Gahryman Arkadagymyz tarapyndan başy başlanan beýik işleri mynasyp dowam etdirýän Arkadagly Gahryman Serdarymyzyň taýsyz tagallalary bilen halkymyzyň sagdyn, abadan durmuşda ýaşamagy ähli zatdan ileri tutulýar. Şoňa görä, her bir raýatyň saglygynyň goraglylygyny üpjün etmek, ömür dowamlylygyny uzaltmak, jemgyýetde sagdyn durmuş ýörelgelerini giňden ornaşdyrmak babatda dünýä nusgalyk işler alnyp barylýar.

Ýurdumyzyň saglygy goraýyş we derman senagaty ulgamynda yzygiderli ösüşler gazanylýar. Lukmanlarymyzyň dünýä tejribesini netijeli özleşdirmegi, keselleri bejermekde halkara hyzmatdaşlygyň ilerledilmegi bilen, ýokanç keselleriň birnäçesi ýok edildi. Paýtagtymyzda, ähli sebitlerimizdäki şäherdir obalarda häzirki zaman lukmançylyk enjamlary bilen üpjün edilen döwrebap hassahanalar guruldy. Aşgabatda Halkara fiziologiýa ylmy-kliniki merkeziniň, Halkara sagaldyş-dikeldiş merkeziniň, şeýle hem Arkadag şäherinde hassahanalaryň, saglygy goraýyş desgalarynyň birnäçesiniň ulanmaga berilmegini muňa mysal hökmünde görkezmek bolar. Häzirki wagtda paýtagtymyzda Halkara stomatologiýa, onkologiýa we pediatriýa merkezleriniň gurluşyklary hem tamamlaýjy tapgyrda alnyp barylýar.

«Garaşsyz, baky Bitarap Türkmenistan — bedew batly at-myradyň mekany» ýylynda sag­dyn dur­muş ýö­rel­ge­le­ri ro­waç­lan­ýar. Şun­da luk­man­çy­ly­gyň äh­li ugur­la­ryn­da ga­za­ny­lan üs­tün­lik­ler, ýe­ti­len sep­git­ler ra­ýat­la­ryň sag­ly­gy­ny go­ra­ma­ga, be­ril­ýän luk­man­çy­lyk kö­mek­le­ri­niň hil taý­dan ýo­kar­lan­dy­ryl­ma­gy­na gö­nük­di­ri­len­dir. Eziz Di­ýa­ry­my­zyň sag­ly­gy go­ra­ýyş ul­ga­my­nyň yl­my we hu­kuk esas­la­ry­ny pug­ta­lan­dyr­mak, şä­her­le­ri­miz­de we oba­la­ry­myz­da adam sag­ly­gy ba­ra­da­ky ala­da­ny has-da güýç­len­dir­mek hor­mat­ly Pre­zi­den­ti­mi­ziň öňe sür­ýän döw­let sy­ýa­sa­ty­nyň esa­sy ugur­la­ry­nyň bi­ri­dir.

Ýeri gelende bellesek, hormatly Prezidentimiz Türkmenistanyň Halk Maslahatynyň mejlisinde eden çuňňur mazmunly çykyşynda hem halkymyzyň saglygy, abadan we bagtyýar durmuşy baradaky aladanyň möhüm orunda durýandygyny, saglygy goraýyş ulgamynda halkymyza dünýä ülňülerine laýyk gelýän ýokary hilli lukmançylyk hyzmatlarynyň hödürlenilýändigini nygtady. Häzirki wagtda paýtagtymyzda Halkara pediatriýa, Halkara onkologiýa ylmy-kliniki merkezleriniň, Stomatologiýa merkeziniň, «Arçman» şypahanasynda goşmaça 400 orunlyk binalar toplumynyň gurluşyklarynyň üstünlikli dowam etdirilmegi munuň aýdyň mysallarydyr. Ýakyn wagtda Myrat Garryýew adyndaky Türkmenistanyň Döwlet lukmançylyk uniwersitetiniň köpugurly hassahanasynyň, Indira Gandi adyndaky Aşgabat lukmançylyk orta okuw mekdebiniň täze binalar toplumynyň düýbüni tutmagyň meýilleşdirilmegi, Mary, Balkan we Lebap welaýatlarynda halkara derejeli onkologiýa merkezlerini gurmagyň göz öňünde tutulmagy örän guwandyryjydyr. Bularyň ählisi saglygy goraýyş ulgamyna innowasion tehnologiýalaryň, öňdebaryjy dünýä tejribeleriniň we ylmyň soňky gazananlarynyň işjeň ornaşdyrylmagynda möhüm ähmiýete eýedir.

Myrat Garryýew adyndaky Türkmenistanyň Döwlet lukmançylyk uniwersitetinde-de geljekki lukmanlary taýýarlamak, olara dünýäniň öňdebaryjy tejribeleri esasynda bilim bermek boýunça netijeli işler alnyp barylýar. Bu ýokary okuw mekdebi daşary ýurtlaryň ösen ylmy merkezleri, hassahanalary bilen ýakyn hyzmatdaşlyk edip, mugallymlaryň, talyplaryň hünärleriniň kämilleşmeklerine uly ähmiýet berýär. Ol saglygy goraýyş ulgamynyň innowasion tehnologiýalaryndan peýdalanyp, keselleriň öňüni alyş we bejeriş çärelerini geçirmäge, şeýle hem ýurdumyzyň lukmançylyk orta hünär okuw mekdeplerine degişli kömekleri berýär.

Alym Arkadagymyzyň keremli topragymyzda ösýän ösümlikleriň melhemlik häsiýetleri barada giňişleýin maglumat berýän «Türkmenistanyň dermanlyk ösümlikleri» atly köp jiltli ylmy-ensiklopedik kitaby diňe bir lukmanlaryň ýankitaby bolman, eýsem, halk köpçüligi üçin hem gymmatly gollanma öwrüldi. Bu gymmatly işiň esasynda dermanlyk çig mallary taýýarlaýanlar we ýygnaýjylar dermanlyk ösümlikler barada öz bilimlerini kämilleşdirýärler.

Berkarar döwletiň täze eýýamynyň Galkynyşy döwründe ýurdumyzyň saglygy goraýyş ulgamynda uly özgertmeleri durmuşa geçirip, halkymyzyň sagdyn durmuşyny üpjün etmek üçin taýsyz tagallalar edýän Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak, beýik işleri elmydama rowaç bolsun!

Merjen JARÇYÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Akuşerçilik we ginekologiýa kafedrasynyň assistenti.