Halkara parahatçylyk we ynanyşmak ýylynda milli ykdysadyýetimiziň ähli pudaklarynda bolşy ýaly, saglygy goraýyş ulgamynda alnyp barylýan özgertmeler hem barha rowaçlanýar. Çünki ilatyň saglygyny, abadan we bagtyýar durmuşyny üpjün etmek hormatly Prezidentimiziň baştutanlygynda durmuşa geçirilýän döwlet syýasatynyň esasy maksadydyr. Bu hakykat 10-njy oktýabrda ýurdumyzda giňden bellenilen Saglygy goraýyş we derman senagaty işgärleriniň güni mynasybetli ýaýbaňlandyrylan çäreleriň mysalynda-da aýdyň açylýar.

Halkymyzyň saglygynyň goragynda duran türkmen lukmanlarynyň hünär baýramy mynasybetli «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi we ylmy maslahat, Diýarymyzyň dürli künjeklerinde saglygy goraýyş desgalarynyň düýbüni tutmak, döwrebap enjamlar bilen üpjün edilen täze saglyk merkezlerini ulanmaga bermek dabaralary ýokary ruhubelentlikde geçirildi. Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy-ensiklopedik kitabynyň XVII jildiniň hem-de «Saglygy goraýyşda ýetilen sepgitler» atly täze kitabynyň çapdan çykmagy şanly senäniň ähmiýetini has-da artdyrdy. «Türkmenistanyň dermanlyk ösümlikleri» atly düýpli ylmy işiň nobatdaky jildinde şypaly hazyna hasaplanýan 107 sany dermanlyk ösümlik barada doly we düýpli maglumatlar berilse, «Saglygy goraýyşda ýetilen sepgitler» atly kitapda «Saglyk» Döwlet maksatnamasynyň kabul edilmeginden bäri geçen 30 ýylyň dowamynda milli saglygy goraýyş ulgamyny ösdürmek babatda gazanylan üstünliklerden söz açylýar.

Lukman Arkadagymyz täze kitabynda: «Saglygyň höküm sürýän ýerinde geljege ynam hem güýçlüdir. Çünki saglyk geljegi gurmakda iň esasy sütündir» diýip belleýär. Türkmenistanyň Konstitusiýasyna laýyklykda, adamy jemgyýetiň we döwletiň iň ýokary gymmatlygy diýip ykrar edýän ýurdumyzda amala aşyrylýan «Döwlet adam üçindir!», «Watan diňe halky bilen Watandyr! Döwlet diňe halky bilen döwletdir!» diýen ýörelgeleriň binýadynda hem, ilkinji nobatda, raýatlarymyz, olaryň bagtyýar geljegi hakyndaky aladalar durandyr. Türkmen halkynyň Milli Lideriniň başlangyjy bilen işlenip taýýarlanan «Saglyk» Döwlet maksatnamasynyň üstünlikli durmuşa geçirilmegi netijesinde soňky ýyllarda ýurdumyzda halka hödürlenilýän lukmançylyk hyzmatlarynyň görnüşleri giňeldildi we hili ep-esli ýokarlandyryldy. Diýarymyzyň çar künjeginde Merkezi Aziýa sebitinde deňi-taýy bolmadyk, dünýäniň öňdebaryjy öndürijileriniň enjamlary bilen üpjün edilen bejeriş-anyklaýyş, ylmy-kliniki merkezleri, köpugurly hassahanalar, saglyk öýleri yzygiderli gurlup ulanmaga berildi.

Saglygy goraýyşda ykdysady usullar giňden ornaşdyrylyp, bu ugurdaky halkara hyzmatdaşlyk barha giň gerime eýe bolýar. Arkadag şäheriniň köpugurly hassahanasynda Saglygy goraýyş we derman senagaty işgärleriniň güni mynasybetli «Saglyk» Döwlet maksatnamasy: şanly sepgitler, möhüm wezipeler Berkarar döwletiň täze eýýamynyň Galkynyşy döwründe» ady bilen geçirilen ylmy-amaly maslahata germaniýaly, türkiýeli tejribeli lukmanlaryň hem gatnaşmagy munuň şeýledigine aýdyň şaýatlyk edýär. Şu günler bolsa «akylly» şäheriň lukmançylyk edaralarynda lukman Arkadagymyzyň «Türkmenistanyň dermanlyk ösümlikleri» atly düýpli ylmy işiniň nobatdaky jildiniň we «Saglygy goraýyşda ýetilen sepgitler» atly kitabynyň tanyşdyrylyş dabaralary geçirilýär.

Milli saglygy goraýyş we derman senagaty ulgamyny kämilleşdirmek ugrunda alnyp barylýan giň gerimli özgertmeler keselleriň öňüni almak we bejermek bilen birlikde, ilatymyzyň durmuş goraglylygy, sagdyn durmuş ýörelgeleriniň ornaşdyrylmagy, ähli ýaşdaky raýatlarymyzyň, ýaş nesillerimiziň sagdyn ösüşi üçin amatly şertleri döretmek ýaly asylly maksada gönükdirilendir. Lukmanlaryň hünär baýramçylygynyň bellenilen gününde, hormatly Prezidentimiziň gol çeken Permanyna laýyklykda, şu ugurda uzak ýyllaryň dowamynda çeken halal, yhlasly zähmeti, ýokary hünär ussatlygy bilen tapawutlanan saglygy goraýyş işgärleri döwlet sylaglary bilen sylaglanyldy. 

Halkymyzyň saglygyny goramak, ilata ýokary hilli lukmançylyk hyzmatlaryny hödürlemek babatda döredýän ajaýyp mümkinçilikleri üçin Gahryman Arkadagymyza we hormatly Prezidentimize çäksiz alkyş aýdýarys. Goý, Milli Liderimiziň hem-de Arkadagly Gahryman Serdarymyzyň janlary sag, belent başlary aman, döwletli tutumlary hemişe rowaç bolsun!

Ogulsadap DURDYÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Farmakologiýa kafedrasynyň mugallymy.