Berkarar döwletiň täze eýýamynyň Galkynyşy döwründe Arkadagly Gahryman Serdarymyz ata Watanymyzyň täsin we gözel tebigatyny goramak hem-de ony asyl durkunda geljekki nesillere miras goýmak, ýurdumyzyň ekologiýa abadançylygyny durnukly üpjün etmek, tebigy baýlyklardan rejeli peýdalanmak, ilatymyzyň ekologiýa medeniýetini kämileşdirmek meselesine aýratyn uly ähmiýet berýär. Ekologiýa howpsuzlygy adamyň ýaşaýşy üçin möhüm ekologik bähbitleriniň, ilkinji nobatda, arassa we sagdyn ýaşaýşy üçin amatly tebigy gurşawa bolan hukugynyň goraglylygy, döwlet syýasatynyň bu wezipeleri çözmäge gönükdirilmegi, ykdysady, dolandyryş-guramaçylyk çäreleriniň amala aşyrylyşy ýaly ugurlary öz içine alýar.

Hormatly Prezidentimiz Serdar Berdimuhamedow öz çykyşynda: «Ekologiýa abadançylygyny üpjün etmek, geljek nesillerimiz üçin ösümlik we haýwanat dünýäsini gorap saklamak hem-de olaryň biologik dürlüligini artdyrmak, tebigy serişdelerimizi netijeli we durnukly peýdalanmak, şeýle hem bereketli topragymyzy gülläp ösýän mekana öwürmek boýunça giň gerimli işler geçiriler» diýip, aýratyn nygtap geçdi.

Munuň özi ýurdumyzda arassa ekologiýa we daşky gurşawy goramak boýunça amala aşyrylýan asylly işleriň ýokary derejede dowam etjekdiginiň aýdyň subutnamasydyr. Türkmenistanda ösümlikleri goramagyň 2022 — 2025-nji ýyllar üçin Döwlet maksatnamasynyň hem-de şol maksatnamany amala aşyrmak boýunça ýerine ýetirilmeli çäreleriň Meýilnamasynyň, şeýle-de Türkmenistanyň wodorod energiýasy babatda halkara hyzmatdaşlygy ösdürmek boýunça 2022 — 2023-nji ýyllar üçin Ýol kartasynyň tassyklanylmagy ýurdumyzda daşky gurşawyň goragyny we amatly ekologiýa gurşawyny üpjün etmek boýunça alnyp barylýan işlerde anyk ädimler boldy.

Ösümlikleri goramagyň täze tassyklanylan Döwlet maksatnamasy «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Mak-satnamasynda» bellenen wezipeleri üstünlikli amala aşyrmak, şeýle hem «Ösümlikleri goramak hakynda» Türkmenistanyň Kanunyna laýyklykda, ösümlikleri zyýankeşlerden, kesellerden hem-de haşal otlardan goramak maksady bilen kabul edildi.

Garaşsyz Watanymyz tarapyndan halkara derejesinde wodorod energetikasyny ösdürmek boýunça birnäçe teklipler öňe sürülýär. BMG-niň gazylyp alynýan senagat boýunça ýokary derejeli ählumumy forumynda pes uglerodly energiýany ösdürmek boýunça çäreleri amala aşyrmaga niýetlenen BMG-niň Strategiýasyny işläp taýýarlamak, şeýle hem BMG-niň howandarlygynda energetikada ileri tutulýan ugurlaryň biri hökmünde wodorody ösdürmek boýunça halkara «Ýol kartasyny» döretmek baradaky başlangyjy hödürlenildi. Munuň özi ýurdumyzyň bütin dünýäde ekologiýa abadançylygyny üpjün etmäge örän jogapkärli çemeleşýändigine we toplumlaýyn çäreleri durmuşa geçirýändigine aýdyň şaýatlyk edýär.

Halkara parahatçylyk we ynanyşmak ýylynda türkmen halkynyň Milli Lideriniň hem-de Arkadagly Gahryman Prezidentimiziň halkymyzyň asuda, abadan we bagtyýar durmuşda ýaşamagy, ekologiýa howpsuzlygynyň we amatly daşky gurşawyň ýokary derejede goralmagy ugrunda alyp barýan işleriniň üstünliklere beslenmegini arzuw edýäris!

Ogulgeldi ANNAÝEWA,
Myrat Garryýew adyndaky Türkmenistanyñ Döwlet lukmançylyk uniwersitetiniň Patologik fiziologiýa kafedrasynyň uly mugallymy.