Daşary syýasatda ulag, energetika we suw diplomatiýasy boýunça netijeli gepleşikleriň başyny başlap, ýurdumyz özüniň tebigy baýlyklaryny, geosyýasy we geoykdysady mümkinçiliklerini sebit hem-de dünýä ähmiýetli iri taslamalary amala aşyrmak bilen, bütin adamzadyň hyzmatynda goýýar. Bu gün Türkmenistan sebitde parahatçylyk dörediji we ylalaşdyryjy döwlet hökmündäki ornuny dürli ugurlar boýunça berkidip, iri ulag-logistik merkeze öwrülýär.

Türkmenistanyň daşary syýasat strategiýasyna laýyklykda üstünlikli durmuşa geçirilýän ulag diplomatiýasynyň baş maksady asyrlaryň jümmüşinden gözbaş alyp, ýurtlaryňdyr halklaryň hyzmatdaşlyk köprüsine öwrülen gadymy Beýik Ýüpek ýoluny häzirki zaman ulag ugurlary boýunça gaýtadan dikeltmäge hem-de ýurdumyzyň halkara gatnaşyklardaky abraýyny has-da belende götermäge gönükdirilendir. Bitarap ýurdumyz ulag ulgamy boýunça halkara syýasatyň netijeli gurallaryny kemala getirmek ugrundaky başlangyçlary öňe sürmek bilen, olar boýunça netijeli çözgütleriň işlenip taýýarlanylmagyna işjeň gatnaşýar. Şunda milli Liderimiz ähli ýurtlar bilen birlikde, geljekki nesilleriň hem bähbitleriniň nazara alynmalydygyny yzygiderli nygtaýar. Munuň özi, ilkinji nobatda, Birleşen Milletler Guramasy tarapyndan yglan edilen 2030-njy ýyla çenli döwür üçin Gün tertibinde kesgitlenen Durnukly ösüş maksatlaryny amala aşyrmak boýunça meýillere doly laýyk gelýär. Şoňa görä-de, dünýä ykdysadyýetiniň çalt özgerýän şertlerinde ulaglaryň ähli görnüşleri boýunça netijeli halkara hyzmatdaşlygy berkitmek arkaly üçünji müňýyllygyň Durnukly ösüş maksatlaryna ýetmegi çaltlandyrmak meselesi ýurdumyzyň daşary syýasy işiniň hem ileri tutulýan ugurlarynyň hatarynda kesgitlenýär.

Ýurdumyzyň geografik taýdan amatly çäklerde ýerleşmegi — Demirgazyk — Günorta, Günbatar — Gündogar ugurlary boýunça geçelgeleriň çatrygynda möhüm halka bolup hyzmat etmegi döwrebap ulag düzümlerini kemala getirmäge hem-de ony bütin adamzadyň bähbitlerine gönükdirmäge mümkinçilik berýär. Häzirki zaman dünýäsinde bir ugur boýunça ýükleriň eltilýän ýerine çenli ulaglaryň dürli görnüşlerini — awtomobil, demir ýol, deňiz, howa ulaglaryny ulanmak arkaly daşalmagyny aňladýan «multimodal» diýen adalga işjeň ulanylyp başlandy. Gadymyýetde Beýik Ýüpek ýolunyň ýüreginde ýerleşip, Gündogar bilen Günbataryň siwilizasiýalaryny baglanyşdyran ýurdumyzda hem ulaglaryň dürli görnüşleri boýunça gatnaşyklary ösdürmek üçin ähli zerur şertler bar. Şeýle şertler ulaglaryň iň amatly görnüşleri boýunça ýurdumyzyň ykdysady kuwwatyny artdyrmaga hemde dünýä ykdysadyýetiniň ösüşine üstünlikli goşulyşmaga doly esas berýär.

Häzirki wagtda Türkmenistanda ulag ulgamy boýunça diňe bir sebit däl, eýsem,dünýä ähmiýetli iri taslamalar durmuşa geçirilýär. Gazagystan — Türkmenistan — Eýran, Kerki — Ymamnazar — Akina, Serhetabat — Turgundy ulag geçelgeleri, Türkmenbaşynyň Halkara deňiz porty, Owganystan — Türkmenistan— Azerbaýjan — Gruziýa — Türkiýe ugry boýunça üstaşyr ulag taslamasy (“Lapis Lazuli”) Beýik Ýüpek ýoluny häzirki zaman görnüşde gaýtadan dikeltmekde möhüm ähmiýetli işlerdir

Hormatly Prezidentimiz ulag-üstaşyr hyzmatdaşlyk boýunça halkara hukuk gurallary bolup hyzmat etjek möhüm başlangyçlary öňe sürüp, olaryň BMG-niň Baş Assambleýasynyň degişli Kararnamalary bilen berkidilmeginiň möhümdigini nygtap, iş ýüzünde anyk hereketleri amala aşyrýar. Durnukly ulag ulgamy boýunça BMG-niň Baş Assambleýasynyň dürli ýyllarda geçirilen mejlislerinde kabul edilen Kararnamalaryň üçüsi biziň ýurdumyzyň başlangyjy bilen başy başlanan işleriň aýdyň mysalydyr.

Türkmenistanyň bu ugurdaky halkara işini yzygiderli dowam etdirip, BMG-niň Baş Assambleýasynyň 75-nji mejlisinde hem täze teklipleri öňe sürendigini aýtmak gerek. Hususan-da, ýurdumyz adatdan daşary ýagdaýlar döwründe durnukly halkara ulag gatnawyny üpjün etmek meselelerine köptaraplaýyn garamak başlangyjy bilen çykyş edip, degişli Kararnamanyň taslamasyny işläp taýýarlady. Bularyň ählisi bolsa dünýä ykdysadyýetiniň ösüşine görnetin täsirini ýetirýän ulag ulgamynda köptaraplaýyn hyzmatdaşlygyň täze çemeleşmelerini kemala getirmekde hukuk binýady bolup hyzmat edýär.

Möwlam HAÝTGULYÝEW,
         Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentliginiň   “Lebapawtoulag” önümçilik birleşiginiň hünärmeni.

Abuna tassyklaýyş kody: 32469