Merkezi Aziýada deňi-taýy bolmadyk Olimpiýa şäherçesi ýurdumyzda ýokary netijeli sporty ösdürmäge giň mümkinçilikler döredýär. Halkara ölçeglere doly laýyk gelýän toplumyň ähli desgalarynda dürli derejedäki ýaryşlary, şol sanda türgenleşikleri we köpçülikleýin medeni çäreleri geçirmäge zerur şertler bar. Ýurdumyzda orta we ýokary okuw mekdepleriniň arasynda geçirilýän ýaryşlardan başlap, her ýylda guralýan umumymilli spartakiadalara köp sanly adamlaryň gatnaşmagy Diýarymyzda sporta uly ähmiýet berilýändigini görkezýär.

«Türkmenistan – ruhubelentligiň we sagdynlygyň ýurdy» ady bilen umumymilli oýunlaryň geçirilmegi, Gahryman Arkadagymyzyň we Arkadagly Gahryman Serdarymyzyň köpçülikleýin bedenterbiýe-sport hereketini we ýokary netijeli sporty ösdürmek boýunça syýasatyny amala aşyrmakda uly üstünliklere ýetilýändigini tassyklaýar.

Hormatly Prezidentimiziň sport ulgamyny ösdürmek babatdaky irginsiz aladalary netijesinde, türkmen türgenleri halkara ýaryşlarda ýokary netijeleri gazanýarlar. Sagdynlygyň we ruhubelentligiň ýurdy bolan ata Watanymyzda sportuň ähli görnüşleri giň gerimde ösdürilýär, halkymyzy köpçülikleýin sporta çekmäge, sagdyn we berk bedenli ýaşlary, ussat türgenleri kemala getirmäge uly üns berilýär. Eziz Diýarymyzda welosiped we awtoulag sporty hem uly meşhurlyga eýe bolýar, sportuň suwda ýüzmek görnüşi bilen meşgullanmaga isleg bildirýänleriň sany güngünden artýar.

Muňa mysal hökmünde, indi mähriban Diýarymyzda her ýylyň 7-nji aprelinde Bütindünýä saglyk gününi halkara bileleşigi bilen ählihalk baýramçylygy hökmünde giňden belläp geçmeklik hem döwrebap däpleriň birine öwrüldi. Şu uly üstünliklere, ösüşlere we şanly wakalara beslenýän Halkara parahatçylyk we ynanyşmak ýylynda hem hormatly Prezidentimiziň hem-de Türkmenistanyň Halk Maslahatynyň Başlygy, türkmen halkynyň Milli Lideriniň hut özleriniň gatnaşmagynda we taýsyz tagallalary bilen ýurdumyzda “Sagdynlyk we bagtyýarlyk” ady bilen sport oýunlarynyň hem-de bedenterbiýe - sagaldyş hereketi giňden bellenilip geçirildi. Tutuş ýurdumyzy gurşap alan bu uly, ählihalk sport baýramçylygyna bagtyýar raýatlarymyz hem işjeň gatnaşdylar. 

Ýurdumyzda “Saglyk” döwlet Maksatnamasyndan ugur alyp, ilatymyzyň saglyk ýagdaýyny has-da gowulandyrmak, saglygy goraýyş hyzmatlaryny halkara ölçeglerine laýyklykda ösdürmek üçin innowasion tehnologiýalar ornaşdyrylan halkara merkezleri açylyp ulanylmaga berilýär. Halkymyzyň beden we ruhy sagdynlyk baradaky ýörelgeleri ileri tutulyp, adamlaryň bedenterbiýe we sport bilen yzygiderli meşgullanmaklary üçin ähli amatlyklar döredilýär. Soňky ýyllarda eziz Diýarymyz halkara sport ýaryşlarynyň sebitdäki iň iri merkezleriniň birine öwrüldi. Paýtagtymyzda we sebitlerde häzirki zaman sport toplumlary, stadionlar, aýlawlar, döwrebap atçylyk sport toplumlary, ýöriteleşdirilen sport mekdepleri gurlup, ulanmaga berilýär.

Sagdyn jemgyýet - bu ruhubelent we maksada okgunly adamlaryň jemgyýeti bolup, olar umumymilli maksatlaryň daşynda jebisleşýär, ol ýurtda durnukly durmuş-syýasy ýagdaý hem-de durnukly ösüş, raýat we demokratik kämilligi bolup durýar. “Sagdyn bedende - sagdyn ruh” diýilýär. Ýurdumyzda sagdyn jemgyýeti kemala getirmek üçin döwlet tarapyndan ähli şertler döredilýär. Sagdyn ýaşaýyş ýörelgelerini ýaýbaňlandyrýan dabaralar ýaş nesliň Arkadagly Gahryman Prezidentimiziň başlangyçlaryny ilkinjiler bolup goldaýandyklaryny ýene bir ýola subut etdi. Sporty ösdürmek, jemgyýetde sagdyn durmuş ýörelgelerini berkarar etmek şu günümiziň ajaýyp nyşanyna öwrüldi. Döredilýän mümkinçiliklerden ýerlikli peýdalanýan ýaşlarymyz bu günki gün Watanymyzda we halkara derejesinde geçirilýän sport bäsleşiklerinde baýrakly orunlara mynasyp bolup, ýaşyl Tugumyzy al asmanda parladýarlar. Ýaşlarymyzyň gazanýan üstünlikleri bolsa biz - mugallymlary çäksiz buýsandyrýar. 

Döwlet Baştutanymyzyň taýsyz tagallalary netijesinde ýurdumyzyň dünýäniň iň abraýly sport ýaryşlaryny türkmen döwletinde geçirmäge hukuk gazanmagy hem sport ulgamynda uly ösüşlere ýetilýändiginiň subutnamasydyr. Sport diňe bir beden işjeňligini kadalaşdyrman, ol ruhy dünýäňi, aň-düşünjäňi hem kämilleşdirýär. Soňky ýyllarda ýaşlaryň akyl zähmetiniň, döredijilik üstünlikleriniň ýygjamlaşmagynyň aglabasy sportuň berýän oňyn netijeleridir. Şol nukdaýnazardan ugur alyp, raýatlarymyzyň 7 ýaşdan 70 ýaşa çenli ählisi diýen ýaly sportuň haýsy hem bolsa bir görnüşi bilen meşgullanýar.

Goý, il-ýurt bähbitli beýik işlere badalga berýän, türkmen sportunyň abraý-mertebesini beýgeldip, şanyny dünýä doldurýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Ogulkeýik ANNAMUHAMMEDOWA,
Myrat Garryýew adyndaky Türkmenistanyň Döwlet lukmançylyk uniwersitetiniň Endokrinologiýa kafedrasynyň müdiri.