Arkadagly Gahryman Serdarymyzyň alyp barýan adyl syýasatynyň netijesinde eziz Watanymyzyň islendik ulgamy ösüşleriň ýoly bilen öňe barýar. Türkmen halkynyň demokratik gymmatlyklaryny nazarda tutmak arkaly döwletiň hukuk binýadyny pugtalandyrmak, ýurduň ykdysady kuwwatyny has-da artdyrmak, ilatyň döwrebap ýaşaýyş şertlerini üpjün etmek, bilimiň, ylmyň we medeniýetiň pajarlap ösmegini gazanmak, ýurdumyzy halkara bileleşikleriniň ulgamyna ymykly goşmak ýaly derwaýys meseleler öňe sürülýär.

Hormatly Prezidentimiziň kabul eden «Türkmenistanda sanly ykdysadyýeti ösdürmegiň 2026 — 2028-nji ýyllar üçin Konsepsiýasyna» laýyklykda ylym-bilim ulgamynda netijeli işler alnyp barylýar, orta, orta hünär we ýokary okuw mekdeplerinde kämil tehnologiýalar, kompýuter enjamlary, multimediýa serişdeleri, lingafon otaglary, ýokary tizlikli internet ulgamy ornaşdyrylýar. Şeýle-de okadylýan dersler bilen baglanyşykly elektron okuw kitaplary, okuw gollanmalary, interaktiw-multimediýa programmalary döredilýär. Bu bolsa ýerine ýetirilýän işleriň ýeňilleşmegine, wagtyň hem tygşytlanmagyna, zerur bolan gerekli maglumatlary gysga wagtda tapmaklyga şert döredýär. Häzirki innowasiýalaryň ösen eýýamynda bu ulgamyň işini döwrebap derejede guramak, kämil tehnologiýalary ornaşdyrmak, ýaş nesle ylym-bilim bermekde dünýä tejribesine daýanmak bilen ony milli ýörelgelerimiz bilen utgaşykly alyp barmak babatda möhüm başlangyçlar öňe sürülýär.

Arkadagly Gahryman Serdarymyzyň baştutanlygynda durmuşa geçirilýän giň gerimli taslamalardyr maksatnamalar halkymyzyň ýaşaýyş-durmuş derejesini ýokarlandyrýar, raýatlarymyzyň ylym-bilim, ukyp-başarnyklaryny doly derejede amala aşyrmaga mümkinçilik berýär. Mysal üçin, “Sanly Türkmenistan” döwlet maksatnamasynyň aýdyň netijeleriniň biri hökmünde döwlet hyzmatlarynyň bütewi portalynyň döredilmegini belläp bileris. Bu “e.gov.tm” portalynda ýurdumyzyň her bir raýaty döwlet hyzmatlarynyň ähli görnüşleri babatda maglumatlary alyp, olardan peýdalanyp biler. Bu bolsa, ilki bilen, bagtyýar raýatlarymyza hödürlenilýän hyzmatlaryň hilini ýokarlandyrmaga, elýeterliligini artdyrmaga, milli Liderimiziň ýolbaşçylygyndaky asylly başlangyçlaryň miwelerinden datmaga mümkinçilik döredýär. Hormatly Prezidentimiziň atalyk aladalarynyň esasynda durmuşa geçirilýän işler halkymyza dünýä ülňülerine laýyk gelýän hyzmatlary hödürlemäge, döwür bilen aýakdaş gitmäge şert döredýär.

Berkarar döwletimizde yglan edilen 2025-nji — Halkara parahatçylyk we ynanyşmak ýylynda maglumat hem-de innowasiýa tehnologiýalarynyň ýokary tizlik bilen ösýän, olaryň her bir ynsanyň, jemgyýetiň we döwletiň durmuşyna çuňňur ornaşýan döwründe bilim ulgamynda täze wezipeler, usullar we bilim bermegiň täze çemeleşmeleri kemala gelýär. Eziz Diýarymyzda durmuşa geçirilýän düýpli özgertmeleriň maksady ýurdumyzda ähli zadyň gözbaşy bolan ylmy ösdürmekden ybaratdyr.

Hormatly Prezidentimiz degişli pudaklarda sanly ulgama geçmekligiň möhüm wezipedigini nygtamak bilen, elektron görnüşli hyzmatlardan netijeli peýdalanmaklyga ünsi çekýär. “Türkmenistanda sanly bilim ulgamyny ösdürmegiň Konsepsiýasy” ýurdumyzda sanly bilim ulgamyny mundan beýläk hem ösdürmegiň esasy ugurlaryny kesgitlemek bilen, ylmyň soňky gazananlary hem-de okatmagyň innowasion usulyýeti giňden ornaşdyrylýar. Bu möhüm Konsepsiýa Türkmenistanyň Konstitusiýasyna, “Türkmenistanda bilim ulgamyny kämilleşdirmek hakynda” Türkmenistanyň Prezidentiniň Permanyna, “Bilim hakynda”, “Elektron resminama hakynda” Türkmenistanyň kanunlaryna we beýleki hukuk namalaryna esaslanyp taýýarlanyldy.

Gahryman Arkadagymyzyň hem-de Arkadagly Gahryman Serdarymyzyň ösen innowasiýa babatyndaky öňdebaryjy daşary ýurt tejribesini ornaşdyrmaga gönükdirilen ýörelgelerine esaslanyp Garaşsyz Diýarymyzda kämil hem-de hil taýdan ösen ykdysady ösüş gazanylýar, netijeli sepgitlere eýe bolunýar. Sanly bilim ulgamyny ösdürmek dürli tehnologiki we ylmy täzelikleriň üstünde işlemegi we döretmegi, bilim ojaklaryna innowasion tehnologiýalary çalt depginde ornaşdyrylmagyny hem-de olaryň maglumat binýadynyň berkidilmegini üpjün edýär. Pursatdan peýdalanyp, mähriban halkymyzy bagtyýarlyga, berkarar döwrümizi rowaçly mezillere ýetiren türkmen halkynyň Milli Liderine hem-de Arkadag Prezidentimize çäksiz alkyş aýdýarys!

Ogulbaýram GURBANOWA,
Myrat Garryýew adyndaky Türkmenistanyň Döwlet lukmançylyk uniwersitetiniň Jemgyýeti öwreniş ylymlary kafedrasynyň mugallymy.