Saglyk — ynsan üçin iň gymmatly baýlyk. Durmuşyň hözirini görüp, emin-erkana ýaşamak, zähmet çekmek, döretmek üçin ynsana, ilkinji nobatda, jan saglyk gerek. Filosofiýanyň ägirdi Platonyň sözi bilen aýtsak, saglyk hemme zat däl, emma hemme zat saglyksyz hiç zat. Şu ýörelgeden ugur alnyp, Gahryman Arkadagymyz tarapyndan başy başlanan saglygy goraýyş ulgamyny yzygiderli döwrebaplaşdyrmak bilen bagly tutumlar Arkadagly Serdarymyzyň baştutanlygynda Berkarar döwletiň täze eýýamynyň Galkynyşy döwründe mynasyp dowam etdirilýär.

Ata Watanymyzda adam hakyndaky alada esasy orunda goýlup, onuň saglygynyň ygtybarly goralmagy üçin ähli şertler döredilýär. Hormatly Prezidentimiziň parasatly baştutanlygynda saglygy goraýşy ösdürmäge, ulgamyň maddy-enjamlaýyn binýadyny yzygiderli pugtalandyrmaga uly üns berilýär. Berkarar döwletiň täze eýýamynyň Galkynyşy döwründe bu ugurda alnyp barylýan köptaraply işleriň täze derejä çykmagy bolsa aýratyn buýsançly ýagdaýdyr.

Ýurdumyzyň saglygy goraýyş ulgamynda geçirilýän düýpli özgertmeler dowamly häsiýete eýe bolup, täze hassahanalary, bejeriş-sagaldyş edaralaryny gurmaga, olary häzirki zaman enjamlary bilen üpjün etmäge uly ähmiýet berilýär. Ýaňy-ýakynda Arkadagly Serdarymyzyň hut özüniň gatnaşmagynda Türkmenbaşy şäherinde köpugurly hassahananyň dabaraly ýagdaýda açylyp, ulanylmaga berilmegi munuň aýdyň subutnamasydyr.

Halkara güwänamalaryň 3-sine mynasyp bolan bu täze hassahananyň açylyş dabarasynda hormatly Prezidentimiz häzirki wagtda paýtagtymyzdaky Stomatologiýa merkezine ýüz tutýanlaryň sanynyň yzygiderli artýandygyny, şeýlelikde, merkeziň çägini we onuň mümkinçiliklerini artdyrmak zerurlygynyň ýüze çykýandygyny nazara alyp, hökmany ýagdaýda Aşgabatda ýene-de bir döwrebap Stomatologiýa merkezini gurmagyň möhümdigine ünsi çekdi. Döwlet Baştutanymyz täze merkeziň guruljak ýerini hem kesgitläp berdi. Merkez paýtagtymyzyň «Gaýragoýulmasyz tiz kömek» merkeziniň gabat garşysyndaky boş ýerde gurlar. 2019-njy ýylyň mart aýynda Gahryman Arkadagymyzyň gol çeken Karary esasynda gurluşygyna badalga berlen Türkmenbaşy köpugurly hassahanasynyň «Halkyň Arkadagly zamanasy» ýylynyň 15-nji aprelinde Arkadagly Serdarymyz tarapyndan uly dabara bilen açylyp, ulanylmaga berilmegidir.

Dünýäniň bu ugurdaky öňdebaryjy döwletleriniň iň kämil tehnologiýalary bilen enjamlaşdyrylan, özünde tas ähli ugurlar boýunça diýen ýaly barlaglary we bejergileri geçirmäge degişli bölümleri jemleýän bu hassahananyň ulanylmaga berilmegi hormatly Prezidentimiziň toý saparynda ýurdumyzyň günbatar sebitiniň raýatlaryna ýapylan toý serpaýydyr. Täze hassahananyň iň uly aýratynlyklarynyň biri, adyndan hem belli bolşy ýaly, onuň köp ugurlar boýunça hassalary sagaltmaga mümkinçilik berýänligidir. Bu diýildigi, näsagyň bu ýerde barlaglar we beýleki zerurlyklar üçin başga hiç ýere gitmesizden doly saglygyny dikeldip bilýändigini aňladýar. 7 gatly binalar toplumyny öz içine alýan hassahananyň halkara güwänamalaryň üçüsine mynasyp bolmagy bolsa, onuň gurluşygynyň ýokary derejede amala aşyrylandygyna, ýerleşdirilen enjamlaryň iň kämil derejä eýedigine şaýatlyk edýär.

Bilşimiz ýaly, biz halkymyzyň saglygyny gorap saklamak, onuň gadyryny bilmek babatda asylly ýörelgeleriň durmuşa geçirilýän döwründe ýaşaýarys. Mähriban Diýarymyzda bagtyýar raýatlarymyzyň saglygyny goramak maksady bilen gurulýan binalardyr desgalaryň üsti ýetirilip durulýar. Saglygy goraýyş ulgamynda düýpli özgertmeleriň durmuşa geçirilmegi, halkara ölçeglere laýyk gelýän saglygy goraýyş-anyklaýyş we ylmy-kliniki merkezleriň, köpugurly hassahanalaryň, şypahanalaryň yzygiderli gurlup, ulanmaga berilmegi, olarda döwrebap lukmançylyk enjamlarynyň ornaşdyrylmagy raýatlara edilýän hyzmatlaryň hilini ýokarlandyrmaga, keselleriň döremeginiň öňüni almaga ýardam berýär. Munuň özi ýurdumyzda halk we onuň abadan hem sagdyn durmuşy barada edilýän aladanyň aýdyň beýanydyr.

Goý, ata Watanymyzda raýatlarymyzyň saglygyny gorap saklamak, berkitmek, oňat dynç almagyny üpjün etmek ugrunda uly işleri alyp barýan hormatly Prezidentimiziň jany sag, ömri uzak bolsun, beýik tutumlary elmydama rowaçlyklara beslensin!

Agajan ALLANOW,
S.A.Nyýazow adyndaky Türkmen oba hojalyk uniwersitetiniň talyby.