Her ýylyň 1-nji oktýabrynda Garaşsyz, Bitarap Diýarymyzda Ýaşulularyň halkara güni  dabaraly bellenilýär. Bu däbiň bellenilip geçilmegi-de, gadymy däplerimize ygrarlydygymyzy, ýaşululara hormat sarpa goýmak, olaryň mertebesini belende götermek ýaly ýörelgelerimizi täze mazmun bilen baýlaşdyrýandygymyzy alamatlandyrýar. BMG-niň Baş Assambleýasy tarapyndan ýaşuly adamlaryň ýagdaýyna jemgyýetçilik ünsüni çekmek maksady bilen kabul edilen ýörite resminama laýyklykda tutuş dünýä ýüzünde her ýyl bellenip geçilýän bu baýramçylyk milli senenamamyzda mynasyp orun eýeleýär. Bilşimiz ýaly, 1990-njy ýylyň 14-nji dekabrynda BMG-niň Baş Assambleýasy her ýylyň 1-nji oktýabryny Ýaşulularyň halkara güni diýip yglan etdi. Soňky ýyllarda bu baýram Türkmenistanda hem  döwlet derejesinde bellenilip geçilýär.

Gözbaşyny gadymdan alyp gelýän ýaşulularymyza hormat goýmak däbi hormatly Prezidentimiziň ynsanperwer baştutanlygynda häzirki döwürde hem döwlet derejesinde dowam etdirilýär.Garaşsyzlyk ýyllarynda her bir döwletli tutumlarda ilki bilen ýaşululara sala salmak, maslahat geçirmek, pensiýalaryň ýyl-ýyldan ýokarlandyrylyp durulmagy, galy berse-de il içinde ýokary adamkärçiligi bilen görelde bolýan ýaşuly neslimize «Türkmenistanyň hormatly il ýaşulysy» diýen mertebeli atlaryň dakylmagy watandaşlarymyzyň başyny göge ýetirýär.

Bagtyýarlyk döwrümiziň eşretli hözirini görýän il sylagly ýaşulylarymyz agtyk-çowluklarynyň arasynda sagdynlygyň, paýhaslylygyň janlymekdebi bolup bagtyýar durmuşda ýaşap ýörler. Bäş müň ýyldan köpräk taryhy bolan türkmen halky — ata-babalarymyzy hormatlap, pederlerimiziň döwletli ýörelgelerine eýerip ýaşaýar. Türkmen halky öz ýaşulusyny sylaýar, ýaşula hormat goýmak, kiçini sylamak duýgusy onuň kalbynda hemişelik ýaşaýar.  Bu günki gün milli Liderimiziň ruhy gymmatlyklara, mukaddesliklere goýýan sylag-sarpasynyň netijesinde ýaşulularyň mertebesi has-da belent derejä ýetdi.

Ata Watanymyzy söýmegi, ynsan mertebesini belent tutmagy, pederlerimize sarpa goýmagy ündeýän, ak ýürekli, zähmet söýer, belent ahlakly ýaşulylarymyz nesillerimiziň her biriniň durmuşynda uly mekdepdir.

Her ýylyň 1-nji oktýabrynda Birleşen milletler gurmasy tarapyndan ýaşulularyň hukuklaryny goramaga,  jemgyýetdäki tutýan ornuny pugtalandyrmaga bagyşlanan dürli festiwallar, halkara ylmy-amaly maslahatlar  we  syýasy ýygnaklar geçirilýär. Biziň ýurdumyzda hem BMG-niň bu asylly ýörelgelerinden ugur alnyp, Halkara ýaşulular güni mynasybetli dürli çäreler geçirilýär.  Şu gün hem  ýurdumyzyň ähli sebitlerinde ýaşuşularymyzyň şanly baýramy bolan  halkara ýaşulular güni diýseň uly şatlyk-şowhunly dabaralara beslenilip bellenilip geçilýär. Bu baýram hormatly Prezidentimiziň türkmen ýaşulularyna bolan çäksiz hormat-sarpasynyň nyşanyny, ýurdumyzyň Birleşen milletler guramasy bilen oňyn hyzmatdaşlygyna ygrarlygynyň baý mazmunyny  alamatlandyryp.   Türkmenistanyň Mejlisi tarapyndan 2009-njy ýylyň 1-nji iýulyndan güýje girizilen Türkmenistanyň Zähmet Kodeksiniň 81-nji maddasynyň birinji böleginde ýerleşdirilen şanly seneleriň arasyndan orun aldy. Hut şu nukdaýnazar bolsa, Halkara ýaşulular gününiň biziň ýurdumyzda ilkinji gezek 2009-njy ýylyň 1-nji oktýabrynda bellenilip geçilendigini aýan edýär. Şondan bäri Birleşen milletler guramasynyň düzümine girýän  beýleki döwletler ýaly biziň ýurdumyz hem her ýylyň 1-nji oktýabrynda Halkara ýaşulular gününi giňden dabaralandyrýar. Her ýyl bu şanly sene mynasybetli, milli teleýaýlymyň Watan habarlar gepleşigi türkmen ýaşulularynyň ählisine hormatly Prezidentimiziň gutlagyny ýetirýär.  Munuň özi bolsa, biziň ýurdumyzyň hemişelik Bitaraplyk syýatynyň çäklerinde Birleşen milletler guramasy bilen alyp barýan oňyn hyzmatdaşlygyna ygrarlydygyny alamatlandyrýar.

Ýaşuly nesliň wekilleriniň sar pasynyň aýratyn belent derejede tutulmagy her bir işde, her bir meselede olara sala salynmagy türkmen halkynyň özboluşly, ajaýyp hem ynsanperwer häsiýetleriniň biridir. Şeýle häsiýetleriň manysyna mähriban Arkadagymyzyň «Älem içre at gezer», «Döwlet guşy» romanlaryny we beýleki eserlerini okanyňda, has çuň göz ýetirýärsiň.

Ýaşulular jemgyýetiň paýhashazynasydyr. Bu hazynany aýawly saklaýan, onuň gadyr-gymmatyna belent sarpa goýýan Gahryman Arkadagymyza çäksiz alkyş aýdýarys.

Möwlam HAÝTGULYÝEW,
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentliginiň   “Lebapawtoulag” önümçilik birleşiginiň hünärmeni.