Hemişelik Bitaraplyk ýurdumyzyň parahatçylykly ösüşini aýdyň beýan edýär. Bu asylly ýörelge halkymyzyň asyrlaryň dowamynda kämilleşdirip gelen gymmatlyklaryndan, parahatçylyk söýüjilik ýolundan gözbaş alýar. Berkarar döwletiň täze eýýamynyň Galkynyşy döwründe hormatly Prezidentimiziň alyp barýan parahatçylyk söýüjilik we ynsanperwerlik syýasaty netijesinde bu asylly ýörelgämiz dünýä ýaýylýar. Dünýäde parahatçylyk söýüjilik ýörelgesini wagyz etmek, halklar bilen hoşniýetli hyzmatdaşlygy saklamak müňýyllyklardan gelýän asylly ýolumyzdyr.

Berkarar döwletiň täze eýýamynyň Galkynyşy döwründe umumadamzat bähbitli beýik başlangyçlar rowaçlanýar. Bu beýik başlangyçlar ýurdumyzyň we dünýä halklarynyň parahat we abadan durmuşyny üpjün etmekde berk binýatdyr. Mälim bolşy ýaly, 1995-nji ýylyň 12-nji dekabry, 2015-nji ýylyň 3-nji iýuny we 2025-nji ýylyň 21-nji marty - bu şanly seneler halkymyzyň taryhynda aýratyn orun eýeleýär. Çünki şol senelerde Birleşen Milletler Guramasynyň Baş Assambleýasy Türkmenistanyň hemişelik Bitaraplygy hakynda deňi-taýy bolmadyk Kararnamany kabul etdi. Türkmenistanyň hemişelik Bitaraplyk hukuk ýagdaýy dünýä bileleşigi tarapyndan üç gezek ykrar edildi. Bu taryhy seneler ähli halkymyzda buýsanç döredýär, täze üstünliklere ruhlandyrýar. Şeýle hem, “Halkara parahatçylyk we ynanyşmak ýylynda” BMG-niň esaslandyrylmagynyň 80 ýyllyk ýubileýiniň Türkmenistanyň hemişelik Bitaraplygynyň şanly 30 ýyllygy bilen utgaşmagy ýurdumyz üçin aýratyn ähmiýetlidir.

Häzirki döwürde halkymyz abadan we parahat durmuşa buýsanyp, ýurdumyzyň ösüşlerine öz mynasyp goşandyny goşýar. Parahatlyk, ynsanperwerlik ýaly asylly maksatlaryň hatyrasyna öňe sürülýän başlangyçlar hoşniýetli hyzmatdaşlygy pugtalandyrmakda berk binýat bolup durýar. Hormatly Prezidentimiziň Birleşen Milletler Guramasynyň Baş Assambleýasynyň 80-nji sessiýasynyň plenar mejlisindäki çykyşy çuňňur many-mazmuna eýedir. Hormatly Prezidentimiz taryhy ähmiýetli beýik başlangyçlary öňe sürüp, medeni diplomatiýanyň taglymatyny, köpdilli diplomatiýany beýan etdi. Bularyň ählisi halklaryň arasyndaky dost-doganlygy pugtalandyrmakda belent başlangyçdyr, beýik taglymatdyr. Ýakynda Magtymguly adyndaky Dil, edebiýat we milli golýazmalar institutynda geçen göçme sapagymyzyň hem asyl özeni şu meselelere bagyşlandy. Gatnaşyjylaryň belleýşi ýaly, bu ugurdaky beýik başlangyçlar hemişelik Bitarap Türkmenistana uly halkara abraý getirdi.

Hormatly Prezidentimiz “Ýaşlar - Watanyň daýanjy” atly kitabynda şeýle belleýär: “Durmuşda ähli zat biri-biri bilen bagly. Parahatçylyk, gülläp ösüş, asuda asman, abadan durmuş ýaly düşünjeler bolçulygyň, bagtyýar ýaşaýşyň açary hasaplanýar. Sebäbi bolçulyk üçin abadan durmuş, bagtyýar ýaşaýyş üçin bolsa parahatçylyk hem gülläp ösüş gerek. Biziň ýurdumyzda bularyň ikisi-de bar. Ilatynyň bagtyýar ýaşaýşyny, ykdysadyýetiniň gülläp ösüşini üpjün edýän ata Watanymyzyň halkara derejesindäki abraýy, tutýan orny, ýurdumyzda geçirýän durmuş-ykdysady özgertmelerimiz ilatyň sanyna, ýaş düzümine hem täsirini ýetirýär”. Ynha, şeýle çuňňur many-mazmuna ýugrulan ajaýyp sözler biziň hemişelik Bitarap Türkmenistan döwletimize buýsanjymyzy, söýgimizi has-da artdyrýar.

Türkmenistan parahatçylyk söýüjilikli, ynsanperwerlik ýörelgelerine esaslanýan daşary syýasatyny ýöredýär, bu ýol bütin dünýä bileleşiginde giň goldawa eýe boldy. Türkmenistan Birleşen Milletler Guramasy tarapyndan ykrar edilen hemişelik Bitaraplyk hukuk ýagdaýyna eýe bolan döwlet bolup, parahatçylyk söýüjiligi dünýä ýaýýar, umumadamzat bähbitli başlangyçlary öňe sürýär. Hemişelik Bitaraplygyň çuňňur many-mazmuny bardyr. Bitaraplyk asudalyk we ýurduň ykdysady, syýasy taýdan has-da ösmegi, dünýäde halkara hyzmatdaşlygyň giňemegi, hoşniýetli gatnaşyklaryň barha ynamly ýola goýulmagydyr. Şeýle hem hemişelik Bitaraplygyň umumadamzat bähbitli beýik başlangyçlary ýola goýmakda we asylly ýörelgelerde uly manysy bardyr. Bu babatda Halkara Bitaraplyk gününi has-da dabaralandyrmak maksady bilen, “Türkmenistanyň Bitaraplygynyň 30 ýyllygyna” atly ýubileý medalyny döretmek hakynda» Türkmenistanyň Kanunynyň kabul edilmegi hem bellärliklidir.

Türkmenistan dünýäniň döwletleri bilen diplomatik gatnaşygy ýola goýup, dost-doganlyk gatnaşyklaryny ösdürýär. Şeýle hem ýurdumyz taryhy, syýasy, ykdysady we medeni aragatnaşyklar arkaly baglanyşýan goňşy ýurtlar bilen hoşniýetli gatnaşyga aýratyn üns berýär. Olar bilen dostluk we doganlyk gatnaşyklaryna, ähli pudaklarda giň hyzmatdaşlygyna öz daşary syýasy maksatlaryna üstünlikli ýetmeginiň, özygtyýarlylygyny we Bitaraplyk hukuk ýagdaýyny gorap saklamagyň wajyp kepili hökmünde garaýar. Häzirki wagtda Türkmenistan goňşuçylyk gatnaşyklaryny üstünlikli ösdürip, netijeli işleri alyp barýar. Bularyň ählisi ýurdumyzyň hoşniýetli ýörelgelere, dost-doganlyk ýoluna ygrarlydygyny aýdyň beýan edýär.

Mähri DÖWLETOWA,
Türkmenistanyň Prezidentiniň ýanyndaky Döwlet gullugy akademiýasynyň magistrleri taýýarlamak okuwynyň «Konstitusiya hukugy» ugrunyň 2-nji ýyl talyby.