Ýurdumyzda giňden bellenilen Saglygy goraýyş we derman senagaty işgärleriniň güni mynasybetli 10 — 12-nji oktýabrda paýtagtymyzdaky Söwda-senagat edarasynyň sergiler zalynda «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi we onuň çäklerinde ylmy maslahat geçirildi. Sergä dünýäniň 20-den gowrak ýurdundan lukmançylygyň dürli ulgamlaryndaky wekiller gatnaşdylar. Garaşsyz, hemişelik Bitarap Watanymyzda hormatly Prezidentimiziň parasatly baştutanlygynda bedenterbiýäni we sporty ösdürmek, jemgyýetimizde sagdyn durmuş ýörelgelerini berkarar etmek, bu ugurda halkara hyzmatdaşlygy pugtalandyrmak ugrunda uly tagallalar edilýär. 10 — 12-nji oktýabr aralygynda paýtagtymyzda geçirilen «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi hem-de onuň çäklerindäki ylmy maslahat hem bu hakykatyň dabaralanmasyna öwrüldi. Ýöriteleşdirilen forumyň çäklerinde Türkmenistanyň Bedenterbiýe we sport baradaky döwlet komitetiniň bölüminde ýurdumyzda halkymyzyň saglygyny pugtalandyrmak, ildeşlerimizi bedenterbiýe we sport bilen meşgullanmaga çekmek, sagdyn durmuş ýörelgelerini ornaşdyrmak boýunça alnyp barylýan köpugurly işler beýanyny tapdy. Döwlet Baştutanymyzyň tagallalary esasynda Türkmenistanyň milli ýygyndy toparlarynyň türgenlerini sportuň dürli görnüşleri boýunça iri halkara ýaryşlara taýýarlamak hem-de olaryň ussatlyk derejesini ýokarlandyrmak, ýokary netijeleri gazanmaklary üçin zerur şertleri döretmek boýunça toplumlaýyn işler durmuşa geçirilýär.

Arkadagly Gahryman Serdarymyzyň baştutanlygynda eziz Diýarymyzda milli bilim ulgamyny kämilleşdirmek, giň gözýetimli, innowasion tehnologiýalary dolandyrmaga ukyply ýaşlary terbiýeläp ýetişdirmek boýunça uly tagallalar edilýär. «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi hem-de ylmy maslahat hem bu hakykaty nobatdaky gezek tassyklady. Ýagşygeldi Kakaýew adyndaky Halkara nebit we gaz uniwersitetiniň pawilýonynda professor-mugallymlarymyzyň hem-de talyplarymyzyň gazanan üstünlikleri, ylmy açyşlary, taslamalary tanyşdyrylýar.

Ýurdumyzda ýaş nesliň beden we ruhy taýdan sazlaşykly ösmegi, döwrebap bilim almagy, terbiýelenmegi, wagtlaryny peýdaly geçirmegi üçin ähli şertleri döretmek milli bilim ulgamyny kämilleşdirmegiň esasy şertleridir. Ýagşygeldi Kakaýew adyndaky halkara nebit we gaz uniwersitetinde bilim alýan talyp ýaşlary ylma çekmek üçin ýörite gurnaklaryň ençemesi hereket edýär. Ýokary okuw mekdebimizde okuw kitaplaryny, gollanmalary taýýarlamaga, bilim bermek işine täze tehnologiýalary, okuw-tehniki enjamlary ornaşdyrmaga, bu ugurda iň gowy dünýä tejribesinden peýdalanmaga we halkara hyzmatdaşlygy giňeltmäge uly ähmiýet berilýär. Talyplarymyz ylym-bilim olimpiadalary, taslama bäsleşikleri bilen birlikde, sport ýaryşlarynda üstünlikli çykyş edýärler. Dünýäniň 20-den gowrak döwletinden wekilleriň gatnaşmagynda guralan ýöriteleşdirilen halkara sergide öz üstünliklerimizi tanyşdyrmak biziň üçin uly hormatdyr.

Bedenterbiýäni we sporty ösdürmek bilen baglanyşykly ajaýyp zamanamyzda amala aşyrylan işler hem göwnüňi galkyndyrýar. Muňa diňe şu ýylyň dowamynda türkmen türgenleriniň dürli derejedäki halkara ýaryşlarda 400-den gowrak medal gazanmagyny mysal getirmek ýeterlikdir.

Hormatly Prezidentimiziň «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergä we ylmy maslahata iberen Gutlagynda: «Bedenterbiýe we sport jemgyýetiň sagdynlygyny üpjün edýän, halklary we döwletleri jebisleşdirýän güýçdür» diýip belleýşi ýaly, bu ugurda gysga döwürde durmuşa geçirilen işler datly miwelerini-de eçilýär. Bu halkara sergi we ylmy maslahat geljekki ösüşlerimizi üpjün etmekde täze mümkinçilikleriň meýdanyna öwrüldi. Ýurdumyzy sagdynlygyň hem ruhubelentligiň, ylym-bilimiň mekanyna öwren Gahryman Arkadagymyzyň, hormatly Prezidentimiziň janlary sag, ömürleri uzak bolsun!

Bähbit MYRADOW,
Ýagşygeldi Kakaýew adyndaky Halkara nebit we gaz uniwersitetiniň 1-nji ýyl talyby .