Berkarar döwletiň bagtyýarlyk döwründe Gahryman Arkadagymyzyň hem-de Arkadagly Gahryman Serdarymyzyň taýsyz tagallalary bilen Köpetdagyň eteginde gözel künjekde gurlan Arkadag şäheri ýurdumyzyň häzirki gülläp ösüşiniň ajaýyp nyşany, adam hakynda edilýän aladanyň nobatdaky subutnamasy bolup durýar. Dürli maksatly desgalaryň we binalaryň ençemesini özünde jemleýän bu şäheriň birinji tapgyrynyň bary-ýogy dört ýyldan gowrak wagtyň içinde gurulmagynyň özi haýran galdyryjy wakadyr, şol bir wagtda-da buýsandyryjy we guwandyryjy hakykatdyr. Bu “akylly” şäher konsepsiýasynyň iň häzirki zaman innowasion şähergurluşyk taslamasynyň ýaş türkmen gurluşykçylary we hünärmenleri tarapyndan ýerine ýetirilmegi buýsanjyňy goşalandyrýar. Munuň özi ýurdumyzda amala aşyrylýan iri taslamalarda ýaşlaryň mümkinçiliklerine uly ynam bildirilýändigine şaýatlyk edýär.

Arkadag şäheriniň gurluşygynda ýaşaýjylar üçin iň amatly, rahat we howpsuz şertleri üpjün etmäge gönükdirilen öňdebaryjy kommunikasiýa we maglumat tehnologiýalarynyň peýdalanylandygyny göz öňünde tutsak, onda munuň özi soňky ýyllarda ýurdumyzda zehinli, giň gözýetimli, sowatly we ukyply türkmenistanlylaryň täze ýaş nesliniň dörändiginden habar berýär. Bu nesil döwür bilen aýakdaş gitmäge, ylmyň iň täze gazananlaryny özleşdirmäge, ykdysady pudaklary ýokary tehnologiýalar bilen dolandyrmaga ukyply nesildir. Munuň özi döwrüň talabydyr, kuwwatly döwlet bolmagyň, öňe okgunly hereket etmegiň esasy şertidir. Arkadag şäheri halkymyzyň şu günki we geljekki nesilleriniň bagtyýar durmuşynyň bähbidine gönükdirilen innowasion taslamadyr. Şonuň üçin Arkadag şäherine “ýaşlar şäheri” diýilmegi kanunalaýyk we tebigy ýagdaýdyr.

Bu adalga ýaşlaryň diňe şäheri gurmaga gatnaşandyklary bilen bagly däldir, ol ýaşlaryň şähere siňdiren zähmeti, ukyby, zehini bilen çäklenmeýär. Arkadag şäherinde ýaşajak, zähmet çekjek, bilim aljak, hünär öwrenjek - ösüp-örňejek ilat, esasan, ýaşlardyr. Arkadag şäheri geljegiň şäheridir. Geljek bolsa, elbetde, ýaşlardyr. Ýurdumyzyň geljegini häzirki ýaşlar, onda-da sagdyn ruhly, berk bedenli, watansöýüji, bilimli ýaşlar kesgitleýär. Geljekki nesil hakynda alada ertirki güne iň ygtybarly garaýyşdyr, akylly-başly ýoldur. Şonuň üçin Arkadag şäheri, sözüň göni we doly manysynda, hakykatdan hem ýaşlar şäheridir. Ýaş türkmenistanlylar şeýle belent ada, derejä we hormata mynasyp bolandyklaryna, bu ajaýyp şäheri gurmaga gatnaşandyklaryna çäksiz buýsanýarlar hem-de ynama wepaly bolmagy özlerine mukaddes borç hasaplaýarlar.

Mälim bolşy ýaly, Gahryman Arkadagymyzyň giň möçberli başlangyçlaryny mynasyp dowam etdirýän hormatly Prezidentimiziň baştutanlygynda Berkarar döwletiň täze eýýamynyň Galkynyşy döwri beýik ösüşleriň we belent maksatlara tarap ynamly gadamlaryň döwri hökmünde häzirki zaman türkmen taryhyna altyn harplar bilen ýazylýar. Türkmenistanda täze şäherler, obalar, etraplar, ýaşaýyş jaý toplumlary gurulýar. Bu gurluşyklar döwrüň talaplaryna laýyk alnyp barylmak bilen, olarda, esasan, ýaşlar zähmet çekýärler. Ýaşlaryň iş tejribeleri döwrebap durmuş-medeni we senagat desgalarynda giňden ulanylýar. Bu belent ynam ýaşlaryň Watana bolan söýgüsini, halal zähmete yhlasyny, döredijilik ylhamyny artdyrýar, durmuşyna aýratyn joşgun, öwüşgin çaýýar.

Umuman, ýurdumyzda amala aşyrylýan her bir taslamalarda, öňe sürülýän başlangyçlarda ýaşlaryň bähbitleri, olaryň abadan we bagtyýar durmuşda ýaşamaklary baradaky wezipelere aýratyn uly ähmiýet berilýär. Munuň üçin ýaşlara ähli zerur şertler döredilýär. Arkadag şäheri ýaşlaryň öz mümkinçiliklerini, döredijilik ukyplaryny, pikirlenmek başarnyklaryny iş ýüzünde doly açyp görkezmäge giň mümkinçilikleri döretdi. Ýaşlaryň bu üstünligi, elbetde, olar üçin döredilýän giň gerimli şertler bilen baglydyr. Watanymyzyň şanyna mundan beýläk-de şan goşmak, merdana ata-babalarymyzyň şöhratly ýoluna mynasyp bolmak üçin ýaşlaryň okuwa we işe yhlasy uly. Bu bolsa esasy ugurlaryň biridir.

Milli Liderimiziň hem-de Arkadagly Gahryman Serdarymyzyň il-ýurt bähbitli beýik işlerine dahylly bolmakdan, ýurdumyzyň ösüşlerine goşant goşmakdan uly bagt ýok. Türkmenistany mundan beýläk-de durnukly, okgunly we hemmetaraplaýyn ösdürmekde bilimli, zehinli, giň dünýägaraýyşly, hünärine ökde ýaşlaryň tutýan ornuna aýratyn uly ähmiýet berilýär, ýaşlar meselesi döwlet syýasatymyzda ileri tutulýan ugurlaryň biridir. Ýaşlara uly ynam bildirip, döwlet ähmiýetli iri taslamalary durmuşa geçirmäge gatnaşmaga giň mümkinçilikleri döredýän we türkmen ýaşlaryna durmuşda görelde bolýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, aýdyň maksatly beýik işleri uly rowaçlyklara beslensin!

Gurbanguly GAROWOW,
Myrat Garryýew adyndaky Türkmenistanyň Döwlet lukmançylyk uniwersitetiniň Kliniki farmakologiýa okuwly gospital terapiýa kafedrasynyň assistenti.