Bu döwür, bu eýýam türkmen paýhasynyň, türkmen ruhubelentliginiň, türkmen zähmetsöýerliginiň rowaçlanýan, beýik işler, döwletli tutumlar bilen galkynýan, gülleýän zamanasy hökmünde göwünleri ganatlandyrýar. Hormatly Prezidentimiz Serdar Berdimuhamedowyň “Magtymguly - dünýäniň akyldary” atly kitaby ähli halkymyz we giň okyjylar köpçüligi üçin bahasyna ýetip bolmajak sowgat boldy. Türkmen, rus we iňlis dilleriniň hersinde aýratyn kitap görnüşinde çap edilen täze kitapda beýik akyldar şahyrymyz Magtymguly Pyragynyň edebi mirasynyň, dünýä edebiýatyna goşan ägirt uly goşandynyň, akyldaryň ömrüni we döredijiligini öwrenmek boýunça ýazylan ylmy işleriň, şirin dilli söz ussadynyň şanly toýy bilen bagly geçirilen çäreleriň giňişleýin açylyp görkezilmegi oňa bolan gyzyklanmany has-da artdyrýar.

“Halkara parahatçylyk we ynanyşmak ýylynyň” ilkinji günlerinde elimize gowşan Arkadagly Gahryman Serdarymyzyň “Magtymguly - dünýäniň akyldary” kitabynyň “Magtymgula düşünmegiň açary”, “Magtymguly Pyragy mekdebi we türkmen magtymgulyşynaslary”, “Pähim-paýhas ummany”, “Parahatçylygyň şahyry”, “Döwürleriň we siwilizasiýalaryň şahyry”, “Halk ýadyndan aýrylma”, “Magtymguly Pyragynyň doglan gününiň 300 ýyllygy bilen bagly kabul edilen resminamalar, gutlaglar we çykyşlar” we “Hakyň hem hakykatyň ýolunda” atly bölümleriniň her birini okanymyzda akyldar şahyryň beýikligine, döwletlilik bagtynyň mukaddesligine has aýdyň göz ýetirýäris. Hormatly Prezidentimiz “Magtymguly - dünýäniň akyldary” atly täze kitabynda: “Magtymgulynyň edebi mekdebini dowam etdirijiler, akyldar şahyryň çeper keşbini öz eserlerinde beýan edijiler bilen birlikde, dana Pyragynyň ylmy-edebi mirasyny öwrenijiler hem aýratyn ýatlanylmaga mynasyp” diýip belleýär.

Kitapda beýik akyldar şahyrymyzyň ömrüni, edebi mirasyny öwrenmäge goşant goşan zehinli alymlaryň, professorlaryň, edebiýatçylaryň, daşary ýurtly bilermenleriň atlarynyň agzalyp, olaryň bitiren işlerine baha berilmegi, abraý-mertebelerini has-da belende götermegi döwletimiz tarapyndan olara goýulýan çäksiz sylag-sarpanyň subutnamasy hökmünde buýsanjymyzy artdyrdy. Akyldar şahyrymyz Mäne baba, Mahmyt Pälwan, Omar Haýýam, Hoja Ahmet Ýasawy, Azady, Andalyp ýaly danalaryň edebi gymmatlyklaryndan ruhlanyp, kämil eserleri döredipdir. Şeýlelikde, Magtymguly Pyragy halkyň milli durmuşyna esaslanýan mekdebi döredipdir. Magrupy, Şabende, Seýdi, Kemine, Mollanepes, Zelili, Kätibi ýaly ençeme nusgawy şahyrlarymyz Magtymguly Pyragy mekdebinden täsirlenip, ony dowam etdiripdirler we ajaýyp eserleri döredipdirler. Magtymguly Pyragynyň şygryýet mekdebi asyrlardan asyrlara, nesillerden nesillere geçip, bu günki gün dünýäde nusgalyk edebi mekdebe öwrüldi. Hormatly Prezidentimiziň täze kitaby bolsa şol mekdebiň ajaýyp waspnamasydyr.

Dana Pyragy Ýer ýüzünde ynsanperwerligi, doganlyk gatnaşyklaryny, özara düşünişmegi pugtalandyrmakda köp işleri bitirdi. Magtymguly Pyragynyň goýup giden edebi mirasy umumadamzat medeniýetiniň altyn hazynasyna girdi. Şahyryň eserleri we pelsepewi pikirleri edebi gymmatlyk hökmünde adamzat durmuşynda möhüm orun eýeleýär. Ol diňe bir ýurdumyzyň däl, tutuş sebitiň, dünýä halklarynyň edebi mirasyna uly goşant goşdy. Akyldaryň ynsanperwer pikir-garaýyşlary hemişelik Bitarap ýurdumyzyň alyp barýan hoşniýetli, parasatly içeri we daşary syýasatynda möhüm orny eýeleýär. Hut şonuň üçin-de döwlet Baştutanymyz Serdar Berdimuhamedow bu täze kitabynda: “Biz Magtymguly Pyragynyň ylmy-edebi mirasyny dünýä ýaýmak bilen, şahyryň adamzat bähbitli hikmet-paýhaslaryny durmuş ýüzünde hasyl edýäris. Şahyryň arzuw-umytlaryny hakykata öwürýäris. Şol pähim-paýhaslar, öwüt-nesihatlar, jaý maslahatlar arkaly halklaryň arasyndaky dost-doganlygy berkidýäris.

Medeni gatnaşyklary ilerletmek bilen, dünýä halklarynyň arasynda ýürekleriň we maksatlaryň bir bolmagyny gazanýarys” diýip belleýär. Arkadagly Gahryman Serdarymyzyň täze kitaby tutuş dünýäde ýüreklere ýol salýar, kalplaryň töründen orun alýar, çuňňur paýhasy beýan edýär.

Selbi HUDAÝBERDIÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň diller kafedrasynyń mugallymy.