Mälim bolşy ýaly, ýakynda biziň ählimiz üçin şatlykly, buýsandyryjy wakalaryň biriniň bolandygyny belläsimiz gelýär. Gahryman Arkadagymyzyň “Hakyda göwheri” hem-de hormatly Prezidentimiziň “Magtymguly - dünýäniň akyldary” atly täze kitaplarynyň elimize gowuşmagy örän buýsandyryjydyr. Bu ajaýyp eserlerde merdana halkymyzyň asyrlaryň jümmüşine uzap gidýän şöhratly ýoly, dünýä ösüşine goşan ägirt uly goşandy, görnükli şahsyýetlerimiziň, şol sanda akyldar şahyrmyz Magtymguly Pyragynyň  döredijiligi, milli edebiýatyň baý hazynasy hakynda aýdyň beýan edilýär.

Ýaňy-ýakynda Lebap welaýat kitaphanasynda Milli Liderimiziň “Hakyda göwheri” hem-de Arkadagly Gahryman Serdarymyzyň “Magtymguly - dünýäniň akyldary” atly ajaýyp kitaplarynyň tanyşdyrylyşy barada wagyz-nesihat çäresi geçirildi. Dabara gatnaşyjylar Milli Liderimiziň ylmy-filosofik işleriniň we çeper eserleriniň geljek nesiller üçin gymmatly hazynadygyny nygtadylar. Gahryman Arkadagymyzyň watandaşlarymyza serpaý eden eserleri halkyň ruhy we medeni gymmatlygyna öwrüldi. “Hakyda göwheri” atly täze kitap hem Milli Liderimiziň halkymyzyň şöhratly taryhy, döredijilik mirasy hakynda toplan maglumatlarynyň paýhas dürüdir. Bu eser gadymy oguz edebiýatyny öwrenmekde-de gymmatly çeşmä öwrüler. Alym Arkadagymyz döredijilik gözlegleri barada aýdyp, bu kitaby döretmekde mundan ozal ýazan we giň okyjylar köpçüligine ýetirilen dürli kitaplaryny, şeýle hem Watanymyzyň at-abraýy üçin gijesini gündiz edip işleýän arheologlarymyzyň täze taryhy tapyndylar esasynda toplan maglumatlaryny, daşary ýurtlardan getirilen golýazmalar esasynda pikir ýöredip boljak täzeçe taryhy garaýyşlary peýdalanandygyny beýan edýär.

Alty bölümden ybarat “Ruhy miras” babynda bolsa milli mirasymyzy emele getirýän ruhy-medeni gymmatlyklaryň köpöwüşginliligine üns çekilýär. Türkmen halkynyň Milli Lideriniň ylmy-filosofik eserleri watandaşlarymyzyň her biri üçin durmuş we döredijilik şamçyragydyr. Halkymyzyň şöhratly taryhyny, baý medeni mirasyny, nusgalyk döwletlilik ýörelgelerini beýan edýän, olary täze many-mazmun bilen baýlaşdyrýan bu eserler ýaş nesilleri watançylyk, belent ahlaklylyk, ýokary ynsanperwerlik ruhunda terbiýelemekde gymmatly hazynadyr. Hut şu jähetden, türkmen halkynyň Milli Lideriniň “Hakyda göwheri” atly kitaby hem halkymyzyň taryhy maglumatlara daýanýan ruhy-medeni hazynasynyň dür-merjeni bolmak bilen, nesilleriň ylham çeşmesi bolup hyzmat eder.

Arkadagly Gahryman Serdarymyzyň jöwher paýhasyndan dörän “Magtymguly - dünýäniň akyldary” täze kitabynyň Gündogaryň beýik akyldary we söz ussady Magtymguly Pyragynyň edebi mirasynyň häzirki döwürde halkara gatnaşyklaryny berkitmekde we halklaryň arasynda medeni dialogy ilerletmekde möhüm ähmiýete eýedigini belläp geçdiler. «Magtymgula düşünmegiň açary», «Magtymguly Pyragy mekdebi we türkmen magtymgulyşynaslary», «Pähim-paýhas ummany», «Döwürleriň we siwilizasiýalaryň şahyry», «Halk ýadyndan aýrylma», «Magtymguly Pyragynyň doglan gününiň 300 ýyllygy bilen bagly kabul edilen resminamalar, gutlaglar we çykyşlar», «Hakyň hem hakykatyň ýolunda» atly bölümlerden ybarat bolan täze kitapda dana şahyryň baý edebi mirasy, parasatly döredijilik mekdebi, Magtymguly Pyragynyň dünýä ýüzündäki belent sarpasy hakynda paýhasly pikirleriň öňe sürülýändigini nygtadylar. 

Gahryman Arkadagymyzyň “Hakyda göwheri” hem-de hormatly Prezidentimiziň “Magtymguly - dünýäniň akyldary” atly ajaýyp kitaplary akyldar şahyryň döredijilik dünýäsine düşünmäge aýdyň ýoldur, dury çeşmedir. Türkmen halkynyň şöhratly taryhyny, akyldar şahyrymyzyň paýhasa ýugrulan edebi mirasyny, gadymdan gelýän dilimiziň gymmatly baýlygyny çuňňur öwrenmekde nusgawy kitabyň ähmiýeti juda uludyr. Taryhy uzak müňýyllyklardan gözbaş alýan halkymyzyň baý edebiýaty, dili hem-de şöhratly taryhy bar. Şeýle şöhratly taryhy ylmy esasda öwrenmek, geçmişde ýaşap geçen parasatly akyldarlarymyzy dünýä ýaýmak asylly we beýik ýörelgedir.

Ajaýyp kitaplar nusgawy edebiýatymyzy, milli dilimiziň gymmatly baýlykdygyny çuňňurlygy bilen giňişleýin beýan edýär. Bu parasatly sözler akyldar şahyryň eserlerine akyl ýetirmek üçin hem, dünýä düşünmek üçin hem beýik pikirlerdir. Şonuň üçin hem şeýle parasatly sözlerden ugur alyp, şahyryň eserlerini wagyz etmek, ýaş nesillere ýetirmek biziň her birimiziň möhüm ugrumyz bolup durýar. Çünki şöhratly taryhymyz hem akyldar şahyryň çuňňur pelsepä ýugrulan goşgulary ýaş nesilleri terbiýelemekde, milli ýörelgeleri wagyz etmekde gymmatly çeşmedir.

Tanyşdyrylyş dabarasynda çykyş edenler Gahryman Arkadagymyzyň hem-de hormatly Prezidentimiziň täze eserleriniň many-mazmunyny çuňňur öwrenip, ýaş neslimize giňden wagyz etmek her birimiziň mukaddes borjumyzdygyny beýan edip, şöhratly taryhymyz hem-de şol taryh bilen bagly saklanyp galan taryhy-medeni ýadygärliklerimiz hakynda gürrüň berilmegi, dünýäniň akyldary Magtymguly Pyragynyň doglan gününiň 300 ýyllygyny ýurdumyzda hem-de halkara derejesinde dabaralandyrmak, söz ussadynyň pähim-paýhasly döredijiligini giňden ýaýmak babatdaky taýsyz tagallalary hem-de goldaw-hemaýatlary üçin türkmen halkynyň Milli Lideri Gahryman Arkadagymyza, Arkadagly Gahryman Serdarymyza tüýs ýürekden alkyşlaryny beýan etdiler.

Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň taýsyz tagallalary netijesinde milli medeniýetimiz, sungatymyz, gadymy hem şöhratly taryhymyz dünýä ýaýylýar. Milli Liderimiziň “Hakyda göwheri” hem-de hormatly Prezidentimiziň “Magtymguly - dünýäniň akyldary” atly kitaplary nusgawy edebiýatymyzyň paýhas hazynasydyr. Gadymdan gelýän milli medeniýetimizi, nusgawy edebiýatymyzy dünýä ýaýýan, ýaşlary milli ruhda terbiýelemäge giň mümkinçilikleri döredýän Gahryman Arkadagymyzyň, Arkadagly Gahryman Serdarymyzyň janlary sag bolsun, beýik işleri üstünliklere beslensin!

Şamar BAÝRAMDURDYÝEWA,
Lebap welaýat kitaphanasynyň kitaphanaçysy.