Ýurdumyzyň paýtagty Aşgabat şäheri güngünden gözelleşýär, özüniň milli binagärlik äheňindäki häzirki zaman ymaratlary bilen kalbyňa şatlyk çaýýar. Şäheriň keşbi tebigatyň görki bilen özara sazlaşygy emele getirýär. Hormatly Prezidentimiziň taýsyz tagallalary netijesinde, paýtagtymyz Aşgabat tanalmaz derejede özgerip, esasy syýasy, ykdysady we işewürligiň halkara merkezine öwrüldi. Deňi-taýy bolmadyk binalardyr-ymaratlaryň, köp sanly muzeýleriň, sergi köşkleriniň we teatrlaryň utgaşykly sazlaşygyny emele getirýän Aşgabat myhmanlaryň ünsüni özüne çekýär.

Hormatly Prezidentimiziň ýolbaşçylygynda 2023-nji ýylyň – «Arkadag Serdarly bagtyýar ýaşlar» ýylymyz hem uly üstünliklere, rowaçlyklara beslenýär. «Türkmenistanyň at gazanan arhitektory» diýen hormatly adyň eýesi bolan Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowyň ýurdumyzyň şäher gurluşygyny dünýä ülüňülerine laýyk derejede ösdürmekde, paýtagtymyzy mundan beýläk hem belent sepgitlere ýetirmekde alyp barýan döwlet syýasatynyň netijeleri görenleri haýran edýär.

Ak şäherimiziň gözellik dünýäsi, milli öwüşginli ak mermer lybasy lowurdap duran türkmen paýtagtynyň binagärlik keşbine özboluşly öwüşgin berýär. Günsaýyn özgerýän baş şäherimiziň dünýä nusgalyk keşbini ähli amatlyklary, her biriniň özboluşly gözelligi bolan ýaşaýyş jaýlary, ýaşlara bilim berýän orta we ýokary okuw mekdepleri, çagalar baglary, halkara ülňülerde gurulýan giň we häzirki zaman şaýollary, ak mermerli binalar, köpçülikleýin bedenterbiýe-sagaldyş we sport toplumlary, medeni maksatly binalar, lukmançylyk merkezleri we suw çüwdürimleri, täze ekilen müňlerçe düýp baglary we ajaýyp gülleri bilen göwünleri galkyndyrýan seýilgähler, ýaşyl bossanlyklar muňa aýdyň mysaldyr.

Bu gün paýtagtymyz halkara derejeli duşuşyklaryň, ylmy maslahatlaryň, sergileriň geçirilýän ýerine öwrüldi. Her ýyl dürli ugurlar boýunça halkara derejesinde geçirilýän maslahatlara, forumlara, sergilere dünýä döwletleriniň onlarçasynyň wekilleri işjeň gatnaşýarlar. Biziň döwletimiz özüniň daşary syýasatynda hemişe hoşniýetli goňşuçylyga, birek-birege sarpa goýmaga, deň  hukuklylyga daýanýar. Paýtagtymyzyň halkara syýasy işjeňlik derejesi biziň dost-doganlyk, parahatçylyk, asudalyk ýörelgämize şaýat bolýar. Dünýä ýüzünde parahatçylyk dörediji merkez hökmünde tanalýan ak mermerli Aşgabadyň beýik binalary, ýaşaýyş jaý toplumlary, ajaýyp şaýollary, belent desgalary, gözel  seýilgähleri türkmen halkynyň agzybirligini hem-de abadan durmuşyny, ata-babalarymyzyň şöhratly ýol-ýörelgelerine wepalylygyny, röwşen geljege tarap okgunly hereketini alamatlandyrýar. Dürli öwüşginli gülzarlyklar paýtagtymyzyň we onuň ýaşaýjylarynyň açyk kalbyny, myhman söýerligini beýan edýär.

Berkarar döwletiň täze eýýamynyň Galkynyşy döwründe mähriban halkymyz ýurdumyzyň ähli ýerlerinde bolşy ýaly, paýtagtymyzda hem ençeme döwrebap binalaryň açylyş dabaralarynyň şaýady bolýarlar. Täze gurlan «Türkmenbaşy», «Senagat» paýdarlar täjirçilik banklary, Halk Maslahatynyň Diwany, Kabul ediş merkezi, «Arkadag» myhmanhanasy, «Laçyn» seýilgähi, Söwda we dynç alyş işewürlik merkezlerinden hem-de döwrebap ýaşaýyş jaýlaryndan ybarat bolan «Aşgabat» binalar toplumy — bularyň ählisini bir ýere jemläp, göz öňüne getirsek, ol tutuş bir täsin şäherçäni emele getirer. Türkmen döwleti bu gün şäherleri gurýar, bagtyýar durmuşy berkarar edýär. Şeýle hem, ähli şertler döredilen bu döwrebap desgalarda bagtyýar türkmenistanlylaryň ýüzlerçesiniň joşgunly zähmet çekýändigini, ýaşaýandygyny göz öňüne getireniňde hormatly Arkadagymyzyň beýik işlerine bolan buýsanjyň goşalanýar.

Goý, paýtagtymyz Aşgabat hemişe gözelligiň, ýagty umytlaryň, ýagty maksatlaryň nusgasy bolsun! Ýurdumyzy belent özgertmeleri we döwletli tutumlary bilen ösüşleriň belentliklerine tarap alyp barýan hem-de Gündogaryň merjen şäheriniň binagärlik-gurluşyk keşbiniň has-da gözelleşmeginde yzygyderli aladalary edýän Gahryman Arkadagymyzyň hem-de Arkadagly Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Dawut TAGANGYLYJOW, 
Türkmenistanyň döwlet energetika institutynyň 2-nji ýyl talyby.