Bütindünýä derejesinde ählumumy parahatçylyk, howpsuzlyk hem-de ata-baba ynsanperwerlik syýasatyny üstünlikli alyp barýan Hormatly Prezidentimiziň parasatly baştutanlygynda Garaşsyz, Hemişelik Bitarap Türkmenistan Watanymyz durnukly ösüş depginleri bilen öňe barýar. Türkmen döwleti özüniň Bitaraplyk derejesiniň çäklerinde dünýäniň ýurtlary bilen deňhukuklylyk esasynda, ähli ugurlar boýunça özara bähbitli, dost-doganlyk gatnaşyklaryny ýola goýýar hem-de yzygiderli ösdürýär.

Beýleki ençeme döwletler bilen bir hatarda, strategik hyzmatdaş hökmünde Russiýa Federasiýasy bilen köpugurly gatnaşyklar barha ösdürilýär hem-de hil taýdan täze derejä çykarylýar.

Mälim bolşy ýaly, Türkmenistan Garaşsyzlygyny alan wagtyndan Russiýa Federasiýasynyň strategik hyzmatdaşlygy hökmünde özara-deňhukukly gatnaşyklary ýol goýdy. 2002-nji ýylda Russiýa Federasiýasy bilen Türkmenistanyň arasynda dostluk we hyzmatdaşlyk hakynda Şertnama, 2017-nji ýylda RF-niň Prezidenti W.Putiniň Türkmenistana bolan saparynyň çäklerinde strategik hyzmatdaşlyk hakyndaky Şertnama hem-de 2022-nji ýylyň 10-njy iýunynda strategik hyzmatdaşlygy çuňlaşdyrmak hakyndaky Jarnama gol çekilmegi iki ýurduň özara gatnaşyklaryň döwrüň talabyna görä, yzygiderli ösdürilýändigini aýdyň görkezýär.

Türkmen halkynyň Milli Lideri, Türkmenistanyň Halk Maslahatynyň başlygy Gurbanguly Berdimuhamedowyň Russiýa Federasiýasyna bolan iş saparynda (noýabr, 2022ý.) Türkmenistanyň we Russiýanyň halklaryny asyrlaryň çuňlugyna uzaýan goňşuçylyk gatnaşyklary birleşdirýär, munuň özi mizemez dostlugyň binýadyny döredýär, diýip aýdan sözlerini aýratyn ýatlasymyz gelýär.

Şu ýerde milletleriň özara gatnaşyklarynda dil bilmekligiň ähmiýetiniň uludygyny, has takygy – milletleriň özara ysnyşmaklarynda onuň örän zerurdygyny belläp aýtmak isleýärin. Çünki köp dil bilýän adamyň intellektual derejesi ýokary bolup, ol kämilleşen şahsyýete öwrülýär. Durmuş hakykatyndan ugur alsaň, öň hem, Adamzat siwilizasiýasynyň häzirki ösüş döwründe hem köp dil bilmeklik taryhy zerurlyk bolupdyr diýmek ýalňyş bolmaz. Ýurdumyzyň ýaşlarynyň dünýä ýurtlarynyň, şol sanda arap, iňlis, rus, nemes, ýapon, hytaý we beýleki milletleriň dillerini öwrenmekleri we olary kämil özleşdirmekleri üçin ähli mümkinçilikler bar.

Ýurdymyzda rus diline berilýän ünsüň aýratynlygyny bellemek gerek. Rus dili çagalar bagyndan başlap orta mekdeplerde, dürli derejedäki hünär berýän, şeýle hem ýokary okuw mekdeplerinde okadylýar. Okuw mekdeplerinde rus dilinde okaýan toparlar bar. Ýörite, A.S.Puşkin adyndaky rus mekdebi (Aşgabat ş.) işleýär. Ýakyn geljekde Aşgabatda türkmen-rus uniwersitetini, Türkmenistanda Russiýa Federasiýasynyň abraýly ýokary okuw mekdepleriniň filiallaryny açmak göz öňünde tutylýar. Bu meýilleşdirilýän taslamalaryň durmuşa geçirilmegi türkmen-rus ikitaraplaýyn gatnaşyklarynyň  giňeldilmegine hem-de berkidilmegine ýardam berer.

Hormatly Prezidentimiz ýaş nesilleriň döwrebab derejede bilim almaklary, ylym öwrenmekleri – şunlukda öz hünäriniň ussady, döredijilikli zähmet çekmäge ukyply hem-de başarjaň bolup ýetişmekleri üçin ähli şertleri döredýär, tagallalar edýär. Beýleki döwletler, milletler bilen özara bähbitli köpugurly gatnaşyklary ýola goýýar. Şolaryň hatarynda ylym-bilim, medeni-gumanitar gatnaşyklara hem üns berilýär.

Biziň institutymyzda hem dünýäniň ösen ýurtlarynyň tanymal, dürli derejedäki okuw mekdepleri bilen onlaýn arkaly okuw sapaklary, ylmy-amaly maslahatlar hem-de bäsleşikler geçirilip durulýar. Bu tagallalaryň hemmesi biziň ýurdumyzyň ýaşlarynyň hemmetaraplaýyn kämilleşmegi üçin giň mümkinçilikler döredýär.

-  “Biz ýaşlara eziz Watanymyzyň geljegini gurujylar höhmünde garaýarys. Belent maksatlara ýetmekde ýurdumyzyň ýaş nesillerine aýratyn bil baglaýarys”, diýmek bilen Arkadagly Gahryman Serdarymyz ýaşlara uly ynam bildirýär.

Ýurdumyzyň geljegi, ýaş nesillerimiziň hem-de ähli türkmen halkynyň bagtyýar durmuşda ýaşamaklary üçin dyngysyz tagallalary edýän Arkadagly Gahryman Serdarymyzyň, Gahryman Arkadagymyzyň janlarynyň sag, belent başlarynyň aman, alyp barýan belent maksatly işleriniň rowaç bolmagyny arzuw edýäris.

Annasoltan MÄMMEDOWA,
Döwletmämmet Azady adyndaky Türkmen milli dünýä dilleri institynyň 4-nji ýyl talyby.