Berkarar döwletiň täze eýýamynyň Galkynyşy döwründe ýaş nesli döwrebap terbiýelemek, bilim bermek hakyndaky alada döwlet syýasatynyň ileri tutulýan ugurlarynyň biridir. Arkadagly Gahryman Serdarymyzyň parasatly baştutanlygynda geljegimiz bolan ýaşlaryň terbiýe almagy, hünär öwrenmegi, sagdyn bedenli bolmagy, ata Watana, il-güne, merdana ata-babalarymyzyň ýol-ýörelgelerine wepaly adamlar bolup ýetişmegi üçin giň möçberli möhüm işler durmuşa geçirilýär.

Ýurdumyzyň sebitde we halkara derejesinde syýasy, ykdysady, medeni we ynsanperwerlik gatnaşyklarynyň üstünliklere beslenmegi, türkmen jemgyýetiniň milli we umumadamzat gymmatlyklary esasynda ösmegi, kämilleşmegi ýurdumyzyň raýatlarynyň ene dili bilen bir hatarda daşary ýurt dillerini kämil bilmeklerine giň mümkinçilikleri döredýär. Watanymyzyň ykdysady, syýasy, medeni ösüşine mynasyp goşant goşmak hem-de onuň abraýyny halkara derejesinde ýokarlandyrmak, dünýäniň ylym-bilim ulgamynyň gazananlaryndan habarly, döwrebap tehnologiýalardan baş çykarýan hünärmenleri ýetişdirmek esasy ugurlaryň biri bolup durýar. Onuň üçin Türkmenistanda daşary ýurt dillerini okatmagy we daşary ýurt dillerinde bilim bermegi innowasion çemeleşmeler esasynda alyp barmak, daşary ýurt dilleri boýunça mugallymlaryň we hünärmenleriň hünär derejesini üznüksiz ýokarlandyrmak işleri yzygiderli alnyp barylýar. Bu işleri üstünlikli durmuşa geçirmek üçin ýurdumyzda maksatnamalaýyn işler toplumlaýyn durmuşa geçirilýär.

Berkarar döwletiň täze eýýamynyň Galkynyşy döwründe ýaş nesliň daşary ýurt dillerini öwrenmegine aýratyn üns berilýär. Bu babatda umumybilim berýän mekdeplerde rus diliniň döwrebap usullar arkaly okadylmagy hem möhüm ähmiýete eýedir. Dil öwrenmek diňe bir sözleri ýa-da grammatik gurluşlary ýatlamak bilen çäklenmän, eýsem, okuwçylaryň erkin pikir alyşyp bilmegini, dürli ýagdaýlarda dili işjeň ulanmagyny üpjün etmelidir.

Soňky ýyllarda bilim ulgamynda sanly tehnologiýalaryň giňden ornaşdyrylmagy rus dilini okatmagyň mümkinçiliklerini has-da artdyrdy. Sapaklaryň dowamynda multimedia serişdeleriniň, interaktiw tagtalaryň, dürli elektron platformalaryň ulanylmagy okuwçylaryň sapaga bolan gyzyklanmasyny ýokarlandyrýar. Şeýle usullar arkaly okuwçylar diňe teoriýa bilen çäklenmän, eşidiş, okamak, ýazmak hem-de gepleşik endiklerini bir wagtda ösdürmäge mümkinçilik alýarlar.

Rus dilini öwretmekde dialoglara, toparlaýyn işlere we döredijilikli tabşyryklara aýratyn orun berilýär. Okuwçylar dürli ýagdaýlary görkezýän gepleşik maşklary arkaly dili amaly taýdan ulanmagy öwrenýärler. Şeýle çemeleşme olaryň söz baýlygyny giňeldýär, pikirlerini rus dilinde erkin beýan etmäge höwes döredýär. Şonuň bilen birlikde, tekstler bilen işlemek, kiçi çykyşlar taýýarlamak we dürli oýun görnüşindäki sapaklar hem netijeli usullaryň hataryna girýär.

Sapaklaryň mazmunyny baýlaşdyrmak maksady bilen rus dilli edebi eserlerden, çagalar üçin niýetlenen hekaýalardan hem peýdalanylýar. Şeýle materiallar okuwçylaryň diňe dil başarnyklaryny ösdürmek bilen çäklenmän, olaryň dünýägaraýşyny giňeldýär. Şeýle-de häzirki zaman bilim tejribesi daşary ýurt dillerini öwretmekde medeniýetiň hem möhüm orun eýeleýändigini görkezýär.

Türkmenistanyň Prezidentiniň Karary bilen tassyklanan «Türkmenistanda daşary ýurt dillerini okatmagy kämilleşdirmegiň Konsepsiýasynyň» üstünlikli durmuşa geçirilmegi ýurdumyzyň bilim ulgamynda daşary ýurt dillerini okatmagyň mazmunyny, ony öwretmegiň okuw-usulyýet binýadyny döwrebaplaşdyryp, ýaş nesliň dil biliminiň ösdürilmegine itergi berýär. Gahryman Arkadagymyzyň «Açyk gapylar» syýasaty netijesinde daşary döwletleriň ýokary okuw mekdepleriniň professor-mugallymlarynyň institutymyzda bolup, türkmen talyplaryna dünýä dillerini öwretmeklerini buýsanç bilen agzap bileris. Munuň özi talyp ýaşlaryň dünýä dillerini çuňňur öwrenip, özleşdirmeginde, erkin gürläp bilmeginde örän ähmiýetlidir.

Döwrebap bilim almagy, dünýä dillerini bilmekleri üçin döredilýän şeýle mümkinçilikden ýerlikli peýdalanmagy başarýan ýaşlar göwün söýen dillerini öwrenýärler. Dil bilmek danalygyň we çuňňur düşünjäniň çeşmesi, ähli üstünlikleriň açarydyr. Sebäbi dostlukly halklaryň dillerini bilmek dünýä garaýşyňy ösdürmekdir, ylmy çeşmeleri öwrenmäge giň mümkinçilikdir. Ylmyň, tehnologiýanyň şeýle tiz ösýän döwründe innowasion tehnologiýalar daşary ýurt dillerini öwrenmekde ygtybarly kömekçi bolýar. Şonuň üçin daşary ýurt dillerini okadýan mugallym, daşary ýurt dilini öwrenýän talyp häzirki zamanyň ösen tehnologiýalaryndan giňişleýin peýdalanýar. Çünki häzirki döwürde islendik adamyň telewideniýeden, gazet-žurnallardan hem-de internetden peýdalanmaga giň mümkinçiligi bar. Ösen tehnologiýalary netijeli ulanmak biziň islendik işimiziň ilerlemegine düýpli goldaw berýär.

Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» ýylynda hormatly Prezidentimiz ýaşlaryň daşary ýurt dillerini çuňňur öwrenmekleri, düýpli bilim almaklary üçin ähli şertleri döredýär. Ylym-bilimi ösdürmekde beýik işleri durmuşa ornaşdyrýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Aknabat HUDAÝBERDIÝEWA,
Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň rus dili mugallymy.