Baky berkarar Watanymyz häzirki eşretli döwrümizde hemmetaraplaýyn düýpli özgerýän we dünýäniň ösüşine oňyn täsir edýän ýurt hökmünde tanalýar.  Şeýle asuda, abadan ýurduň bagtyýar geljeginiň ýaş nesle baglydygyndan ugur alnyp, ýurdumyzyň döwlet we jemgyýetçilik  durmuşynyň  ähli ugurlaryny çalt depginler bilen ösdürmek, ýokary bilimli, döredijilikli, häzirkizaman ylmy-tehniki ösüşiniň gazananlaryndan baş çykarýan  ýaş nesli kemala getirmek maksady bilen, döwrebap bilim özgertmeleri üstünlikli durmuşa geçirilýär, bilim  ulgamyna täze tehnologiýalar, ylmyň gazananlary giňden ornaşdyrylýar. Şäherdir obalarda häzirkizaman enjamlary bilen üpjün edilen döwrebap çagalar baglarynyň, orta, orta hünär we ýokary okuw mekdepleriniň gurulmagy, täze ýokary okuw mekdepleriniň, täze hünärleriň açylmagy, dünýäniň ösen ýurtlary, şeýle-de halkara guramalar bilen bilim, sport ulgamlarynda ygtybarly hyzmatdaşlygyň ýola goýulmagy Arkadagly Serdarymyzyň amala aşyrýan il-ýurt bähbitli beýik işleriniň rowaçlanýandygyny aýdyň görkezýär.r. Ýurdumyzyň röwşen geljeginiň eýeleri bolan ýaşlaryň tebigy ukyp-başarnyklaryny ýüze çykarmak, goldamak, olaryň ylymly-bilimli, hünärli, giň dünýägaraýyşly kämil şahsyýetler bolup ýetişmeklerini gazanmak hem ýaşlar baradaky döwlet syýasatynyň aýrylmaz bölegidir. Bagtyýar ýaşlaryň buýsanjyny artdyrýan şeýle döwletli tutumlaryň degişli kanunlara, maksatnamalardyr konsepsiýalara daýanmagy alnyp barylýan işleriň netijeliligini ýokarlandyrýar. «Ýaşlar barada döwlet syýasaty hakynda» Türkmenistanyň Kanunynyň rejelenen görnüşi ýaşlarymyzyň kämil şahsyýetler hökmünde kemala gelmeginde döwlet goldawynyň hukuk binýadyny has-da berkitdi.

Berkarar döwletimiziň täze eýýamynyň Galkynyşy döwründe Arkadagly Serdarymyzyň alyp barýan beýik işlerinde eziz watandaşlarymyzyň aýdyň geljeginiň aladasy aýdyň görünýär. Bu günki günde ylym-bilim, saglygy goraýyş, medeniýet, sport ulgamlarynda, durmuş üpjünçiliginde ýetilen sepgitler bimöçberdir. Hormatly Prezidentimiziň parasatly baştutanlygynda ýurdumyzy ykdysady-medeni taýdan gülledip ösdürmek bilen baglanyşykly öňde duran belent wezipeleriň çäklerinde ýaşlar syýasatyna hem uly üns berilýär. «Biz ýaşlara eziz Watanymyzyň geljegini gurujylar hökmünde garaýarys» diýip, nygtaýan Arkadagly Serdarymyz ata Watanymyzyň geljegi bolan ýaşlaryň okamagy, döretmegi, kämil bilim almagy ugrunda netijeli işleri bilen göwünleri galkyndyrýar.

Ýurdumyzyň geljegini gurujylar hökmünde ýaşlara bildirilýän ýokary ynamyň oňyn netijeleri Arkadag Serdarly bagtyýar ýaşlar ýylynyň häsiýetli aýratynlygyna öwrülýär. Munuň özi döwletimiz tarapyndan özlerine bildirilýän belent ynamy gündelik durmuşynyň mizemez ýörelgesine öwrüp, «Arkadagly Serdarymyzyň ýoly bilen öňe, öňe, diňe öňe, jan Watanym Türkmenistan!» diýen şygary baýdak edinýän ýaşlaryň syýasy-ykdysady, medeni işlere işjeň gatnaşmaklarynda, Diýarymyzy dünýäniň okgunly ösýän kuwwatly döwletine öwürmek, halkyň durmuş hal-ýagdaýyny yzygiderli ýokarlandyrmak maksadyna gönükdirilen taryhy tutumlaryň rowaçlyklara beslenmegindäki saldamly goşantlarynda mynasyp beýanyny tapýar. Şeýle döwletli tutumlar Arkadagly Serdarymyzyň ýolbaşçylygynda Berkarar döwletiň täze eýýamynyň Galkynyşy döwründe dowamat-dowam bolýar. «Ýaşlar barada döwlet syýasaty hakynda» Türkmenistanyň Kanunynyň rejelenen görnüşi, «Türkmenistanda ýaşlar baradaky döwlet syýasatynyň 2021 — 2025-nji ýyllar üçin Döwlet maksatnamasy» bu durmuş hakykatyny doly tassyklaýar. Ýaş nesilleri watansöýüjiligiň we ynsanperwerligiň belent ruhunda terbiýelemek bu resminamalaryň baş maksady bolup, olarda şeýle döwletli maksada ýetmegiň anyk ugurlary kesgitlenildi. Munuň özi ýaşlarymyzyň ukyp-başarnyklaryny ýüze çykarmaga, olaryň ylym-bilime, döredijilikli zähmete bolan höweslerini artdyrmaga netijeli itergi berýär. Bu bolsa döwletimiziň gülläp ösüşiniň bilimli, ylymly, hünärlerden ussatlyk bilen baş çykarýan ýaş nesiller bilen berk baglydygyny ýene bir ýola tassyklaýar. 

Watan diňe halky bilen Watandyr! Mähriban halkymyzyň bagtyýarlygy we abadançylygy, jemgyýetimiziň sagdynlygy, nesillerimiziň beden we ruhy taýdan sazlaşykly ösüşi bilen berk baglanyşykly özgertmeleri üstünlikli durmuşa geçirmäge döredýän mümkinçilikleri üçin hormatly milli Liderimize we Arkadagly Serdarymyza welaýatymyzyň ähli ýaşlarynyň adyndan köp sagbolsun aýdýarys. Biz Siziň ýol-ýörelgäňize eýermek bilen uly buýsanç, ruhubelentlik bilen okarys mähriban Arkadagly Serdarymyz!

Halmuhammet AGABAÝEW,
Türkmenistanyň Inžener-tehniki we ulag kommunikasiýalary institutynuň Sanly tehnologiýalar we kiberhowpsuzlyk fakultetiniň 4-nji ýyl talyby.