Halkymyz behişdi bedewlerine asyrlar boýy belent sarpa goýup, olary buýsanjyna deňäp, milli baýlyk derejesinde eý görüp gelýär. Berkarar döwletiň täze eýýamynyň Galkynyşy döwründe milli atşynaslygyň täze derejelere göterilendigini hem buýsanç bilen aýdyp bileris. Ajaýyp zamanamyzda Milli Liderimiz we Arkadagly Serdarymyz ýyndamlykda, gözellikde  deňsiz-taýsyz hasaplanylýan ahalteke bedewlerimiziň dünýä ýüzündäki şan-şöhratynyň häzirkisindenem belende göterilmegi ugrunda ähli tagallalary edýär.

Döwlet Baştutanymyz ýurdumyzda atşynaslygy ösdürmek babatda Gahryman Arkadagymyz tarapyndan badalga berlen giň gerimli işleriň dowamat-dowam bolmagy üçin hemme şert-mümkinçilikleri döredip berýär. «Halkyň Arkadagly zamanasy» ýylynda Türkmen bedewiniň milli baýramy mynasybetli halkara hem-de ýurt derejesinde geçirilýän çäreler bir-birine ulaşýar.

Hepdäniň penşenbe güni Balkan welaýatynda ýetginjekleriň, uly ýaşly hem-de halypa çapyksuwarlaryň gatnaşmagynda baýramçylyk at çapyşyklary geçirilip, olar uly şatlyk-şowhuna beslendi. Bilşimiz ýaly, bu nurana baýrama bagyşlanyp, ýurdumyzda her ýylda ahalteke atlarynyň halkara gözellik bäsleşiginiň, ylmy-amaly maslahatlaryň, bedewleriň gözelligini şekillendiriş we amaly-haşam sungatynyň eserlerinde, neşir önümlerinde, fotosuratlarda, teleýaýlymlarda çeper beýan etmek ugrunda döredijilik bäsleşikleriniň guralmagy hem asylly däbe öwrüldi. Elbetde, bu zatlaryň ählisi ýurdumyzda behişdi bedewlere sarpanyň, söýginiň diýseň belentdiginiň güwäsidir.

Asyrlaryň dowamynda ata-babalarymyz ahalteke bedewleriniň ajaýyp tohumlaryny ösdürip ýetişdiripdirler. Olaryň ýetişdiren atlaryna owadanlykda, uzak ýörişlere çydamlylykda dünýäniň hiç bir tohum atlary taý gelip bilmändir. Bu ugurda gazanylýan ajaýyp sepgitlerde seýisçilik mekdebiniň orny örän uludyr. Halkymyzyň müňýyllyklara uzaýan taryhy ýyndam ahalteke bedewleri bilen aýrylmaz baglydyr. Ahalteke bedewleriniň kämilligi, adamlaryň ýakyn syrdaşy hasaplanylmagy türkmenleriň zehinli halkdygyna şaýatlyk edýär, çünki şöhratly atşynaslar, seýisler ähli güýjüni, zehinini, kalbyny asylly işe bagyş edip, bedewleriň tebigat bilen sazlaşygyny, jemgyýet bilen utgaşykly ösüşini kemala getirmegi başarypdyrlar. Hut şonuň üçin hem türkmen milli seýisçilik ýörelgeleri sungat derejesine göterilipdir.

Diýarymyzda her ýylyň aprel aýynyň soňky ýekşenbesinde Türkmen bedewiniň milli baýramy giňden bellenip geçilýär. «Halkyň Arkadagly zamanasy» ýylynda hem Türkmen bedewiniň milli baýramy gözel paýtagtymyzda we ýurdumyzyň ähli welaýatlarynda şatlyk-şowhuna beslenýär. Baýramçylyk mynasybetli Aşgabatda Halkara ahalteke atçylyk assosiasiýasynyň mejlisi, «Türkmen bedewi we dünýäniň seýisçilik sungaty» atly halkara ylmy maslahaty, halkara sergi-ýarmarkasy geçirilýär. Baýramçylyk maksatnamasynda bellenilen uzak aralyga atly ýörişler, ýetginjek çapyksuwarlaryň arasynda atçylyk sport ýaryşlary, döredijilik bäsleşikleri, däp bolan at çapyşyklar giň gerim alýar. Türkmen bedewiniň milli baýramy mynasybetli «Ýylyň iň owadan ahalteke bedewi» atly halkara gözellik bäsleşigi hem-de behişdi bedewleriň gözelligini çeper beýan etmek boýunça suratkeşleriň, heýkeltaraşlaryň, halyçylaryň, zergärleriň, fotosuratçylaryň, neşirýat işgärleriniň, dizaýnerleriň, teleoperatorlaryň arasynda döredijilik bäsleşikleri geçirilýär we ýeňijiler sylaglanýar.

Goý, dünýäni haýrana goýýan türkmen bedewiniň şan-şöhratynyň has-da belende göterilmegi üçin taýsyz tagallalary edýän türkmen halkynyň Milli Lideriniň hem-de Arkadag Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Kakamyrat JUMAÝEW,
Türkmenistanyň döwlet energetika institutynyň 4-nji ýyl talyby.