Berkarar döwletiň täze eýýamynyň Galkynyşy döwründe eziz Diýarymyzyň ähli ýerlerinde dünýä hil derejesindäki enjamlar bilen üpjün edilen saglygy goraýyş desgalarynyň, sagaldyş we dynç alyş merkezleriniň, şypahanalaryň, sport desgalarynyň yzygiderli gurlup ulanmaga berilmegi adamlaryň saglygyny goramagyň, jemgyýetimizde sagdyn durmuş ýörelgesiniň, sportuň rowaçlanmagyny üpjün etmegiň döwlet syýasatynyň möhüm ugurlarynyň biridiginiň aýdyň subutnamasydyr.

Ajaýyp hem-de eşretli zamanamyzda raýatlaryň saglygyny goramakda, bagtyýar, sagdyn, eşretli durmuşyny üpjün etmekde dünýä nusgalyk işler durmuşa geçirilýär. Muny hormatly Prezidentimiziň: “Ýurdumyzda adamyň saglygy jemgyýetiň we döwletiň iň ýokary gymmatlygy bolup durýar. Şoňa görä-de, ilatyň saglygyny goramak, keselleriň öňüni almak we olary ýok etmek, saglygy goraýşy we derman senagatyny dünýä derejesinde ösdürmek boýunça köp işler amala aşyrylýar” diýen dürdäne sözleri hem aýdyň tassyklaýar. Raýatlaryň, esasan hem, ýaş nesilleriň sagdyn, ruhubelent, ylymly-bilimli adamlar bolup ýetişmekleri, ýaramaz endiklerden daşda durmaklary babatda alnyp barylýan işler häzirki wagtda barha giň gerime eýe bolýar. Döwletimizde adam we onuň saglygy baradaky aladanyň elmydama üns merkezinde durýandygynyň güwäsine öwrülen bu işlere goşant goşmak her birimiziň borjumyzdyr.

Gahryman Arkadagymyzyň çäksiz aladalary netijesinde ýurdumyz sagdynlygyň hem-de bagtyýarlygyň ýurduna öwrüldi. Ilatyň saglygyny berkitmekleri üçin döwrebap sport desgalary guruldy. Ýurdumyza dürli ýokanç keselleriň ýok edilendigi hakyndaky köpsanly halkara güwänamalaryň gowşurylmagy Türkmenistanda Gahryman Arkadagymyzyň taýsyz tagallasy bilen kämil derejä ýetirilen saglygy goraýyş ulgamynyň milli nusgasynyň netijeli häsiýete eýe bolýandygynyň we onuň halkara bileleşigi tarapyndan doly ykrar edilýändiginiň aýdyň subutnamasydyr. Şunda möwsümleýin ýokanç kesellerden goranmak köp babatda biziň özümize baglydyr. Biziň her birimiz öz saglygymyz barada alada edip, maşgala lukmanlarymyz bilen maslahatlaşyp durmaly.

Halkyň abadan we bagtyýar durmuşy baradaky alada ýurdumyzyň döwlet syýasatynyň baş maksadydyr. Şonuň netijesinde Garaşsyz, hemişelik Bitarap Türkmenistan sagdynlygyň we ruhubelentligiň mekany hökmünde uly halkara abraýa eýedir. Bizi bu belent mertebäniň eýesi eden Gahryman Arkadagymyz “Türkmenistan - sagdynlygyň we ruhubelentligiň ýurdy” atly ajaýyp kitabynda: “Iň esasy zat bolsa, döwletiň baş baýlygy bolan halkymyzyň saglygy hakdaky, onuň nesilleriniň geljegi hakdaky, halkymyzyň hemişe ruhubelent ýaşamagy hakdaky aladadyr” diýip ýazýar.

Türkmen halkynyň milli Lideri Gahryman Arkadagymyzyň ýolbaşçylygynda işlenip düzülen “Saglyk” Döwlet maksatnamasynda göz öňünde tutulan wezipeleri durmuşa geçirmek boýunça giň gerimli işler Berkarar döwletiň täze eýýamynyň Galkynyşy döwründe hormatly Prezidentimiziň parasatly ýolbaşçylygynda üstünlikli dowam etdirilýär. Saglygy goraýyş ulgamynyň dünýä ylmynyň gazananlary esasynda ýokary derejede enjamlaşdyrylmagy, paýtagtymyzda ylmy-kliniki we sagaldyş-dikeldiş merkezleriniň, etrap-şäherlerimizde, obalarymyzda döwrebap hassahanalardyr saglyk öýleriniň gurulmagy, keselleriň görnüşlerini düýpli azaltmak, adam ömrüniň dowamlylygyny artdyrmak babatda gazanylýan ägirt uly üstünlikler munuň aýdyň subutnamasydyr.

Adam sagdyn, ruhubelent bolanda, onuň zähmet çekmäge bolan ukybynyň has artýandygy, iş öndürijiliginiň ýokarlanýandygy düşnüklidir. Bu bolsa durmuşyň ähli ugurlarynda uly-uly ösüşleriň gazanylmagyny üpjün edýär. Şeýlelikde, adamlaryň döredijilik mümkinçilikleriniň artmagy saglygy goraýyş we derman senagatyny ösdürmek, has anyk aýdanyňda, şypahana-dynç alyş ulgamynyň işini kämilleşdirmek, bejeriş-öňüni alyş lukmançylyk edaralaryny gurmak arkaly hemmetaraplaýyn sagdyn jemgyýeti kemala getirmek bilen pugta baglanyşyklydyr. Şoňa görä-de, Gahryman Arkadagymyzyň hem-de Arkadagly Gahryman Serdarymyzyň bu babatdaky başlangyçlarynyň, tagallalarynyň Berkarar döwletiň täze eýýamynyň Galkynyşy döwründe hem rowaçlyklara beslenýändigini aýratyn belläp geçmek gerek.

Goý, Garaşsyz, hemişelik Bitarap Watanymyzy sagdynlygyň we ruhubelentligiň ýurduna öwürýän türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun!

Bibi ATAÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Çaga stomatologiýasy kafedrasynyň müdiri.