Hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe ata-babalarymyzdan miras galan parahatçylyk söýüjilik, agzybirlik, ynsanperwerlik, dost-doganlyk ýörelgelerimiz barha rowaçlanýar. Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň umumadamzat ähmiýetli beýik işleri halkara bileleşiginde giňden goldanylýar. Parahatçylyk söýüjilik ýoluny, agzybirlik ýörelgesini ýöredýän halkymyz ýene-de bir ajaýyp senäni - ýurdumyzyň hemişelik Bitaraplygynyň 30 ýyllygyny toýlaýar. Watanymyzyň hemişelik Bitaraplyk hukuk ýagdaýynyň şanyna toýlanylýan bu sene her birimiz üçin aýratyn ähmiýete we many-mazmuna eýedir.

Hemişelik Bitaraplyk dünýäde ykrar edilen beýik gymmatlygymyzdyr. Parahatçylygy, dostlugy, ynsanperwerligi, hoşniýetliligi, hyzmatdaşlygy we ösüşi dabaralandyrýan taglymatymyzdyr. Türkmenistan Watanymyz Birleşen Milletler Guramasynyň Baş Assambleýasynyň 1995-nji ýylyň 12-nji dekabryndaky ýörite Kararnamasy esasynda halkara gatnaşyklarynyň taryhynda ilkinji gezek hemişelik Bitaraplyk hukuk ýagdaýyna eýe bolan döwlet hökmünde şan-şöhrata eýe boldy. Şoňa görä-de, Türkmenistanyň halkara abraýynyň ýokarydygyny, ynsanperwer syýasatynyň dünýä derejesinde ykrar edilendigini aýdyň görkezýän sene hökmünde taryha girdi.

2015-nji ýylyň 3-nji iýu-nynda Birleşen Milletler Guramasynyň Baş Assambleýasynyň ýörite Kararnamasy esasynda agza döwletleriň 193-siniň goldamagynda “Türkmenistanyň hemişelik Bitaraplygy” atly Kararnamanyň ikinji gezek kabul edilmegi ýurdumyzyň parahatçylyk söýüjilik, hoşniýetli goňşuçylyk we ynsanperwerlik ýörelgelerine esaslanýan daşary syýasatyna Ýer ýüzünde ýokary baha berilýändiginiň subutnamasy boldy. Şanly ýylymyzda Birleşen Milletler Guramasynyň Baş Assambleýasynyň 79-njy sessiýasynyň 61-nji plenar mejlisinde ýurdumyzyň başlangyjy bilen “Türkmenistanyň hemişelik Bitaraplygy” atly Kararnama üçünji gezek kabul edildi. Munuň özi halkymyzyň parahatçylyk söýüjilik ýörelgesiniň dünýäde ykrar edilýändiginiň aýdyň beýanydyr. Ýurdumyz hemişelik Bitaraplyk hukuk ýagdaýyna eýe bolan gününden bäri geçen 30 ýylyň dowamynda dünýä döwletleri bilen ikitaraplaýyn diplomatik gatnaşyklary ýola goýdy. Türkmenistanyň alyp barýan oňyn daşary syýasaty bu gün hoşniýetli, özara bähbitli hyzmatdaşlyk gatnaşyklaryna esaslanýar.

Arkadagly Gahryman Serdarymyz “Magtymguly - dünýäniň akyldary” atly kitabynda şeýle belleýär: “Biz Bitaraplyk hukuk ýagdaýymyzyň ählumumy ösüşe we abadançylyga, BMG-niň strategik görkezmelerini, maksatnamalaýyn wezipelerini ýerine ýetirmäge gönükdirilendigini aýtmaga haklydyrys. Şunuň bilen baglylykda, Türkmenistan üçin iki sene - Bitaraplygynyň 30 ýyllygy we BMG-niň esaslandyrylmagynyň 80 ýyllygy aýrylmaz baglanyşyklydyr. Bitaraplygyň binýatlaýyn ýörelgeleri bolan parahatçylyga, hoşniýetli goňşuçylyga, hyzmatdaşlyga, özara düşünişmäge ygrarlylyk, halkara hukuga hormat goýmak BMG-niň Tertipnamasynyň ruhunyň we mazmunynyň beýanydyr”. Şu setirlerden görnüşi ýaly, hemişelik Bitarap Türkmenistanyň Birleşen Milletler Guramasynyň we beýleki halkara guramalaryň çäklerinde öňe sürýän başlangyçlary we teklipleri dünýä jemgyýetçiligi tarapyndan giň goldawa eýe bolýar. Ynha, Birleşen Milletler Guramasynyň Baş Assambleýasynyň 80-nji sessiýasynyň 18-nji plenar mejlisinde “Awaza syýasy Jarnamasy” atly Kararnamanyň kabul edilmegi asylly ýörelgeleriň rowaçlanmagydyr. Şeýle hem hormatly Prezidentimiziň Birleşen Milletler Guramasynyň Baş Assambleýasynyň 80-nji sessiýasynyň plenar mejlisindäki çykyşynda beýik başlangyçlary öňe sürendigini buýsanç bilen bellemek gerek.

Ýurdumyzyň dünýä bileleşigi tarapyndan goldanylýan başlangyçlary, dünýäniň dürli ýurtlary we iri halkara guramalar bilen işjeňleşýän hyzmatdaşlygy döwlet Baştutanymyzyň alyp barýan oňyn syýasy ugrunyň ykrar edilýändigini görkezýär. Hemişelik Bitaraplyk türkmen halkynyň baş mukaddeslikleriniň biridir. Halkymyzyň parahatçylyk söýüjilik ýörelgesi hemişelik Bitaraplygyň düýp mazmunyny düzýär. Şonuň üçin hem Türkmenistan umumadamzat bähbitlerini nazarlaýan beýik başlangyçlary öňe sürýär. Halkymyzyň parahatçylyk söýüjilik ýörelgelerini çuňňur öwrenmek we olara sarpa goýmak biziň her birimiziň asylly maksadymyzdyr.

Maral ANNADURDYÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Nerw keselleri we neýrohirurgiýa kafedrasynyñ assistenti.