Berkarar döwletiň täze eýýamynyň Galkynyşy döwründe ýurdumyzyň ähli raýatlarynda, ilkinji nobatda ösüp gelýän ýaş nesilde tebigata, ekologik gurşawa aýawly çemeleşmek netijesinde ekologiýa medeniýetini döretmek hem-de kemala getirmek, kämilleşdirmek, tebigata, onuň gymmatly baýlyklaryna söýgini terbiýelemek işleri yzygiderli dowam etdirilýär.

Möhüm ekologiýa meselelerini çözmek halkyň saglygyny goramak, bagtyýar durmuşyny üpjün etmek üçin zerur hasaplanýar. Şeýlelikde, ekologiýa abadançylygy ýurdy gülledip ösdürmegiň ileri tutulýan möhüm ugurlarynyň biri hökmünde kesgitlenilýär.

Hemmämize mälim bolşy ýaly, eziz Diýarymyzda Arkadagly Serdarymyzyň parasatly baştutanlygynda sagaldyş hereketiniň ösdürilmegi, welosiped sporty bilen meşgullanýanlaryň sanynyň artmagy hem-de täze ekologik garaýyşlaryň kemala gelmegi, şeýle hem daşky gurşawyň ýagdaýyna jemgyýetiň jogapkärçiliginiň ýokarlandyrylmagy üçin yzygiderli geçirilýän köpçülikleýin çäreler öňde goýlan maksatlaryň üstünlikli durmuşa geçirilýändiginiň aýdyň beýanydyr.

Islendik ekologik taslamany netijeli durmuşa geçirmegiň möhüm ugry, halkyň umumy medeniýetiniň aýrylmaz bölegi hasaplanýan ekologiýa medeniýetiniň derejesi bilen şertlendirilýär. Şoňa baglylykda her bir raýatda, ylaýta-da geljegimiz bolan ýaş nesilde tebigata söýgini ösdürmek, ekologiýa medeniýetini kemala getirmek, ilatyň ähli gatlagy üçin giň gerimdäki ekologik, aňbilim işini sazlaşykly üpjün etmek göz öňünde tutulýar.

Munuň özi diňe bir tebigaty goramak ulgamynyň işgärlerini däl-de, eýsem, raýat jemgyýetiniň ähli gatlaklarynyň wekilleriniň ekologik hereketiniň giň gerim bilen ösmegini nazarda tutýar. Şunda ýaz we güýz aýlary bag nahallaryny oturtmak, welosipedli ýörişleri geçirmek hem örän ähmiýetli bolup durýar. Şeýle ýagdaýda ilatyň arasynda tebigatyň gözelliklerine, arassa howa sarpa goýmak ýaly ýörelgeler has-da ösdürilýär.

Ekologiýa medeniýeti adamlaryň tebigaty, daşyny gurşap alýan dünýäniň gözelliklerini kabul ediş derejesidir hemde her bir ynsanyň älem giňişliginde öz eýeleýän ornuna düşünmegidir. Adamyň daşky gurşawa we tebigata bolan gatnaşygydyr. Häzirki döwürde Ýer ýüzünde ýaşaýan her bir adamyň ekologiýa bilimini we medeniýetini ösdürmek, netijede her bir ynsanyň tebigatyň öňündäki jogapkärçiligini düşündirmek iň möhüm wezipeleriň biri hasaplanýar. Ekologik bilim bermegiň esasy maksady ynsan bilen tebigatyň arasyndaky özara gatnaşygy kemala getirmekden, ynsanlarda daşky gurşaw bilen özara sazlaşykda ýaşamaga bolan ukyby ösdürmekden ybaratdyr.

Gahryman Arkadagymyz halkymyzyň ençeme asyrlaryň dowamynda tebigat bilen sazlaşykda ýaşamagynyň özboluşly medeniýetini kemala getirendigini, bu ynsanperwer ýörelgeleriň bagtyýarlyk döwrümizde has-da rowaçlanýandygyny ornaşyp, ekologiýa meselelerini oňyn çözmegiň özboluşly tärlerini emele getiripdir. Türkmen halkynyň Milli Lideriniň başyny başlan ýurdumyzyň ekologiýa strategiýasy raýat jemgyýetimizi daşky gurşaw bilen sazlaşyky ösdürmäge, tebigy baýlyklarymyzy goramaga hemde aýawly peýdalanmaga gönükdirilendir.

Häzirki wagtda ýurdumyzy bagy-bossanlyga öwürmek babatda alnyp barylýan giň möçberli maksatnama üstünlikli amala aşyrylýar. Ýaşlarda ekologiýa medeniýetini kämilleşdirmek, olarda tebigata aýawly garaýşy terbiýelemek işi ösüp gelýän ýaş nesliň ekologik aň düşünjesi bilen aýrylmaz baglanyşyklydyr. Şeýlelikde, ekologiýa medeniýeti ýaşlaryň tebigat bilen gatnaşygyny, ekologik bilimlerini, eýe bolan başarnyklaryny ýaşaýyş-durmuşyndaky gündelik durmuşda peýdalanyp bilmek ukyp başarnyklarydyr. Şeýle çemeleşmeler häzirki döwürde Diýarymyzda durmuşa geçirilýän ekologiýa babatdaky syýasatyň özeni bolup durýar.

Türkmenistanyň halkara gatnaşyklar ulgamynda amala aşyrýan bilelikdäki işleri hem ekologiýa taýdan ählumumy wezipeleri çözmegiň, şeýle hem howanyň üýtgemeginiň öňüni almagyň, suw serişdelerini gorap saklamagyň, şeýlelikde, tebigaty dikeltmegiň, ony goramagyň çözgütlerini tapmak ugrunda diýseň möhümdir.

Bagtyýar geljegimiz bolan ýaşlary beýik maksatlara ruhlandyrmak, olarda watansöýüjilik, zähmetsöýerlik, päk ahlaklylyk duýgularyny, ekologiýa bolan gatnaşyklary terbiýelemek barada toplumlaýyn işleri üstünlikli durmuşa geçirýän Gahryman Arkadagymyzyň hem-de Arkadagly Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Aýnur AKBAÝEWA, 
Türkmen oba hojalyk institutynyň talyby.