanýarys.

Ýurdumyzyň ösüşlerine mynasyp goşant goşmak türkmen ýaşlarynyň her biriniň mukaddes borjudyr. Ýaşlyk möwsüminde hünär-kär saýlamak, ukyp-başarnyklarymyzy açyp görkezmek bilen, aýdyň geljegi nazarlaýarys. Çünki biz ― Arkadag Serdarly bagtyýar ýaşlar! Nesip bolsa, «Arkadag Serdarly bagtyýar ýaşlar ýyly» diýlip atlandyrylan 2023-nji ýyly adyna mynasyp üstünlikler bilen bezäris! Goý, halkyny bagtly geljege alyp barýan türkmen halkynyň Milli Lideriniň hem-de Arkadag Prezidentimiziň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Anahan ATANAZAROWA,
Türkmenistanyň döwlet energetika institutynyň 3-nji ýyl talyby.