Halkymyzyň arzuwdyr isleglerinden ugur alnyp yglan edilen hem-de «Arkadag Serdarly bagtyýar ýaşlar ýyly» diýlip atlandyrylan üstümizdäki ýylyň baş maksady ýurdumyzyň ykdysady, syýasy, medeni durmuşyna ýaşlaryň doly derejede gatnaşmagy üçin giň mümkinçilikleri döretmekden, ýaş nesilleri watançylyk, ynsanperwerlik, zähmetsöýerlik ruhunda terbiýelemekden, olaryň jemgyýetçilik-syýasy işjeňligini, şahsy başlangyçlaryny goldamakdan we höweslendirmekden ybaratdyr.

Islendik ugurda döwlet derejeli işi kämil ýerine ýetirmek, öňde goýlan uly maksada ýetmek üçin berk kanunçylyk-hukuk binýady zerur. Şu jähetden alanymyzda, ýurdumyzda döwrüň ruhuna we talaplaryna laýyklykda, ýaşlar syýasatynyň dürli ulgamlaryny öz içine alýan kanunçylyk ulgamy yzygiderli kämilleşdirilýär. Çünki häzirki wagtda Watanymyzyň geljegi, onuň gülläp ösmeginiň daýanjy bolan ýaşlara uly üns berilýär. Ýaş nesil baradaky alada eziz Watanymyzyň ertirki güni baradaky aladadyr. Muňa geçen ýylyň 1-nji sentýabrynda Türkmenistanyň Magtymguly adyndaky Ýaşlar guramasynyň VII gurultaýynda Arkadagly Serdarymyzyň tassyklap bermeginde «Ýaşlar barada döwlet syýasaty hakynda» Türkmenistanyň Kanunynyň rejelenen görnüşiniň kabul edilmegi aýdyň mysal bolsa gerek.

Aýratyn bellemeli zat, ýaşlar syýasaty Berkarar döwletiň täze eýýamynyň Galkynyşy döwründe diňe öz ýurdumyzyň çäginde däl-de, Türkmenistanyň alyp barýan hoşniýetli daşary syýasatynda hem halkara ýaşlar, bilim hyzmatdaşlyklary görnüşinde barha işjeň ilerledilýär. Bu babatda ýaşlar guramalarynyň ugry boýunça halkara hyzmatdaşlygyň ösdürilmegine uly üns berlip, ýakynda tassyklanan «Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasy» bellenmäge mynasypdyr. Sebäbi döwletimiziň kanunçylygy we ýurdumyzyň halkara şertnamalary esasynda taýýarlanan bu Strategiýa türkmenistanly ýaşlaryň beýleki ýurtlaryň ýaşlary bilen dürli ulgamlarda hyzmatdaşlyk gatnaşyklarynyň ösdürilmegine gönükdirilendir.

Bilim we ylym ulgamy, şol sanda Türkmenistanyň hem-de daşary ýurtlaryň ugurdaş edaralarynyň arasynda hyzmatdaşlygy ýola goýmak, ýurdumyzyň ýokary okuw mekdepleriniň binýadynda iri daşary ýurt ýokary okuw mekdepleriniň şahamçalaryny açmak mümkinçiliklerini öwrenmek Strategiýada esasy ugurlar hökmünde kesgitlenipdir. Şonuň bilen birlikde, ýaşlaryň ylmy diplomatiýa gatnaşmaklaryny goldamak, halkara ylmy forumlary geçirmek, ýaş alymlaryň bilelikdäki işlerini ýola goýmak ýaly çäreler göz öňünde tutulypdyr. Bu Strategiýada medeniýet we syýahatçylyk ugry boýunça, maglumat-kommunikasiýa ulgamynda ýaşlar hyzmatdaşlygyny işjeňleşdirmek hem meýilleşdirilendir. Şeýlelikde, ýaş zehinleri ýüze çykarmak we goldamak maksady bilen, maksatnamanyň işlenip taýýarlanylmagy, ýaşlaryň medeni hyzmatdaşlygy, ýaş žurnalistleriň arasynda tejribe alyşmak we beýleki çäreler bu işlere ýardam berer.

Görnüşi ýaly, Arkadag Serdarly bagtyýar ýaşlar ýylynda döwlet ýaşlar syýasaty kanunçylyk-hukuk binýady babatda-da, alnyp barylýan anyk işler babatda hem işjeň ilerledilýär. Bu babatda Milli Liderimiz: «Biz ýaşlarymyzy ýurdumyzyň geljegi hasaplaýarys. Biziň ösüşlerimiz, ata Watanymyzyň berkararlygy, ýurdumyzyň asudalygy, il-günümiziň abadançylygy ýaşlarymyza baglydyr. Men türkmen ýaşlarynyň bu belent ynamy ödejekdiklerine berk ynanýaryn» diýmek bilen, ýaşlara uly ynam bildirýär. Bu beýik ynam ýaşlary täze belent maksatlara galkyndyrýar, uly jogapkärçilik we borç duýgularyny döredýär. Şeýle beýik işleriň gözbaşynda duran Arkadagly Serdarymyzyň we Gahryman Arkadagymyzyň janlary sag, ömürleri uzak bolsun, alyp barýan il-ýurt bähbitli, döwlet ähmiýetli işleri rowaçlyklara beslensin!

Solmaz GURDOWA,
Lebap welaýatynyň Saýat etrabynyň 53-nji orta mekdebiniň taryh mugallymy.