Berkarar döwletiň täze eýýamynyň Galkynyşy döwründe Arkadagly Gahryman Prezidentimiziň parasatly baştutanlygynda ýurdumyzda durnukly ykdysady ösüşi berkitmek, raýatlaryň ýaşaýyş-durmuş derejesini dünýäniň ösen döwletleriniň hataryna ýetirmek, giň gözýetimli, durmuşa ukyply, zehinli ýaşlary terbiýeläp ýetişdirmek, ykdysadyýetimiziň dürli ugurlary üçin ösen tehnologiýalardan oňat baş çykarýan, ýokary derejeli hünärmenleri taýýarlamak boýunça maksatnamalaýyn işler alnyp barylýar.

Arkadagly Gahryman Serdarymyz: «Ýaşlarymyzyň ruhy-ahlak, medeni, aň-bilim we beden taýdan ösüşine uly ähmiýet berýäris. Çünki ylymly-bilimli, sagdyn ýaşlar döwletimiziň kuwwatly güýjüdir, nurana geljegidir» diýip, ata Watanymyzyň geljegi bolan ýaşlara uly ynam bildirýär. Ýurdumyzda Ýaşlar barada döwlet syýasatynyň ýokary derejede alnyp barylmagy, ýaş nesil hakdaky aladanyň döwlet derejesinde üns merkezinde saklanylýandygynyň aýdyň subutnamasydyr. Bu işleriň alnyp barylmagynyň esasy maksady ýurdumyzda ýaşlar syýasatynyň hukuk binýadyny pugtalandyrmakdan hem-de ýaşlara döredilýän mümkinçilikleriň gerimini giňeltmekden, döwletimiziň syýasy, ykdysady we medeni taýdan ösüşine ýaşlaryň işjeň gatnaşmaklaryny üpjün etmekden ybaratdyr.

Ýakynda, ýagny “Pähim-paýhas ummany Magtymguly Pyragy” ýylynyň 16-njy noýabrynda zehinli, Watanymyzy ösdürmäge mynasyp goşant goşmaga ukyply ýaşlaryň ençemesine Türkmenistanyň Ýaşlar baýragynyň gowşurylmagy ýaş nesilleriň döredijilik başlangyçlaryna goýulýan belent sarpanyň aýdyň nyşany boldy. Bu şanly günde meniň hem Türkmenistanyň Ýaşlar baýragynyň eýesi bolmagym göwnümi galkyndyryp, durmuşymy ýatdan çykmajak pursatlar bilen bezedi.

Häzirki wagtda hormatly Gahryman Prezidentimiziň parasatly baştutanlygynda ýurdumyzda ýaşlaryň döwrebap bilim almagy, ruhy-ahlak, medeni, aň-bilim we beden taýdan sagdyn, giň gözýetimli, durmuşa ukyply bolup ýetişmekleri üçin zerur şertler döredilýär. Şunuň bilen baglylykda, Arkadagly Gahryman Serdarymyz «Bilim işini döwrebaplaşdyrýarys, milli maksatnamalary, konsepsiýalary üstünlikli durmuşa geçirýäris. Ýaş nesilleriň ýokary derejede bilim almaklary, saýlan hünärleriniň eýeleri bolmaklary, watançylygyň hem-de ynsanperwerligiň belent ruhunda terbiýelenmekleri üçin giň mümkinçilikleri döredýäris» diýip belläp geçýär.

Hakykatdan hem, «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyna «Türkmenistanda ýaşlar baradaky döwlet syýasatynyň 2021 — 2025-nji ýyllar üçin Döwlet maksatnamasyna» laýyklykda ýurdumyzda ýaş nesliň döwrebap okamagy, ylym-bilim almagy, hünär öwrenmegi, iş bilen üpjünçiliginiň gowulandyrylmagy üçin ähli mümkinçilikler döredilýär. Bilim ojaklarynda dünýäniň ylmy-innowasion, ruhy-medeni ugurlar babatdaky öňdebaryjy tejribeleri giňden öwrenilýär we ösen talaplara laýyklykda, okuw maksatnamalary işlenilip düzülýär, bu ulgama bilim bermegiň täze tehnologiýalary, okuw tehniki enjamlary ornaşdyrylýar. Sanly bilim ulgamynyň öňde goýýan wezipeleriniň durmuşa geçirilmegi okuw-önümçilik işinde birnäçe ýeňillikleri döredip, işiň netijeliligini artdyrýar. Ulanylýan sanly serişdeler, elektron maglumat göterijiler, wideoşekiller we audio ýazgylar ýaşlara has giň möçberdäki maglumaty kabul etmäge hem peýdalanmaga, şunlukda, dünýä ösüşi bilen deň gadam urmaga ýardam edýär.

Döwrebap pikirlenip bilýän, taslamalar babatda täze, özboluşly, täsirli garaýyşlary öňe sürýän ýaş zehinler medeni ösüşi gazanmakda möhüm wezipäni ýerine ýetirýärler. Şundan ugur alnyp, ýaşlaryň döwletiň we jemgyýetiň durmuş-ykdysady, syýasy-medeni durmuşyna işjeň gatnaşmaklaryny, sagdyn durmuş ýörelgelerine eýermeklerini gazanmak, olarda medeni gymmatlyklara, ata Watanymyza, zähmete, ylym-bilime söýgini artdyrmak üçin hem zerur şertler döredilýär. Ýaşlaryň jemgyýetde mynasyp orun eýelemeklerinde, medeni-köpçülikleýin çärelere, döredijilik bäsleşiklerine, sport ýaryşlaryna işjeň gatnaşmaklarynda, saýlap alan hünärleri boýunça kämilleşmeklerinde ýurdumyzda alnyp barylýan ýaşlar syýasatynyň ähmiýeti örän uludyr.

Ylym-bilimli, kämil hünär başarnyklaryny ele alan, sagdyn bedenli ýaşlar ýurdumyzyň geljegidir. Soňky ýyllarda üstünlikli amala aşyrylýan ýaşlar syýasaty hem geljegiň berk binýadyny goýmakda iň uly başlangyç bolýar. Garaşsyzlyk ýyllarynda galkynan Diýarymyzyň ýaş nesilleri bu günki günde diňe bir Watanymyzyň çäklerinde däl, eýsem, halkara giňişlikde-de uly-uly üstünliklere eýe bolýarlar. Bularyň ählisi bolsa Arkadagly Gahryman Prezidentimiziň ýurdumyzda ylym-bilimi ösdürmek bilen baglanyşykly yzygiderli alyp barýan işleriniň ajaýyp miwesidir.

Biz ýaşlar üçin şunuň ýaly uly mümkinçilikleri döredip berýän halkymyzyň Milli Lideri Gahryman Arkadagymyza hem-de Arkadagly Gahryman Serdarymyza köp sag bolsun aýdýarys. Türkmenistan Watanymyzyň halkara abraýyny mundan beýläk hem arşa götermek, watansöýüji, ukyp-başarnykly ýaş nesilleri kemala getirmek ugrunda ýadawsyz tagallalar edýän halkymyzyň milli Lideri Gahryman Arkadagymyzyň hem-de Arkadagly Serdarymyzyň janlary sag, ömürleri uzak bolsun! Il-ýurt bähbitli, döwlet ähmiýetli alyp barýan işleri hemişe rowaçlyklara beslensin!

Meýlis ARTYKGURBANOW,
Türkmenistanyň Inžener-tehniki we ulag kommunikasiýalary institutynyň mugallymy,
Ýaşlar baýragynyň eýesi.