Berkarar döwletiň täze eýýamynyň Galkynyşy döwründe Gahryman Arkadagymyzyň we Arkadagly Gahryman Serdarymyzyň ägirt uly tagallalarynyň netijesinde türkmen halkynyň saglygyny goramaga, hil taýdan ýokary netijeleri gazanmaga gönükdirilen täze häzirki zaman saglygy goraýyş ulgamy emele geldi. Bu ulgam halkyň saglygyny goramakda geçirilýän işleriň toplumlaýyndygy, ulgamlaýyn häsiýete eýedigi bilen halkara bilermenleriniň ünsüni özüne çekýär.

Munuň özi bolsa saglygy goraýyşda sagdyn adamlaryň sagatlygyny saklamagyň, keselleriň öňüni almagyň, sagdyn durmuş ýörelgesine eýermegiň öňe sürülýändigini, saglygy goraýşyň ähli derejelerinde gurulýan saglygy goraýyş edaralarynyň iň öňdebaryjy lukmançylyk enjamlary we serişdeleri bilen üpjün edilen täze, häzirki zaman binalarynda ýerleşdirilýändigini, saglygy goraýyş kömeginiň ähli raýatlara deň derejede elýeterdigini görkezýär.

Pederlerimizden miras galan «Sag başym — soltan başym», «Baýlygyň sakasy — saglyk», «Saglyk adamlaryň başyndaky altyn täçdir», «Süňňüň sagatlygy — iň uly nygmat», «Akyldan artyk baýlyk ýok, saglykdan gymmat zat ýok», «Saglyk — baýlyk» ýaly ajaýyp nakyllardyr atalar sözlerinden mälim bolşy ýaly, asyrlarboýy sagdyn durmuş ýörelgesine eýermekligiň berk kadalaryny kemala getiripdirler. Şol kadalardan hem görnüşi ýaly, saglygymyzy goramak, ilki bilen, her birimiziň özümize bagly bolup durýar.

Ýurduň saglygy goraýşyny tapgyrlaýyn ösdürmegiň esasy ugurlarynyň biri hem lukmançylyk hyzmatlaryny berjaý etmegiň halkara standartlaryna laýyk gelmegine gönükdirilen öňdebaryjy lukmançylyk enjamlary bilen üpjün edilen iň häzirki zaman keselhanalaryň döredilmegi bolup durýar. Şu ýyllaryň dowamynda halkara hyzmatdaşlygy – Ýewropanyň lukmançylyk merkezleri bilen hyzmatdaşlyk, giň tejribe alyşmak işjeň ösdürildi. Bilelikdäki ylmy gözleglere, ylmy maslahatlary, sergileri we seminarlary guramaga uly üns berildi. Ýurdumyzda gurlan we gurulýan häzirki zaman hassahanalary hem-de bejeriş-anyklaýyş merkezleri dünýä ülňülerine laýyk hyzmatlar bilen üpjün edýär.

Gahryman Arkadagymyzyň we Arkadagly Gahryman Serdarymyzyň göreldeleri bilen sagdyn durmuş ýörelgesiniň yzygiderli wagyz edilmegi, köpçülikleýin bedenterbiýe-sagaldyş hereketiniň we sportuň ösdürilmegi ilatyň saglygyny goramaga, beden we ruhy taýdan sagdyn nesilleri kemala getirmäge ýardam edýär. Ýurdumyzda arassaçylygy saklamak, howanyň zyýanly bölejiklerinden goranmak, ýiti respirator kesellerinden ägä bolmak, iýmitlenmek meseleleri, çilimkeşlige garşy göreş ýaly çäreler yzygiderli geçirilýär we ýerli hünärmenler tarapyndan ilatyň arasynda giňden wagyz edilýär.

Hormatly Prezidentimiziň: «Saglygy goraýyş ulgamy ýurdumyzyň milli howpsuzlygyny üpjün etmekde örän möhüm ugurlaryň biri bolmak bilen, ýokary derejede ösen medeniýetli döwletiň ilkinji nobatda ileri tutýan meselesidir» diýip belleýşi ýaly, saglygy goraýyş we derman senagatyny ösdürmekligiň baş maksady her bir raýatyň saglygyny goramakdan we pugtalandyrmakdan, adamlaryň ömrüniň sagdyn dowamlylygyny artdyrmakdan ybarat.

Il saglygy — ýurt baýlygyna deňelýän ýurdumyzda saglyk ulgamyndaky bu belent sepgitler her bir türkmen raýatyny begendirýär, buýsandyrýar. Türkmenistan döwletimiziň halkara derejesindäki at-abraýyny has-da beýgeldýär. Sagdynlygyň hem ruhubelentligiň ýurdy bolan Türkmenistan döwletimizde mydama sagdynlyk hem agzybirlik höküm sürsün! Goý, halkyny bagtly geljege alyp barýan türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn! 

Mähri DAŇATAROWA,
Myrat Garryýew adyndaky Türkmenistanyň Döwlet lukmançylyk uniwersitetiniň Lukmançylyk fizikasy we informatikasy kafedrasynyň mugallymy.