Internet ulgamy Bütindünýä tehniki infrastrukturasynyň maglumatlaryny saklaýan we arabaglanyşyk gurnamak üçin  halkara birleşdiriji tor hökmünde ýaşaýyş-durmuş ugurlaryna berk we üstünlikli ornaşdy. Internet ulgamyny has janlandyrýan onlaýn söwda, onlaýn banking, onlaýn aragatnaşyk hyzmatlary, onlaýn kinoteatrlar, internet gözleg motory, wideo konferensiýa programmalary internet çeşmesiniň işjeň ulanylýan ugurlarydyr.

Gahryman Arkadagymyzyň umumadamzat bähbitlerinden ugur alýan daşary syýasaty netijesinde «Türkmenaragatnaşyk» agentligi tarapyndan aragatnaşyk ulgamynyň gerimini giňeltmek we hyzmatlaryny artdyrmak maksady bilen halkara hyzmatdaşlyklar ýola goýulýar.

Ýakynda, ykdysady hyzmatdaşlyk boýunça hökümetara türkmen-rus toparynyň ýolbaşçylarynyň duşuşyklarynyň çäklerinde, «Türkmenaragatnaşyk» agentliginiň we Russiýa Federasiýasynyň «Yandex» kompaniýasynyň ýolbaşçylarynyň arasynda ikitaraplaýyn hyzmatdaşlyk boýunça gepleşikler geçirildi.

Duşuşygyň dowamynda «Yandex gözleg» ulgamyna türkmen dilini girizmek, «Yandex karta» ulgamyna Türkmenistanyň işlenen kartasyny girizmek hem-de birnäçe berilýän hyzmatlara integrirlemek («Yandex taxi», Emeli aň, Emeli aňly taksi hyzmaty, Emeli aňly eltip bermek hyzmaty we ş.m.) we «Bulut tehnologiýalary» maglumat gorlary boýunça hyzmatdaşlygyň ugurlaryny giňelmek we ösdürmek babatynda özara gyzyklanma bildirilýändigi beýan edildi.

«Yandex gözleg» ulgamyna türkmen diliniň girizilmegi Internet torunyň giň toplumynda baý türkmen dilini ýaýbaňlandyrar. Mekdep okuwçylary, talyplar we ylmy işgärler bu saýtyň düzümindäki beýan edilen maglumatlary we täzelikleri ene dilimizde web sahypalaryň, suratlaryň we ses faýllarynyň üsti bilen özleşdirip bilerler.

Türkmenistanyň işlenen kartasynyň türkmen dilinde «Yandex karta» ulgamyna girizilmegi bolsa, ýurdumyzyň täze binagärlik desgalaryny we  gözel ýerlerini ene dilimizde mahabatlandyrmak bilen, türkmen halky we daşary ýurtly işewürlerdir, myhmanlara ugrukdyryjy   ýol görkeziji kartasy bolup hyzmat eder.

Dünýäniň ägirt uly Internet torunyň gözleg ulgamyna türkmen diliniň girizilmegi sanly metbugat giňişliginiň gerimini has-da artdyrar.  

Aýgözel ANNAMÄMMEDOWA, 
«Türkmenaragatnaşyk» agentliginiň «Türkmentelekom» elektrik aragatnaşyk kompaniýasynyň hünärmeni.