Berkarar döwletiň täze eýýamynyň Galkynyşy döwri ata Watanymyzyň taryhynda ajaýyp eýýam boldy. Ol halkymyzyň durmuş abadançylygyny we bagtyýarlygyny bütin dünýä ýaýýan beýik işlere, gazanylýan uly üstünliklere, ýetilýän belent sepgitlere beslenýär. Bu ajaýyp döwrümiz halkymyza bagtyýarlygy, Watanymyzyň geljegi bolan körpelere, mekdep okuwçylaryna, talyp ýaşlara bolsa bilim sahawatyny eçilýär. Döw­rü­mi­ziň ­bi­lim­ sa­ha­wa­ty­ — ­mu­nuň­ özi,­ il­kin­ji ­nobatda, döwrebap bilim almak üçin häzirki zamanyň ösen talaplaryna laýyk gelýän bilim edaralarynda terbiýelenmek, bilim almak, hünär öwrenmek diýmekdir.

Her ýyl bolşy ýaly, Halkara parahatçylyk we ynanyşmak ýylynda hem paýtagtymyzda, ýurdumyzyň welaýatlarynda täze çagalar baglarynyň, orta mekdepleriň, orta hünär we ýokary okuw mekdepleriniň täze binalary gurulýar. Bilim ojaklarynyň häzirki zamanyň kämil enjamlary, multimedia serişdeleri, şeýle hem okuw-görkezme esbaplary bilen üpjün edilmegi bilim-terbiýeçilik işlerini döwrebap guramaga, öňde goýlan maksada ýetmäge mümkinçilik döredýär. 

Häzir ýurdumyzda ýaşlaryň döwrebap bilim almagy hem-de ýokary derejeli hünärmenleri taýýarlamak üçin ähli şertler döredildi. Konsepsiýa laýyklykda, ýokary okuw mekdeplerinde hünärmenleriň, professorlaryň we mugallymlaryň, şeýle hem talyplaryň gatnaşmagynda sanly bilimi ulgamlaýyn üpjün etmegiň maksatnamasy, ýörite portallar işlenip taýýarlanyldy. Sanly tehnologiýalaryň giňden ornaşdyrylmagy netijesinde ýokary okuw mekdeplerinde özara tejribe alyşmak maksady bilen bellibir aralykdan sapak bermek, onlaýn wideosapaklar hem-de daşary ýurtly hyzmatdaşlaryň gatnaşmagynda wideomaslahatlar yzygiderli guralýar.

Bilim kämilligiň binýadydyr. Bilimli nesli kemala getirmek häzirki döwrüň esasy wezipeleriniň hatarynda öňe çykarylar. Şeýle hem bu babatdaky wezipeleriň üstünlikli amala aşyrylmagy üçin ähli şertler, giň mümkinçilikler döredilýär. Bilim ulgamyna döwlet syýasatynyň ileri tutulýan ugry hökmünde garalyp, bu ugurda halkara hyzmatdaşlygy ösdürilýär, öňdebaryjy tejribeler durmuşa ornaşdyrylýar, bilim işgärleriniň hünär ussatlygy ýokarlandyrylýar. Mugallymlaryň döredijilikli işlemekleri üçin giň mümkinçilikleriň döredilişi ýaly, mekdep okuwçylarynyň, talyp ýaşlaryň bilimleri ele almaklary, ukyp-başarnyklaryny ýüze çykarmaklary üçin ähli şertler üpjün edilýär. Şonuň netijesinde olar diňe bir ýurdumyzda däl, eýsem, halkara derejesinde geçirilýän bilim bäsleşiklerinde hem üstünlikli çykyş edýärler.

Ýurdumyzda ýöriteleşdirilen mekdepleriň sanynyň artmagy, daşary ýurt dilleriniň okadylmagy, bilim işine sanly ulgamyň ornaşdyrylmagy milli bilim ulgamynyň üstünliklere beslenmegini şertlendirdi. Garaşsyz, baky Bitarap Türkmenistanyň bilim ulgamynyň kämilleşmeginde «Bilim hakynda» Türkmenistanyň Kanunynyň (rejelenen görnüşi) kabul edilmegi örän möhüm ähmiýete eýe boldy.

Hormatly Prezidentimiziň belleýşi ýaly, sanly bilim ulgamyny ösdürmegiň Konsepsiýasy milli we halkara ölçeglere, häzirki talaplara kybap gelýän ýokary hilli hyzmatlary almak üçin ähli mümkinçilikleri üpjün etmelidir. Şunda aýratyn üns çekmeli zatlaryň biri hem, internet hyzmatlarydyr. Bu gün internet hyzmatlarynyň dürli görnüşleri raýatlarymyzy goşmaça üznüksiz bilim almaga, islendik aralykdan bilim almak arkaly hünär ussatlygyny ýokarlandyrmaga, elektron kitaphanalardan peýdalanmaga höweslendirýär. Sanly bilim ulgamynyň ornaşdyrylmagy adam maýasyny artdyrmaga hem-de jemgyýetiň we Watanymyzyň gülläp ösmeginiň bähbidine ykdysadyýete we beýleki ugurlara innowasion serişdeleri çekmäge mümkinçilik berer diýip, Arkadagly Gahryman Serdarymyz aýratyn nygtaýar.

Bularyň hemmesi ýaşlar barada edilýän aladalaryň subutnamasydyr. Hut şonuň üçin bilim işgärleri Gahryman Arkadagymyza hem-de Arkadagly Gahryman Serdarymyza alkyş aýdýarlar. Ýurdumyzy, şol sanda bilim ulgamyny ösüşlere besleýän türkmen halkynyň Milli Lideriniň hem-de hormatly Gahryman Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Ýazmuhammet ORAZBERDIÝEW,
Myrat Garryýew adyndaky Türkmenistanyň Döwlet lukmançylyk uniwersitetiniň Kliniki farmakologiýa okuwly gospital terapiýa kafedrasynyň assistenti.