Parahatçylygyň, dost-doganlygyň mekany hökmünde tanalýan Garaşsyz, hemişelik Bitarap Türkmenistan Watanymyzda her ýylyň bereketli güýz paslynda bellenilýän Garaşsyzlyk güni türkmen halkynyň özygtyýarlylyk, erkinlik hakynda asyrlarboýy eden arzuwynyň hasyl bolandygyny, berkarar döwletiň, bagtyýar durmuşyň eýesidigini alamatlandyrýan şanly senedir. Arkadagly Gahryman Serdarymyzyň belleýşi ýaly, «Garaşsyzlyk biziň şöhratly geçmişimizdir, bagtyýar şu günümizdir, beýik geljegimizdir. Garaşsyzlyk biziň dünýä dolan belent abraýymyzdyr hem-de şan-şöhratymyzdyr». Hut şonuň üçinem bu şanly sene her ýylda belent maksatlara galkyndyrýan naýbaşy baýram hökmünde buýsanç bilen bellenip geçilýär.

Mukaddes Garaşsyzlygymyzyň şanly 34 ýyllyk toýunyň öňüsyrasynda geçilen menzillere ser salanyňda, kalbyňy buýsançly duýgular gurşap alýar. Çünki niräňe seretseň, göwün göteriji gözellik, asyrlara barabar işler. Ýaşyl Baýdagymyzyň pasyrdap durşuny, asuda asmanyň astynda, parahat Zeminiň üstünde nesilleriň bagtyýarlygyny, gözellikleri keşbine siňdiren Diýarymyzyň ajaýyplyklaryny synlanyňda, Garaşsyzlygymyzyň ykballaryň özgermegine ýetiren täsiri örboýuna galýar. Şol pursatda abadan, erkana ýaşaýşyň hözirini görmegiň tapylgysyz bagtdygy hakynda oýlanýarsyň we şu günki ajaýyp durmuşymyza bolan buýsanjyň artyp, kalbyň joşa gelýär.

Otuz dört ýylyň içinde geçilen menzil Garaşsyz Watanyny tüýs ýürekden söýýän, ony başynyň täjine deňeýän merdana halkymyzy taryhy üstünliklere ýetirip, ýurdumyzy dünýäniň iň ösen döwletleriniň hataryna ymykly goşdy. Garaşsyzlyk ähli ugurlarda belent sepgitlere ýetmegiň esasy bolup, bu günki gün ýurdumyza röwşenlik şuglasyny saçýar.

Garaşsyzlygyň gadyr-gymmaty barha artýan häzirki döwürde halkymyzyň abadan we parahat durmuşynyň üpjün edilmegine, ýurdumyzyň halkara abraýynyň pugtalanmagyna gönükdirilen işler rowaçlyklara beslenýär. Jemgyýetçilik-syýasy özgertmeler üstünlikli amala aşyrylýar. Obalarymyzy, şäherçelerimizi, şäherlerimizi gözelleşdirmekde, ykdysadyýetimiziň ähli pudaklaryny kämilleşdirmekde, ýurdumyzy senagat taýdan gülläp ösýän döwlete öwürmekde giň gerimli maksatnamalar durmuşa geçirilýär. Ylym-bilim, saglygy goraýyş, medeniýet, sport ulgamlarynda, oba hojalygynda, nebitgaz pudagynda we beýleki ugurlarda amala aşyrylýan düýpli özgertmeler, halk hojalygynda ýetilýän belent sepgitler milli ykdysadyýetimiziň batly depginler bilen ösýändiginiň subutnamasydyr. Ata Watanymyzda gurlan täze-täze önümçilik desgalary, ýaşaýyş-durmuş maksatly binalar Garaşsyzlygymyzyň beren miweleridir. Bu ajaýyplyklar Garaşsyzlygyň halkymyzyň ykbalyndaky hiç zat bilen çalşyp bolmajak taryhy ornuna doly düşünmäge mümkinçilik berýär.

Bu günki gün Garaşsyz, baky Bitarap Türkmenistan Watanymyzda tutulýan belent maksatly tutumlaryň rowaçlanýandygy, durmuşa ornaşdyrylýan işleriň üstünliklere beslenýändigi başymyzy göge ýetirýär. Mukaddes Garaşsyzlygymyzdan gözbaş alýan şeýle bagtyýar hem abadan durmuşyň halkymyzyň agzybirliginiň we jebisliginiň netijesinde bolandygyny bellemek has ýakymlydyr. Şeýle beýik işleriň, taryhy özgertmeleriň şaýady bolýan halkymyz Gahryman Arkadagymyza, Arkadagly Gahryman Serdarymyza tükeniksiz alkyş aýdýar.

Berkarar döwletiň täze eýýamynyň Galkynyşy döwrüniň rowaçlyklara beslenýän günlerinde uly ruhubelentlik bilen mukaddes Garaşsyzlygymyzyň şanly 34 ýyllyk toýuny garşy alýarys. Şatlyk-şowhunly dabaralar bilen bellenilip geçiljek baş baýramymyz ýyl geçdigiçe baý many-mazmuna eýe bolup, buýsanjymyza buýsanç goşýar, kalplara joşgun hem ylham berýär.

Goý, halkyny bagtly geljege alyp barýan türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Rejepgül HAIDOWA,
Myrat Garryýew adyndaky Türkmenistanyň Döwlet lukmançylyk uniwersitetiniň Adam anatomiýasy, topografik anatomiýa we operatiw hirurgiýa kafedrasynyň uly mugallymy, dosent.