10-njy noýabrda paýtagtymyzyň Söwda-senagat edarasynda geçirilen we özara bähbitli gatnaşyklara giň mümkinçilikler döreden telekommunikasiýa, telemetriýa, maglumatlar tehnologiýalary we tele-radio enjamlary boýunça «Türkmentel — 2023» atly XVI Halkara sergisi we ylmy maslahaty ikinji iş gününi tamamlady.

«Türkmenel — 2023» halkara sergisi we ylmy maslahatyna Türkmenistan, Russiýa, ABŞ, Finlýandiýa, Türkiýe, Latwiýa, Fransiýa, Monako, Niderland Patyşalygy, Germaniýa, Şweýsariýa, Awstriýa, Ýaponiýa, Şwesiýa, Beýik Britaniýa, Taýland Patyşalygy, Hindistan, Päkistan, Belarus, Özbegistan, Gyrgyz, Gazagystan, Owganystan, Azerbaýjan, Hytaý, Birleşen Arap Emirlikleri ýaly, dünýäniň 30-a golaý ýurdundan 80-ne golaý kompaniýanyň, şol sanda halkara guramalarynyň 200-den gowrak wekilleri gatnaşdylar.  

Ýokary guramaçylykly we netijeli geçirilen halkara sergisi we maslahaty halkara guramalarynyň ýolbaşçylarynyň, dünýäniň öňdebaryjy kompaniýalarynyň wekillerini jemlemek bilen, kommunikasiýa pudagy üçin täze hyzmatdaşlyklary ýola goýmaga we bar bolan oňyn gatnaşyklary pugtalandyrmaga, daşary ýurt maýa goýumlary çekmäge, täze Akylly şäherleri gurmaga, emeli aň ylmynyň gözleg we işleme meýdanlaryny giňeltmäge hem-de öňdebaryjy sanly tehnologiýalary ornaşdyrmaga giň mümkinçilikleri döretdi.

Halkara sergisiniň we ylmy maslahatynyň dowamynda ýaş IT hünärmenleriň, talyp ýaşlaryň we mekdep okuwçylarynyň arasynda her ýylda däbe öwrülen «Sanly çözgüt 2023» atly innowasion taslamalaryň bäsleşiginiň ýeňijileri yglan edildi. Ýeňiji bolan 42 sany ýaşlar diplomlar we gymmat bahaly sowgatlar bilen sylaglandy.

Forumyň birinji gününde öz işine başlan «Mobil aragatnaşyk torlarynyň täze nesliniň (IMT-2020/5G) işe girizilmegi» atly okuw sapagy dowam etdi. Okuw sapagynda daşary ýurtly kompaniýalarynyň tejribeli hünärmenler 5G torlaryny işe girizmegiň ugurlary we esasy maksatlary barada giňişleýin durup geçdiler.

Guramaçylykly we ýokary derejeli geçen halkara forumyň ikinji gününiň çäginde hem «Türkmenaragatnaşyk» agentliginiň başlygy Hajymyrat Hudaýgulyýewiň ýolbaşçylyk etmeginde degişli wekiliýetiň we daşary ýurt kompaniýalarynyň ýolbaşçylarynyň we wekilleriniň arasynda 30-a golaý duşuşyklar geçirildi.

Forumyň ahyrynda ýerli we daşary ýurt kompaniýalarynyň we foruma işjeň gatnaşan döwlet edaralarynyň wekillerine «Türkmenaragatnaşyk» agentligi tarapyndan diplomlar gowşuryldy.

«Türkmentel — 2023» atly XVI Halkara sergisi we ylmy maslahaty sanly ykdysadyýeti kämilleşdirmek, sanly çözgütleriň iş ýüzünde giňden ulanylmagy bilen ykdysadyýetiniň pudaklarynda öňegidişlikleri gazanylmak, şeýle hem halkara tejribelere esaslanyp özara bähbitli gatnaşyklary ösdürmek we giňeltmek babatynda oňyn şertleri döretdi.

Aýgözel ANNAMÄMMEDOWA,
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentliginiň «Türkmentelekom» elektrik aragatnaşyk kompaniýasynyň esasy hünärmeni.