Berkarar döwletiň täze eýýamynyň Galkynyşy döwrüniň uly üstünliklere beslenen ýyllaryndan biri bolan 2023-nji ýyl bagtyýar ýaşlaryň durmuşynda, hakydamyzda we aňymyzda müdimilik orun alýar. Biz bu ýylyň ilkinji günlerinden başlap ýaş nesliň şu günki we geljekki ykbaly bilen baglanyşykly göwün galkyndyryjy wakalaryň birnäçesiniň şaýady bolduk. Eziz Watanymyzyň geljegini gurujylar ha-saplanýan ýaşlar üçin döwlet derejesinde edilýän aladalaryň ählisiniň giň gerime, uly ähmiýete eýedigini, uzak geljegi nazarlaýandygyny hem nygtamak gerek. Geçen ýylyň tamamlanyp barýan günlerinde Arkadagly Gahryman Serdarymyz türkmen ýaşlary üçin ajaýyp sowgat taýýarlady. Döwlet Baştutanymyzyň çuňňur oýlanyşykly hem-de ýylyň jemlerine bagyşlanan “Ýaşlar - Watanyň daýanjy” atly kitaby çapdan çykdy. Bu kitap ýylyň özboluşly jemlenmesine öwrülip, onda ýurdumyzyň ýaşlarynyň gazanan üstünlikleri giňişleýin beýan edilýär.

Hormatly Prezidentimiz Serdar Berdimuhamedow Täze ýyl baýramçylygynyň öň ýanyndaky günlerde Ministrler Kabinetiniň Başlygynyň obasenagat toplumynyň ýolbaşçylarynyň hem-de welaýatlaryň häkimleriniň gatnaşmagynda sanly ulgam arkaly geçiren iş maslahatynyň başynda oňa gatnaşyjylara we ähli watandaşlarymyza ýüzlenip, bagtyýar ýaşlar ýylynda hem zehinli ýaşlarymyzyň ata Watanymyzyň ösüşine mynasyp goşant goşýandyklaryny belledi. Ýaşlaryň gazanýan üstünlikleri bizi örän guwandyrýar. Ýakynda “Ýaşlar - Watanyň daýanjy” atly kitabym çapdan çykdy. Onda ýurdumyzyň ýaşlarynyň häzirki döwürde ýeten sepgitleriniň, gazanan üstünlikleriniň jemi jemlenýär diýip, döwlet Baştutanymyz sözüni dowam etdi hem-de bu kitaby ýaşlar ýylynyň jemlerine bagyşlandygyny nygtady.

Döwlet Baştutanymyzyň täze kitaby baýramçylyk dabaralarynyň giň gerim alyp, şatlyk-şowhuna beslenýän günlerinde halkymyza toý sowgady boldy. Bu eser ýurdumyzyň ýaşlarynyň durmuşyna, ykbalyna we ähli ulgamlarda gazanan üstünliklerine bagyşlanandyr. Geçen ýyl bolsa, hakykatdan-da, döwletimiz we halkymyz üçin üstünlikli, rysgal-bereketli ýyl boldy. Bu döwürde jemgyýetimiziň ähli ugurlarynda, hususan-da, syýasy, ykdysady, durmuş, sport, ylym-bilim, medeniýet we sungat hem-de beýleki ulgamlarda döredilen giň mümkinçilikleriň netijesinde uly ösüşler gazanyldy. Gazanylan ýokary netijelerde, eýelenen belent sepgitlerde işbaşarjaňlygy, ukyby, zehini bilen tapawutlanan Watanyň daýanjy bolan ýaşlar az däldir.

Hormatly Prezidentimiz Serdar Berdimuhamedowyň türkmen halkyna we dünýä jemgyýetçiligine sowgat eden “Ýaşlar - Watanyň daýanjy” atly kitabynyň Arkadag Serdarly bagtyýar ýaşlar ýylynda çap edilmegi möhüm ähmiýete eýedir. Çünki bu eserde ýaş nesliň wekilleriniň durmuşymyzda we jemgyýetimizde tutýan ornuna mynasyp baha berilýär, geçen ýyldaky ýaşlaryň gazanan ýokary netijeleri açylyp görkezilýär. Hormatly Prezidentimiziň çuň many-mazmunly bu täze kitaby ýaşlary watançylyk ruhunda terbiýelemekde gymmatly gollanma bolar.

Geçen Arkadag Serdarly bagtyýar ýaşlar ýylynda türkmen halkynyň Milli Lideriniň başlangyçlary bilen Arkadag şäheriniň birinji tapgyrynyň gurlup ulanylmaga berilmegi, bu şäheriň ýaşlaryň şäheri hökmünde ykrar edilmegi döwletli döwranymyzyň iň buýsançly wakasy hökmünde göwnümizi galkyndyrdy. Gurluşyk işlerinde ýaşlaryň teklipleriniň diňlenilmegi we olaryň ylmy taslama işleriniň bu “akylly” şäherde gurulýan binalarda ornaşdyrylmagy ýaşlaryň zehinine, güýjüne aýratyn bil baglanylýandygyna şaýatlyk edýär. Ýylyň şygaryndan gözbaş alýan bu özgertmeleriň ählisi zähmeti baýdak edinýän ýaş nesli belent maksatlara ýetmäge, röwşen geljegi gurmaga ruhlandyrýar. Ýurdumyzyň täze taryhy döwründe uly öwrülişikleri başdan geçirýän beýik ykbally türkmen ýaşlary mundan beýläk-de mähriban Watanymyzy gülledip ösdürmäge, bütin dünýädäki abraý-mertebesini belende galdyrmaga öz mynasyp goşantlaryny goşarlar.

Ýeňişgeldi MOTTYÝEW,
Türkmenistanyň Içeri işler ministrliginiň Institutynyň Içerki goşunlar fakultetiniň Harby tehnikalar we awtotaýýarlygy kafedrasynyň uly mugallymy, maýor.