Türkmen halkynyň beýik şahyry we akyldary Magtymguly Pyragy – öçmejek ruhy we ahlak gymmatlyklaryna eýe bolup, adamlaryň ruhy dünýäsinde we durmuşynda ýagşylygyň ugrukdyryjysy hökmünde olaryň aňyna baky yşyk bolup ornaşdy. Berkarar döwletiň täze eýýamynyň Galkynyşy döwrüniň ajaýyp günlerinde hormatly Prezidentimiziň beýik işleri, özgertmeleri hakynda söhbet etmek örän ýakymlydyr. Esasan hem, milli medeniýetimizi we nusgawy edebiýatymyzy dünýä ýaýmakda uly işleriň alnyp barylýandygyny aýratyn bellemek gerek. Ynha, ýaňy-ýakynda biziň ählimiz üçin şatlykly, buýsandyryjy wakalaryň biriniň bolandygyny belläsimiz gelýär. Hormatly Prezidentimiziň “Magtymguly - dünýäniň akyldary” atly ajaýyp kitabynyň elimize gowuşmagy örän buýsandyryjydyr. Bu ajaýyp eserde akyldar şahyryň döredijiligi, milli edebiýatyň baý hazynasy hakynda aýdyň beýan edilýär.

Bu günki gün Gahryman Arkadagymyzyň hem-de Arkadagly Gahryman Serdarymyzyň öňdengörüjilikli syýasaty milli gymmatlyklarymyza, geçmişde yz galdyran ägirtlerimize sarpany ömrümiziň, durmuşymyzyň manysyna öwürdi. Magtymguly Pyragynyň şahyrana mirasy diňe bir türkmen halkynyň däl, eýsem tutuş türki dilli halklaryň hem edebiýatynyň taryhynda ähmiýeti has ýokary bolup, adamzat bilimleriniň hazynasyna möhüm goşant goşup, dünýä edebiýatynyň aýrylmaz bölegine öwrüldi. Şahyryň goşgularynda öňe sürlen ynsanperwerlik, watansoýüjilik, agzybirlik we jebislik pikirleriniň üç asyrdan bäri dünýäniň aglaba ýurtlarynyň şahyrlary we alymlary üçin nusgalyk ýörelge bolup hyzmat edip gelýär.

Arkadagly Gahryman Serdarymyzyň halkymyza peşgeş edýän ajaýyp eserleri çuňňur manynyň nusgasydyr. Esasan hem, milli ruhumyzy kemala getiren gymmatlyklar, has takygy, Garaşsyzlyk, Bitaraplyk, milli aňyýet milli dünýägaraýyş hakynda okamak has-da täsirli bolup durýar. Bu watansöýüjiligi has-da belende göterýär, asylly ýörelgelere bolan sarpany artdyrýar, nusgawy edebiýat hakyndaky düşünjäni has-da baýlaşdyrýar.

Hormatly Prezidentimiziň “Magtymguly – dünýäniň akyldary” atly ajaýyp kitaby akyldar şahyryň döredijilik dünýäsine düşünmäge aýdyň ýoldur, dury çeşmedir. Türkmen halkynyň şöhratly taryhyny, akyldar şahyrymyzyň paýhasa ýugrulan edebi mirasyny, gadymdan gelýän dilimiziň gymmatly baýlygyny çuňňur öwrenmekde nusgawy kitabyň ähmiýeti juda uludyr. Taryhy uzak müňýyllyklardan gözbaş alýan halkymyzyň baý edebiýaty, dili hem-de şöhratly taryhy bar. Şeýle şöhratly taryhy ylmy esasda öwrenmek, geçmişde ýaşap geçen parasatly akyldarlarymyzy dünýä ýaýmak asylly we beýik ýörelgedir. 

Garaşsyzlyk ýyllarynda Magtymguly Pyragynyň arzuwlary hasyl boldy. Häzirki döwürde asuda Watanymyz, parahat, agzybir, erkana halkymyz bar, bularyň gözbaşynda Gahryman Arkadagymyzyň, peder ýoluny mynasyp dowam edýän Arkadagly Gahryman Serdarymyzyň tagallalary bar. Gündogaryň beýik akyldary Magtymguly Pyragy özüniň çuňňur pähim-paýhasa ýugrulan şygyrlary bilen ynsan kalbynda baky orun aldy. Nusgawy şahyryň watançylygy, ynsanperwerligi, halallygy, agzybirligi ündeýän eserleri bütin adamzat üçin bahasyna ýetip bolmajak gymmatlyk bolup, dünýä edebiýatynyň altyn gaznasynda özüne mynasyp orna eýedir.

Ýaş nesilleri terbiýelemekde Magtymguly Pyragynyň döredijiliginiň ähmiýeti çäksizdir. Akyldar şahyrymyz öz goşgy setirlerinde agzybirlik, watansöýüjilik, mertlik, halallyk, päklik, lebzihalallyk, dosta wepalylyk, ynsanperwerlik, zähmetsöýerlik ýaly ýörelgeleri tekrarlaýar. Hut şoňa görä-de, ýaş nesli milliligimiz we ata-babalarymyzyň ýol-ýörelgesi bilen terbiýelemekde Pyragynyň eserleri gymmatly gollanmadyr. Milli gymmatlyklarymyzy täzeden galkyndyrýan, pederlerimize we olaryň baý döredijiligine uly hormat goýýan, dana pederlerimiziň bize goýan ylmy-edebi mirasyny düýpli öwrenmäge uly mümkinçilikleri döredýän Gahryman Arkadagymyzyň hem-de Arkadagly Gahryman Serdarymyzyň janlary sag, belent başlary aman bolsun, il-ýurt bähbitli beýik işleri rowaçlyklara beslensin!

Söhbet GURBANALYÝEW,
Myrat Garryýew adyndaky Türkmenistanyň Döwlet lukmançylyk uniwersitetiniň Terapiýa kafedrasynyň assistenti.