Berkarar döwletiň täze eýýamynyň Galkynyşy döwründe durmuşa ornaşdyrylýan beýik işler halkymyzyň bähbidini nazarlaýar. Gahryman Arkadagymyzyň beýik başlangyçlaryny üstünlikli dowam edýän hormatly Prezidentimiz ähli ugurlar boýunça döwrebap özgertmeleri durmuşa geçirýär. Häzirki ajaýyp döwrümizde ýurdumyz dünýäde belent abraýa eýe bolýar, halkara guramalar bilen işjeň hyzmatdaşlygy alyp barýar. Ýurdumyzyň öňe süren başlangyjy esasynda BMG-niň Baş Assambleýasynyň “2025-nji ýyl - Halkara parahatçylyk we ynanyşmak ýyly” atly Kararnamany kabul etmegi çuňňur many-mazmuna eýedir. Şanly ýylda ýurdumyzyň hemişelik Bitaraplygynyň 30 ýyllygynyň Milletler Bileleşiginiň döredilmeginiň 80 ýyllygy bilen gabat gelmegi onuň ähmiýetini has-da artdyrýar.

Türkmenistanyň halkara giňişliginde Durnukly ösüş maksatlary, Öňüni alyş diplomatiýasy, derwaýys sebit meseleleri boýunça öňe sürýän daşary syýasy başlangyçlary yzygiderli goldanylýar. Şol teklipdir başlangyçlar esasynda BMG-niň Baş Assambleýasynyň Kararnamasy bilen 12-nji dekabryň “Halkara Bitaraplyk güni” diýlip yglan edilmegi, parahatçylygyň, howpsuzlygyň we durnukly ösüşiň bähbidine Bitaraplygyň dostlary toparynyň döredilmegi döwletimiziň dünýäde syýasy durnuklylygy saklamak, oňa goldaw bermek, hoşniýetli goňşuçylyk, dostluk, hyzmatdaşlyk gatnaşyklaryny ösdürmek işinde ygtybarly hyzmatdaşdygyny tassyklaýar.

Hormatly Prezidentimiziň Birleşen Milletler Guramasynyň Baş Assambleýasynyň 78-nji sessiýasyndaky taryhy çykyşynda öňe süren döredijilikli başlangyçlary hem Bitaraplygyň türkmen nusgasynyň ähmiýetini artdyrdy. Döwlet Baştutanymyzyň bu taryhy çykyşy Garaşsyz Türkmenistanyň hemişelik Bitaraplyk ýörelgelerine döredijilikli we jogapkärçilikli çemeleşmek bilen, Garaşsyzlyk ýyllarynda bütin dünýäde howpsuzlygyň bölünmezligi we bitewüligi, onuň dürli ugurlarynyň biri-birinden aýrylmazlygy ýörelgesini berk hem-de durnukly goramakda durmuşa geçiren işleriniň ähmiýetini has çuň mazmun bilen baýlaşdyrdy.

Bilşimiz ýaly, Türkmenistanyň “Halkara parahatçylyk we ynanyşmak ýylynyň” dowamyndaky işleriniň we ileri tutýan ugurlarynyň Konsepsiýasy tassyklanyldy. Şu ýylda eziz Watanymyzda Birleşen Milletler Guramasy bilen hyzmatdaşlygyň çäklerinde möhüm meýilnamalary amala aşyrmak göz öňünde tutulýar. Munuň özi ikitaraplaýyn hyzmatdaşlygyň has-da ilerledilmegine giň ýol açar. Kabul edilen Konsepsiýada häzirki zamanyň ählumumy gün tertibiniň esasy meselelerine ýurdumyzyň garaýyşlary beýan edilýär. Şeýle-de, özara ynanyşmak, dialog we jogapkärçilik esasynda bitewi maksatlara ýetmek üçin döwletleriň tagallalaryny birleşdirmek baradaky garaýyşlar kesgitlenilýär.

Döwletimiz BMG-niň ygtybarly we jogapkärli hyzmatdaşy hökmünde BMG-niň Baş Assambleýasynyň mejlislerine işjeň gatnaşýar. Türkmenistanyň BMG-niň Baş Assambleýasynyň birnäçe mejlislerinde wise-başlygyň borçlaryny belent abraý bilen ýerine ýetirendigini hem-de ýurdumyzyň döredijilikli başlangyçlary esasynda birnäçe halkara ähmiýetli Kararnamalaryň kabul edilendigini aýratyn nygtamak gerek. Hormatly Prezidentimiziň baştutanlygynda Türkmenistan oňyn Bitaraplyk, parahatçylyk söýüjilik, hoşniýetli goňşuçylyk we netijeli halkara hyzmatdaşlyk ýörelgelerine esaslanýan daşary syýasaty üstünlikli durmuşa geçirýär. Garaşsyz, hemişelik Bitarap Türkmenistanyň sebit we dünýäniň beýleki döwletleri bilen özara bähbitli ykdysady hyzmatdaşlygy hem-de netijeli halkara gatnaşyklary ösdürmegi boýunça ikitaraplaýyn we köptaraplaýyn resminamalara gol çekildi, möhüm ylalaşyklar gazanyldy.

Garaşsyz Watanymyzda amala aşyrylýan il-ýurt bähbitli, umumadamzat ähmiýetli beýik işler, gazanylýan uly üstünlikler halkymyzyň guwanjyny goşalandyrýar. Gahryman Arkadagymyzyň nygtaýşy ýaly, adamzadyň beýik geljegi parahatçylygyň üpjün edilmegi bilen bina bolýar. Türkmenistanyň hemişelik Bitaraplygy adamzadyň öňünde geljege barýan iň ygtybarly ýollary, adalatyň hem ýeňşiň ýollaryny açýar. “Halkara parahatçylyk we ynanyşmak ýyly” ata Watanymyz, bagtyýar halkymyz üçin asudalygyň, agzybirligiň, gazanylýan uly üstünlikleriň ýylydyr. Dünýäde parahatçylyk söýüjilikli syýasaty dabaralandyrýan Gahryman Arkadagymyzyň, Arkadagly Gahryman Serdarymyzyň il-ýurt bähbitli işleri rowaçlyklara beslensin!

Begenç AMANOW,
Myrat Garryýew adyndaky Türkmenistanyñ Döwlet lukmançylyk uniwersitetiniñ Kazyýet lukmançylygy kafedrasynyñ mugallymy.