Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda alnyp barylýan parasatly içeri hem-de daşary syýasatyň netijesinde ýurdumyz parahatçylygyň, abadançylygyň, asudalygyň mekanyna öwrülýär. Muňa aýdyň mysal hökmünde, BMG-niň Baş Assambleýasy tarapyndan Türkmenistanyň başlangyjy bilen “Merkezi Aziýa - parahatçylyk, ynanyşmak we hyzmatdaşlyk zolagy” atly kabul edilen Kararnamany agzap geçmek bolar. Dünýä ähmiýetli bu işler bilim işgärlerini hem buýsandyrýar. Hut şonuň üçin hem bu babatda wagyz-nesihat işlerini alyp barmak, ýaş nesillere halkymyzyň parahatçylyk söýüjilik ýoluny düşündirmek asylly maksadymyz bolup durýar.

Häzirki wagtda bilim özgertmeleri üstünliklere beslenýär we ýaşlaryň giň dünýägaraýşy üpjün edilýär. Ýaşlary milli ruhda terbiýelemek, olarda Watana, il-güne wepalylygy ösdürmek möhüm ugurlaryň biridir. Şunda parahatçylyk söýüjilik ýolumyz, hoşniýetlilik ýörelgelerimiz hakynda wagyz etmek möhümdir. Ýurdumyzyň hemişelik Bitaraplygynyň 30 ýyllyk toýuna barýan ýylymyz bolan “Halkara parahatçylyk we ynanyşmak ýylynda” bu asylly işler rowaçlanýar. Bu alnyp barylýan nusgalyk işleriň dünýäde parahatçylygy we ynanyşmagy wagyz etmekde möhüm ähmiýeti bardyr.

Berkarar döwletiň täze eýýamynyň Galkynyşy döwründe ýurdumyzyň gülläp ösmegi, halkymyzyň abadan, bagtyýar durmuşda ýaşamagy, döredijilikli zähmet çekmegi we has oňaýly dynç almagy babatda ähli şertler döredilýär. Şu günki bagtyýar durmuşymyzda ýurdumyzyň dürli künjeklerinde peýda bolýan täze desgalardyr binalar diňe bir ilatyň ähli ýaşaýyş oňaýlyklaryndan peýdalanyp ýaşamaklaryna şert döretmek bilen çäklenmän, eýsem, döredijilikli zähmet çekmäge, Watanymyzyň ösüşine buýsanmaga, ýurdumyzyň mundan beýläkki ykdysady, medeni ösüşlerine mynasyp goşant goşmaga ruhlandyrýar. Bu işler “Berkarar döwletiň täze eýýamynyň Galkynyşy: Türkmenistany 2022 - 2052-nji ýyllarda durmuş-ykdysady taýdan ösdürmegiň Milli maksatnamasy” esasynda alnyp barylýar. Bu alnyp barylýan beýik işler ýaşlary hem tüýs ýürekden buýsandyrýar we ylym-bilim öwrenmäge ruhlandyrýar.

Halkymyzyň gadymdan gelýän parahatçylyk söýüjilikli, päk niýetli, ynsanperwer däplerimizi dünýä ýaýmak, ýaş nesliň kalbyna guýmak hemmämiziň watançylyk borjumyz bolup durýar. Bilim işgärleriniň öňünde durýan uly wezipe oňyn bitaraplygymyzyň gymmatyny ýaş nesillere düşündirmekdir. Bu beýik dereje türkmen halkynyň abraýyny belende göterýär. Türkmenistanyň hemişelik Bitaraplyk hukuk ýagdaýy BMG-niň Baş Assambleýasy tarapyndan iki gezek ykrar edildi.

Birleşen Milletler Guramasynyň Baş Assambleýasynyň “2025-nji ýyl - Halkara parahatçylyk we ynanyşmak ýyly” atly Kararnamasy parahatçylygy ösdürmegi maksat edinip, BMG-niň dürli ýyllarda bu ugurda kabul eden resminamalarynyň düzgünlerini berjaý etmegi, öňüni alyş diplomatiýasyny yzygiderli ösdürmegi, parahatçylyk medeniýetini berkitmegi, raýat jemgyýetiniň alyp barýan işini goldamaga çenli köp mesele boýunça çagyryşlardyr maslahatlary, teklipleri öz içine alýar. Türkmenistanyň bu ýylyň dowamyndaky işleriniň we ileri tutýan ugurlarynyň Konsepsiýasynda hut şu babatda meýilleşdirilýän çäreler jikme-jik beýan edilendir. Parahatçylygy hem-de ynanyşmagy üpjün etmek wezipesi döwletimiziň syýasatda, ykdysadyýetde, ynsanperwer ugurda alyp barýan ähli halkara işleriniň, dünýä giňişliginde ileri tutýan garaýyşlarynyň esasyny düzýär.

Biziň ýurdumyzda ýaşlaryň bagtyýar durmuşda ýaşamagy, bilim almagy, zähmet çekmegi üçin ähli mümkinçilikler döredilendir. Häzirki wagtda giň gözýetimli, täzeçe pikirlenmegi başarýan, döwrüň ösen talaplaryna düşünýän, innowasiýalara esaslanýan ykdysadyýeti ösdürmäge goşant goşup bilýän ýaşlary ýetişdirmek möhüm wezipe bolup durýar. Ýurdumyzyň bilim ulgamynyň işini kämilleşdirmekde alyp barýan işleri üçin hormatly Prezidentimize tüýs ýürekden alkyş aýdýarys. Goý, Gahryman Arkadagymyzyň hem-de Arkadagly Gahryman Serdarymyzyň ýurdumyzy gülledip ösdürmekde alyp barýan beýik işleri hemişe üstünliklere beslensin!

Sadap HALLYÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Lukmançylyk fizikasy we informatikasy kafedrasynyň mugallymy.