Halkymyzyň saglygyny ýurduň baýlygyna deňeýän Arkadagly Gahryman Serdarymyzyň aladasy bilen, her bir raýatyň sagdyn bolmagy ugrunda ähli şertler döredilýär. Berkarar döwletiň täze eýýamynyň Galkynyşy döwründe ilatyň saglygyny berkitmekde, keselleriň öňüni almakda, adamyň ömrüni uzaltmakda we şol bir wagtyň özünde, halkara talaplara laýyk gelýän, maddy tehniki üpjünçiligi ýokarlandyrmakda, öňdebaryjy dünýä tejribesini ornaşdyrmakda döwlet tarapyndan ägirt işler amala aşyrylýar.

Berkarar döwletiň täze eýýamynyň Galkynyşy döwründe hormatly Prezidentimiziň taýsyz tagallalary bilen, adam saglygy hakynda edilýän aladanyň bimöçberdigini gündelik durmuşymyzda aýdyň görmek bolýar. Muňa «Garaşsyz, baky Bitarap Türkmenistan — bedew batly at-myradyň mekany» ýylynda bellenilip geçilen Türkmenistanyň saglygy goraýyş we derman senagaty işgärleriniň güni mynasybetli paýtagtymyzda açylyp ulanmaga berlen döwrebap lukmançylyk merkezleriniň mysalynda ýene bir ýola aýdyň göz ýetirmek bolýar.

Bu hünär baýramynyň dabaralary uludan tutulyp, Gahryman Arkadagymyzyň gatnaşmagynda «Arçman» şypahanasynda goşmaça täze bejeriş merkeziniň binalar toplumynyň, hormatly Prezidentimizň gatnaşmagynda Halkara onkologiýa ylmy-kliniki merkeziniň, Stomatologiýa merkeziniň hem-de Halkara pediatriýa merkeziniň açylyş dabaralary bilen utgaşdy. Gahryman Arkadagymyzyň döwet galamyndan çykan «Türkmenistanyň dermanlyk ösümlikleri» atly köp jiltli ylmy-ensiklopedik kitabynyň XVIII jildiniň neşir edilmegi ýurdumyzyň saglygy goraýyş we derman senagaty işgärleri üçin ajaýyp baýramçylyk sowgady boldy.

Sag­ly­gy go­ra­ýyş we der­man se­na­ga­ty iş­gär­le­ri­niň gü­nü­ne ba­gyş­la­nyp ge­çi­ri­len «Sag­ly­gy go­ra­ýyş, bi­lim we sport Ber­ka­rar döw­le­tiň tä­ze eý­ýa­my­nyň Gal­ky­ny­şy döw­rün­de» at­ly hal­ka­ra ser­gi hem ýur­du­my­zyň ösüş­le­ri­niň mö­hüm ugur­la­ry­ny bir ýe­re jem­le­di. Ser­gi­de sag­ly­gy go­ra­ýyş ul­ga­my­nyň ga­za­nan­la­ry bi­len bir­lik­de, bi­lim ul­ga­myn­da ga­za­nyl­ýan üs­tün­lik­le­riň, döw­re­bap okuw teh­no­lo­gi­ýa­la­ry­nyň we in­no­wa­sion çe­me­leş­me­le­riň gör­ke­zil­me­gi aý­ra­tyn äh­mi­ýe­te eýe­dir. Çün­ki sag­dyn dur­muş ýö­rel­ge­le­ri­ni ýaş nes­liň aňy­na or­naş­dyr­mak, sag­lyk me­de­ni­ýe­ti­ni ös­dür­mek we bi­lim ar­ka­ly jem­gy­ýet­çi­lik jo­gap­kär­çi­li­gi­ni ber­kit­mek gel­je­giň bag­ty­ýar jem­gy­ýe­ti­ni ke­ma­la ge­tir­me­giň mö­hüm şert­le­ri­dir.

Paýtagtymyzdaky lukmançylyk merkezleri bilen bir hatarda, Kardiologiýa ylmy-kliniki merkezli hassahanada, Halkara Fiziologiýa ylmy-kliniki merkezinde, Halkara Sagaldyş-dikeldiş merkezinde, şeýle hem Jemgyýetçilik saglygy we iýmit merkezinde «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara ylmy maslahat hünär baýramy mynasybetli guralýan çäreleriň üstüni ýetirdi. Maslahat «Kardiologiýa», «Iç keseller, ýokanç däl keselleriň patofiziologiki soraglary we sagdyn bedeniň fiziologiýasynyň meseleleri», «Newrologiýa we reabilitasiýa-fizioterapiýa» hem-de «Jemgyýetçilik saglygy we epidemiologiýa» atly bölümlerden ybarat bolup, lukmançylygyň bu ugurlarynda ylmy pikir alyşmalary özünde jemledi.

Häzirki wagtda ýurdumyzda her bir raýatyň we ýaş nesilleriň saglygyny berkitmek we öňüni alyş çäreleriniň netijeliligini ýokarlandyrmak işine has işjeň gatnaşmak ugrunda uly işler amal edilýär we köpçülikleýin habar beriş serişdeleriniň, telewideniýe we radiogepleşikleriň hem-de jemgyýetimiziň ähli pudaklarynda, şol sanda talyplaryň, mekdep okuwçylarynyň, çagalar baglaryna gatnaýanlaryň we olaryň ene-atalarynyň arasynda düşündiriş-öňüni alyş çäreleri işjeňleşdirilýär we ýokanç kesellere garşy göreşmek barada wagyz-nesihat işleri alnyp barylýar.

Ýurdumyzda her bir raýatyň saglygyny goramaga we berkitmäge bolan konstitusion hukugyny üpjün etmek maksady bilen, maddy-enjamlaýyn binýadyň pugtalandyrylmagyny; sagdyn ilatyň emele gelmegine oňyn täsir edýän şertleriň döredilmegini; keselleriň öňüni almagyň ýokary derejede ösdürilmegini; amaly lukmançylyga täze ylmy açyşlaryň, innowasion usullaryň ornaşdyrylmagyny; ilata ýokary tehnologiýaly lukmançylyk hyzmatlarynyň elýeterliliginiň üpjün edilmegini özünde jemleýän ýurdumyzyň saglygy goraýyş ulgamyny özgertmek we döwrebaplaşdyrmak boýunça uly işler geçirilýär.

Saglyk gözelligiň sakasydyr. Sagdyn jemgyýet ‒ sagdyn döwletiň özenidir. Halkara parahatçylyk we ynanyşmak ýylynda kabul edilýän milli maksatnamalar halkymyzyň durmuş goraglylygyny üpjün etmegiň düzüm bölekleriniň biri bolan, raýatlarymyzyň saglygyny goramaga bolan hukuklarynyň durmuşa geçirilmegini üpjün etmekde uly ähmiýete eýedir. Bu işler ilatymyzyň durmuş derejesiniň ýokarlanmagyna ýardam edýär.

Öz halkyny abadançylygyň hem berkararlygyň täze belentliklerine tarap okgunly öňe alyp barýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Jennet ÖWEZOWA,
Türkmenistanyň Telekommunikasiyalar we informatika institutynyň Ýokary matematika kafedrasynyň mugallymy.