Sebitde we dünýäde parahatçylygy, halkara deňhukuklylygy saklamak, daşary ýurt maýa goýumlary üçin amatly şertleri döretmek, ykdysady hyzmatdaşlygy pugtalandyrmak, ulag-kommunikasiýa düzümlerini döretmek, medeniýet, bilim, ylym, ynsanperwerlik, sport we syýahatçylyk babatda gatnaşyklary işjeňleşdirmek boýunça alnyp barlan dünýä nusgalyk işler Türkmenistanyň halkara hukuk derejesiniň gymmatyny artdyrdy we taglymatlaryny dünýä ýaýmaga mümkinçilikleri döretdi.

Bu günki gün hemişelik Bitarap Türkmenistanyň Birleşen Milletler Guramasy we beýleki halkara guramalary bilen alyp barýan işjeň gatnaşyklary onuň dünýä üçin iň ygtybarly ýurt hökmündäki abraýyny has-da artdyrdy. Ýurdumyz özüniň amatly geoykdysady we geosyýasy kuwwatyny umumadamzat bähbitlerini durmuşa geçirmäge, ösüşi pugtalandyrmaga gönükdirýär. Bu bolsa hyzmatdaş ýurtlaryň arasynda bir-birege ynanyşmak ýörelgeleriniň çuňlaşmagyna, netijede, parahatçylygyň üpjün edilmegine uly itergi berýär.

Berkarar ýurdumyzyň parahatçylyk söýüjilikli daşary syýasat ugrunyň esasynda amal edilýän tutumlar diňe bir milli bähbitleri göz öňünde tutmak däl-de, eýsem, dünýä bileleşiginiň uzakmöhletleýin maksatlaryna, halkara durnuklylygynyň we howpsuzlygynyň üpjün edilmeginiň oňyn, deňeçer çemeleşmeleriniň talaplaryna, BMG-niň Tertipnamasynyň kadalarynyň berjaý edilmegine laýyk gelýändigini görkezdi.

Hormatly Prezidentimiziň belent başlangyçlary, BMG-niň goldawy bilen Türkmenistan dostlukly döwletler bilen ähli ugurlarda hyzmatdaşlygy we gatnaşyklary berkidýär. Bu babatda milli derejede ulag düzümini döretmegiň, ösdürmegiň we döwrebaplaşdyrmagyň giň möçberli maksatnamasyny durmuşa geçirýär, awtomobil ýollarynyň, ýol aýrytlarynyň, köprüleriň gurluşygy çalt depginlerde alnyp barylýar, halkara derejeli taslamalar durmuşa geçirilýär. Munuň şeýledigine Gazagystan — Türkmenistan — Eýran halkara demir ýolunyň, Aşgabadyň, Türkmenabadyň Halkara howa menzilleriniň açylmagy, Türkmenbaşy şäherinde Halkara deňiz porty, Aşgabat — Türkmenabat ýokary tizlikli awtomobil ýolunyň Aşgabat — Türkmenabat bölegi, Amyderýanyň üstünden geçýän sebitdäki iri awtomobil we demir ýol köprüleri doly şaýatlyk edýär. Türkmenistan — Owganystan — Täjigistan demir ýolunyň birinji tapgyrynyň, Serhetabat – Turgundy demir ýol geçelgesiniň ulanmaga berilmegi hem şeýle iri taslamalaryň giň gerimini görkezer. Bu ýol Aziýa halkara ulag geçelgesiniň bir bölegi bolup, ol taslama gatnaşýan ýurtlaryň çäginden geçip, Hytaýyň köp şahaly demir ýol ulgamyna we onuň üsti bilen Aziýa-Ýuwaş umman sebitiniň bazarlaryna çykar. 

Döwletimiziň baky Bitaraplyk ýörelgelerine ygrarlydygyny belleýän, türkmen döwletiniň berkararlygy we mizemezligi, nesilleriň bagtyýar we erkana durmuşy hakda taýsyz tagallalary edýän hormatly Prezidentimiziň türkmen halkynyň agzybir, asuda ýaşamagy ugrunda alyp barýan tutumly işleri rowaçlyklara beslensin! Goý, Gahryman Arkadagymyzyň ömri uzak, belent başy aman bolsun!

Kadyr BAÝRAMOW,
Türkmenistanyň Inžener-tehniki we ulag kommunikasiýalary institutynyň mugallymy.