Häzirki döwürde ylym esasy ugurlaryň biri bolup, oňa ösüşleriň binýady hökmünde garalýar. Şonuň üçin hem ylym-bilimli kämil hünärmenleri ýetişdirmek bu günki günüň esasy wezipesidir. Ýaş hünärmenleriň ylymly, giň dünýägaraýyşly bolmagy ösüşiň täze mümkinçiliklerini kemala getirýär. Şoňa görä-de Arkadag Serdarly bagtyýar ýaşlar ýylymyzda ylym-bilime uly üns berilýär, ýaş hünärmenleriň ylymly bolmagy üçin ähli mümkinçilikler döredilýär. Berkarar döwletiň täze eýýamynyň Galkynyşy döwrümizde Diýarymyzy ählitaraplaýyn ösdürmek, sanly ykdysadyýeti durmuşa ornaşdyrmak boýunça uly işler alnyp barylýar.Ýaş nesiller — döwrümiziň daýanjy, güýç-kuwwaty hem ýagty geljege bolan ynanjy. Hut şoňa görä-de, ýaşlaryň öňünde uly jogapkärçilik bar. Ol halkyň ynamyny ödemek. Ýaş nesliň bu uly ynamy ödemegi üçin bolsa, Berkarar döwletiň täze eýýamynyň Galkynyşy döwründe ähli mümkinçilikler döredildi. Bu günki günde ýaş nesilleri terbiýelemek babatda gözbaşyny has gadymy döwürlerden alyp gaýdýan, müňýyllyklaryň dowamynda toplanan milli durmuş tejribelerimize daýanylýar. Munuň şeýledigini 1-nji sentýabrda Arkadag şäheriniň Ruhyýet köşgünde türkmen halkynyň Milli Lideri Gahryman Arkadagymyzyň geçen umumy sapagyndan hem görmek bolýar.

Eziz Diýarymyzda ýaşlaryň bilimli bolup ýetişmeklerine, milli terbiýesine aýratyn üns berilýär. Esasan hem olaryň giň dünýägaraýyşly bolmaklary, kämil hünärmenler bolup ýetişmekleri baş maksat hökmünde goýulýar. Şonuň üçin hem orta hem-de ýokary okuw mekdeplerinde ýaşlarda ylym-bilime höwes döredilýär. Bu babatda olaryň köp okamalydygy, hünär öwrenmelidigi barada wagyz işleri geçirilýär.

Diýmek, ýaşlar — Watan daýanjy, ýaşlar — bagtly geljegiň kepili. Türkmenistanyň täze saýlanan Prezidenti Serdar Gurbangulyýewiç Berdimuhamedow ýokary döwlet wezipesine dalaşgärlik maksatnamasynda: «Türkmenistan ýaş nesillere aýratyn üns berilýän ýurtdur. Häzirki döwürde ýurdumyzyň ilatynyň esasy bölegi Garaşsyzlyk ýyllarynda kemala gelen ýaş nesillerdir. Bu nesil eziz Watanymyzyň geljegini gurujylardyr. Ýurdumyzyň ykdysady kuwwatyny has artdyrmak, intellektual ösüşi üpjün etmek, syýasy-jemgyýetçilik durmuşyny kämilleşdirmek, esasan, häzirki nesilleriň hemmetaraplaýyn taýýarlygyna baglydyr» diýip bellemek bilen, ýaşlary beýik geljegi gurmaga çagyrýar.

Häzirki wagtda ýurdumyzda ýaşlary ylymly, giň dünýägaraýyşly, häzirki zaman tehnologiýalardan, ösen innowasiýalardan ökdelik bilen baş alyp çykýan hünärmenler edip ýetişdirmekde uly işler amala aşyrylýar. Ata Watanymyzyň geljegi hasaplanýan ýaş nesilleriň jemgyýetde we durmuşda öz mynasyp ornuny tapmagy, ýurdumyzyň göreldeli ogul-gyzlary bolup ýetişmekleri baradaky döwlet syýasaty milli kanunçylygymyzda 2013-nji ýylda kabul edilen «Ýaşlar barada döwlet syýasaty hakyndaky» Türkmenistanyň Kanunynda berkidilýär. Bu Kanunyň kabul edilmegi ýurtda ýaşlaryň döwlet tarapyndan goldanylmagy we ösdürilmegi babatda uly itergi berdi. Şeýlelikde, ýurtda ýaşlaryň hukuklarynyň we döwlet goldawynyň kanunçylyk binýady tutuldy. Şeýle hem «Ýaşlaryň zähmete bolan hukugynyň döwlet kepillikleri hakynda», «Bilim hakynda» Türkmenistanyň Kanunlarynda ýaşlaryň bilim almaga, zähmete bolan hukuklary düzgünleşdirilýär.

Ýaşlar baradaky döwlet syýasatyny üstünlikli amala aşyrmak, hemmetaraplaýyn kämil nesilleri terbiýeläp ýetişdirmek maksady bilen, 2021-nji ýylyň 8-nji ýanwarynda Türkmenistanyň Ministrler Kabinetiniň mejlisinde Gahryman Arkadagymyz tarapyndan Türkmenistanda ýaşlar baradaky döwlet syýasatynyň 2021 — 2025-nji ýyllar üçin Döwlet maksatnamasy hem-de şol maksatnamany amala aşyrmak boýunça ýerine ýetirilmeli çäreleriň Meýilnamasy tassyklanyldy.«Arkadag Serdarly bagtyýar ýaşlar ýyly» şygary bilen geçýän şu ýylyň iýun aýynda ýurdumyzyň kanunçylygy hem-de halkara şertnamalary esasynda halkara ýaşlar hyzmatdaşlygyny ösdürmek maksadyndan ugur alnyp, Türkmenistanyň Prezidentiniň Karary bilen tassyklanylan Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasynyň kabul edilmegi bu ugurdaky ýene bir uly ähmiýetli waka boldy.

Goý, merdana ata-babalarymyzyň asylly däpleriniň we ýörelgeleriniň has döwrebaplaşdyrylan, kämilleşdirilen ýoluny dowam edýän, ýaşlar üçin ähli mümkinçilikleri döredýän Gahryman Arkadagymyzyň, Arkadagly Serdarymyzyň janlary sag, ömürleri uzak bolsun!

Muhammetdurdy ÝAZBERDIÝEW,
Türkmenistanyň Inžener-tehniki we ulag kommunikasiýalary institutynyň Sanly tehnologiýalar we kiberhowpsuzlyk fakultetiniň 5-nji ýyl talyby.