Ýurdumyzda ynsan saglygyny goramak, ilatyň ömür dowamlylygyny uzaltmak ugrunda taýsyz tagallalar edilýär. Bu möhüm meselä hormatly Prezidentimiz ilkinji derejeli ähmiýet berýär. Garaşsyzlyk ýyllary içinde saglygy goraýyş ulgamy düýpli ösüşlere beslendi. Iň kämil lukmançylyk enjamlary bilen üpjün edilen saglyk merkezlerinde keselleri anyklamak we ýokary derejede bejermek işleri alnyp barylýar. Şonuň bilen birlikde ilatyň arasynda sagdyn durmuş ýörelgesi barha giňden ornaşýar. Bu bolsa her bir adamyň öz saglygy barada ýakyndan alada edýändiginden habar berýär.

Sagdyn durmuşy, saglygy goramagy ýaşaýşyň özeni hasaplaýan pederlerimiz bu babatda ençeme pähimleri döredipdirler. «Saglygym — begligim», «Baýlygyň sakasy — saglyk», «Iýeniň — az, saglygyň — saz» ýaly pähimler sagdyn durmuş ýörelgesiniň ýurdumyzda asyrlarboýy dowam edip gelýändigini subut edýär. Bu asylly ýörelge häzirki ajaýyp zamanamyzda has-da rowaçlyklara beslenýär.

Halkyň saglygy ýurduň baş baýlygydyr. Saglygy goraýyş ulgamyny has-da ösdürmek, ilata öňdebaryjy tejribelere esaslanýan ýöriteleşdirilen saglygy goraýyş kömegini bermek, keselleriň öňüni almak, adamlaryň ömrüniň dowamlylygyny uzaltmak ýurdumyzda üstünlikli amala aşyrylýan «Saglyk» Döwlet maksatnamasynyň özenini düzýär. Bu maksatnamanyň çäginde kabul edilen çözgütleriň esasynda ata Watanymyz bu günki gün sagdynlygyň we bagtyýarlygyň mekanyna öwrüldi. Ýurdumyzyň ähli künjeklerinde gurlan, iň häzirki zaman enjamlary bilen üpjün edilen saglyk öýleri, hassahanalar, merkezler adam hakdaky aladanyň döwlet syýasatynda ileri tutulýan ugurlaryň biridiginiň aýdyň nyşanydyr. Saglygy goramakda we berkitmekde täsin tebigy şertleri özünde jemleýän gojaman Hazar deňziniň türkmen kenarynyň mümkinçilikleri barada aýratyn belläsim gelýär. «Awaza» milli syýahatçylyk zolagynyň gözel keşbi, deňziň jana şypaly howasy kalbyňa melhem bolup ornaýar. Bu ýerler halkymyzyň zähmet bilen dynç alşy sazlaşykly utgaşdyrmagynyň iň ýokary derejesi bolup hyzmat edýär.

Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň taýsyz tagallalary netijesinde, Diýarymyzyň ähli ugurlary bilen bir hatarda saglygy goraýyş ulgamynda hem uly üstünliklere ýetildi. «Türkmenistanda şypahana ulgamyny ösdürmek boýunça 2021 — 2025-nji ýyllar üçin Milli maksatnama» we bu maksatnamany amala aşyrmak üçin ýerine ýetirmeli çäreleriň meýilnamasyna laýyklykda, ýurdumyzda şypahana ulgamyny ösdürmek, halkymyzyň saglygyny dikeltmek esasy ugurlarynyň biri bolup durýar. Watanymyzyň iň gymmatly baýlygy bolan ynsan saglygyny gorap saklamakda, jemgyýetimize sagdyn durmuş ýörelgelerini ornaşdyryp, halkyň, geljekki nesillerimiziň bagtyýar, asuda, parahat durmuşda ýaşamaklary ugrunda netijeli işler amala aşyrylýar.

Täsin tebigatly künjeklerde, melhem suwly çeşmeleriň golaýynda ajaýyp binagärlik keşbine eýe bolan, iň kämil lukmançylyk enjamlary bilen üpjün edilen şypahanalarda raýatlarymyz öz saglyklaryny dikeldýärler. Täze şypahanalar gurlup, bar bolanlarynyň durky täzelenip, olar dünýä ülňülerine doly laýyk gelýän ýokary hilli lukmançylyk enjamlary bilen enjamlaşdyrylýar. Şypahanalaryň her biri öz tebigy aýratynlygy bilen dürli dertlere melhemdir. Diýarymyzyň dürli künjeklerinde ýerleşýän «Arçman», «Ýyly suw», «Bagabat», «Awaza», «Mollagara», «Baýramaly», «Farap», «Daşoguz» we «Berzeňňi» şypahanalary munuň aýdyň subutnamasydyr. Olaryň ählisinde anyklaýyş, bejeriş, barlaghana bölümleri bolup, olar adamlaryň keselleriniň öňüni almaga, saglyklaryny dikeltmäge ýardam edýärler.

Her biriniň öz aýratynlygy, bejeriş usuly, duzy, palçygy, mineral suwy bardyr. Ýylyň islendik möwsüminde şypahanalarda bejergi almaga, saglygyňy dikeltmäge ähli mümkinçilik döredilendir. Mundan başga-da, şypahanalarda ýörite fitobarlar bolup, olarda Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy-ensiklopedik kitabynda beýan edilýän dermanlyk ösümliklerinden taýýarlanylan dürli görnüşli melhemlik çaýlary raýatlarymyza bejergi almakda we saglygyny dikelmekde uly ýardam berýär.

Adam we onuň saglygy hakdaky aladany ilkinji orunda goýýan, durmuşymyzyň ähli ugurlary bilen bir hatarda, saglyk ulgamynyň hem ösmegi, kämilleşmegi ugrunda tutumly işleri amala aşyrýan Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!

Begenç AMANOW,
Myrat Garryýew adyndaky Türkmenistanyň Döwlet lukmançylyk uniwersitetiniň Kazyýet lukmançylygy we hukuk kafedrasynyň mugallymy.