Gözelligiň aňyrsyna-bärsine göz ýetmeýän giňişligi özgerdiji güýjüne akyl ýetirmegiň çägi ýok. Ol özüniň täsin zynaty bilen ynsan kalbyny, hyjuwy bilen dünýäsini joşdurýar. Gözellik şahyrlara ylham, bagşydyr aýdymçylara täze owaz, daýhana halal zähmetinden beslenen ekinzarlygy döretmek, işçä hem gurmak bagtyny eçilýär. Şeýle nusgalyk gözelligiň eýesi bolan Türkmenistanyň hemişelik Bitaraplygynyň Garaşsyz Diýarymyzyň her bir ynsanynda täze we ajaýyp garaýşy döredendigine diňe bir halkymyz däl, eýsem, dünýä halklary-da guwanýar. Döwrebap ýaşamak, täzeçe oýlanyp-pikirlenmek duýgusy hemişelik Bitaraplygymyzyň köňlümize, ömrümize eçilen bagtyýarlygydyr.

Şeýle bagtyýarlygy her ädimde duýup, bagy-bossanlyga beslenen, eli çeper gelin-gyzlaryň täsin nagyşlaryny ýadyňa salýan ak ýollardan barýarkaň, köňlüňdäki ak arzuwlaryň islendik wagtda hasyl boljakdygyna berk ynanýarsyň. Bu hut şeýle. Dörediji, ýiti zehiniň eýesi bolan islendik raýat, goý, uly ýa kiçi bolsun, parhy ýok, öz zehin başarnygy, ezberligi bilen öňe saýlanýandyr. Şahsyýetiň şeýle erkinligine, döredijilikli ýaşaýşyna ak ýol açan Gahryman Arkadagymyza kalbyň alkyşly aýdymdan, owazdyr mukamdan dolýar.

Halkymyzy şeýle belent joşguna, ruhubelentlige atarýan ilkinji gözbaş, çeşme bolsa, döwlet Baştutanymyzyň ýurdumyzyň çar künjünde gurdurýan medeni-durmuş, ykdysady-senagat häsiýetli desgalary bolup durýar. Çünki olarda her bir ynsan özüniň bagtyýarlygyny, eşretli durmuşynyň hözirini görüp ýaşaýar. «Il-günümiz abadan, ýurdumyz asuda, Asmanymyz arassa, dünýämiz parahat bolsun!» diýip edilýän ýagşy doga-dilegler, umyt-arzuwlar halkyň ýüreginden çykyp, mähriban topraga, eziz Watana ornaýar-da alyslara tarap ýol salýar. Şol ak ýoly bolsa, Arkadagly Gahryman Serdarymyz dünýäniň çar künjüne çekip, baky parahatçylygyň, dost-doganlygyň, ynsanperwerligiň belent aýdymyna öwürdi.

«Watan diňe halky bilen Watandyr! Döwlet diňe halky bilen döwletdir!» diýen baş ýörelgäniň neneňsi belentdigine we ýurdy özgerdiji keramatly güýçdügine islendik adam doly göz ýetirýändir. Çünki Garaşsyz ýurdumyzda amala aşyrylýan her bir iş, gurulýan binalardyr desgalar diňe halkymyzyň bagtyýar ýaşaýşyna hyzmat edýär. Şeýlelikde, maddy gözelligiň eýesi bolan halkymyz özüniň ruhy gözelligine, içki kämilligine, döredijilik güýjüne hem täze badalga alýar. Şondan galkynyp, döredýär, gurýar. Özüniň ygtybarly daýanjynyň — dünýäde adyllyga, halallyga, halklaryň umumy bähbidine aýdyň ýollary açýan hemişelik Bitaraplyk syýasatyna guwanýar we onuň dünýä halklaryny birleşdirýän keramatly güýjüne berk ynam bilen zähmet çekýär.

Ýurdumyzyň hemişelik Bitaraplygy mukaddes Garaşsyzlygymyzyň ebedi we mizemez binýadyny goýmak bilen belent maksatlary çalt, gysga wagtda amala aşyrmaga, ýurdumyzyň ösüşine, halkymyzyň eşretli ýaşaýşyna giň mümkinçilikleri döredýär. BMG-niň belent binasynyň öňünde, dünýä ýurtlarynyň döwlet baýdaklary bilen birlikde dünýäde ilkinji hemişelik Bitarap döwlet diýlip ykrar edilen Garaşsyz, hemişelik Bitarap Türkmenistan Watanymyzyň ýaşyl Tugy hem parahatçylykly, dost-doganlykly we ynsanperwerlikli ýalkymyny saçyp dur. Hemişelik Bitaraplygymyzyň nur-ýalkymy bolup parlaýan ýaşyl Baýdagymyza bu günki günde dünýä halklary parahatçylygyň, dost-doganlygyň nyşany hökmünde garaýar.

Ak mermerli Aşgabadymyzda BMG-niň Merkezi Aziýa üçin Öňüni alyş diplomatiýasy boýunça sebit merkeziniň hereket etmegi Türkmenistan bilen Birleşen Milletler Guramasynyň berk jebisliginden nusga. Şeýle bilelikdäki gatnaşyklar, amala aşyrylýan belent işler sebitde parahatçylygyň binýadyny goýmakda uly ähmiýete eýedir. Sebäbi ýokary hyzmatdaşlykda geçirilýän bilelikdäki çäreler, maslahatlar, geňeşler, söhbetdeşlikler uly netije berýär. Sebitde we dünýäde parahatçylygyň, hoşniýetli gatnaşyklaryň has-da berkemegine öz täsirini ýetirýän hemişelik Bitarap Türkmenistanyň at-abraýy täze belentliklere göterilýär.

Goý, halkyny bagtly geljege alyp barýan türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Şahida REÝINBAÝEWA,
Beki Seýtäkow adyndaky Mugallymçylyk mekdebiniň 2-nji ýyl talyby.