Berkarar döwletiň täze eýýamynyň Galkynyşy döwründe Watanymyzda saglygy goraýyş ulgamy yzygiderli ösdürilýär. Arkadagly Gahryman Serdarymyz «Ýaşlar — Watanyň daýanjy» atly kitabynda: «Ýaşaýyş üçin ähli amatlyklar döredilen, kämil saglygy goraýyş ulgamy bolan, sagdyn durmuş ýörelgelerine eýerilýän, raýatlar hakynda ähli aladalar edilýän ýurtda adamlaryň ortaça ömrüniň dowamlylygy, çaga dogluşy artýar. Dünýädäki iň uly baýlygyň saglykdadygy şübhesiz hakykat. Halkymyzyň «Saglygym — begligim», «Saglyk — baýlyk», «Bar zadyň sakasy saglyk» ýaly nakyllary hem munuň aýdyň subutnamasydyr.

«Saglyk» Döwlet maksatnamasynyň wezipelerine laýyklykda, saglygy goramak işini häzirki döwrüň talaplaryna laýyk guramak wajyp bolup durýar. Munuň özi ýurdumyzda saglygy goraýyş ulgamynyň dünýäniň ösen döwletleriniň derejesinde kämilleşdirilmegine uly itergi berýär. Aşgabat we Arkadag şäherlerinde hem-de welaýat merkezlerinde öňdebaryjy innowasion tehnologiýalar ornaşdyrylan saglyk merkezleri, şypahanalar, ýöriteleşdirilen hassahanalar, derman senagaty kärhanalary, sport desgalary yzygiderli gurlup, ulanylmaga berilýär. Ýurdumyzda ilata edilýän lukmançylyk hyzmatlarynyň netijeliligi, hili we elýeterliligi has-da ýokarlandyrylýar.

Arkadagly Gahryman Serdarymyzyň belläp geçişi ýaly, Berkarar döwletiň täze eýýamynyň Galkynyşy döwründe ýurdumyzda saglygy goraýyş ulgamyny yzygiderli kämilleşdirmek, raýatlarymyzyň saglygyny berkitmek, ynsan ömrüniň dowamlylygyny uzaltmak, bedenterbiýäni we sporty ösdürmek, sagdyn durmuş ýörelgelerini ornaşdyrmak boýunça giň gerimli işler alnyp barylýar. Bu gün Garaşsyz, hemişelik Bitarap döwletimiz sagdynlygyň we ruhubelentligiň ýurdy hökmünde bütin dünýäde uly abraýdan peýdalanýar. Çünki milli saglygy goraýyş ulgamynda ýetilen belent sepgitler munuň subutnamasydyr. «Saglyk» Döwlet maksatnamasynda häzirki döwürde ynsan saglygyny goramagyň möhüm meselelerini çözmegiň anyk ýollary beýan edilýär. Ýurdumyzda bu maksatnamany durmuşa geçirmegiň çäklerinde milli saglygy goraýyş ulgamynda uly üstünlikler gazanyldy. Ýurdumyzda saglyk öýleri, ylmy-kliniki merkezler we beýleki maksatly desgalar dünýäniň iň ösen enjamlary, häzirki zaman tehnologiýalary bilen üpjün edilýär. Bu merkezlerde ildeşlerimiz sport bilen meşgullanyp, medeniýetli dynç alyp, saglyklaryny berkidýärler. Munuň özi adam saglygynyň has-da gowulanmagyna, ýaş nesilleriň sagdyn ösmegine ýardam edýär.

Gahryman Arkadagymyzyň işläp düzen «Saglyk» Döwlet maksatnamasynda bu ugurda uly işler göz öňünde tutulandyr. Maksatnama esasynda gurlan saglyk maksatly binalar, oba saglyk öýleri, hassahanalar, şypahanalar we beýleki desgalar, ilkinji nobatda, nesil sagdynlygyny üpjün etmäge niýetlenendir. Ýurdumyzda jemgyýetiň we döwletiň iň ýokary gymmatlygy saýylýan ynsan saglygy dogrusynda döwlet derejesinde edilýän aladalar bellenmäge mynasypdyr.

Döwlet Baştutanymyzyň «Magtymguly — dünýäniň akyldary» atly kitabynda bolsa: «Gahryman Arkadagymyzyň manyly sözlerinde, bagtyýarlyk bilen sagdynlygyň arasyndaky berk baglanyşyk häli-şindi ýatlanylýar. Dogrudanam, ähli babatda bagtyýar bolmak üçin saglyk, sagdynlyk gerek. Bu beden sagdynlygy bilen deň derejede, hatda şondan hem öňde goýulýan ýene bir sagdynlyk hakynda — düşünje sagdynlygy hakdaky sözlerdir. Bagtyýarlygyň gözbaşy sagdyn düşünjelerdir. Magtymguly Pyragynyň şygyrlary bolsa, ilkinji nobatda, ynsany sagdyn düşünjeli bolmaga çagyrýar» diýlip, ynsanyň beden we ruhy taýdan sagdynlygynyň näderejede möhümdigi barada bellenilýär.

Myrat Garryýew adyndaky Türkmenistanyň Döwlet lukmançylyk uniwersitetinde hem ýaş lukmanlary taýýarlamakda döwrebap işler alnyp barylýar. Ýokary okuw mekdebimiz daşary ýurtlaryň ösen ylmy merkezleri, hassahanalary bilen ýakyn hyzmatdaşlyk saklaýar. Saglygy goraýyş ulgamynyň obýektleriniň innowasion tehnologiýalarda keselleriň öňüni alyş we bejeriş çärelerini geçirmekde, şeýle hem ýurdumyzyň orta hünär lukmançylyk okuw mekdeplerine degişli kömegini berýär. Welaýatlardaky lukmançylyk orta hünär okuw mekdepleriniň mugallymlary bilen hünär kämilleşdiriş okuwlarynyň guralýandygyny bellemek ýakymlydyr.

Berkarar döwletiň täze eýýamynyň Galkynyşy döwründe beýleki pudaklar bilen bir hatarda, saglygy goraýyş ulgamyny hem yzygiderli kämilleşdirýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!

Alma ANNABAÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Lukmançylyk gullugynyň guralyşy we usulyýeti kafedrasynyň mugallymy.